Néje lai to néje gə́ gə mḭdé ba
1 Taje lə Njekilamber gə́ to ŋgolə Dabid, mbai gə́ Jerusalem. 2 Njekilamber lé pana: Né gə́ mḭdé ba, néje lai-lai to néje gə́ gə mḭdé ba ya. 3 See ɗi ɓa dəw a kiŋga loo kula rɔ ndubu’g ləa lai dɔ naŋg neelé wa. 4 Njéboakojije lə na̰ gə́ kudu kára dəs ar njé gə́ kudu kára gə́ raŋg d’orè goo dee nɛ naŋg lé to gə ləbee-ləbee ya. 5 Kàr uba ləm, gə kàr andə ləm tɔ, yee ɔs rəa ɓad gə mba kaw loo gə́ yee ḭ keneŋ mba tel kuba gogo ya ɓəi. 6 Lel ula par gə́ dɔkɔl ləm, tel gə́ dɔgel ləm tɔ, yee ula gugu dɔ loo ndá tel ula gə́ kédé-kédé ya ɓəi. 7 Baaje lai d’ula par gə́ dɔ baa-boo’g nɛ rusu koŋgee el, deḛ d’ula par gə́ loo gə́ d’ula gə́ keneŋ kəm dee gə́ kédé-kédé. 8 Néje lai neelé kula ra dee lé loo pea godo. Kəm dəw asee dɔ koo loo’g el ləm, mbi dəw asee dɔ koo tar’g el ləm tɔ. 9 Néje lai gə́ to kédé ləw lé to néje gə́ d’a gə tel ree ya ɓəi. Néje lai gə́ ra dee mba̰ lé to néje gə́ d’a gə ra dee ya ɓəi tɔ. Né gə́ sigi kára kara godo dɔ naŋg nee. 10 Ɓó lé dəw oo né ɓa pana: Aa oo, né gə́ neelé to né gə́ sigi ndá, pa kari ba: to né gə́ dəs kédé no̰ sí’g ləw ba mba̰ ya. 11 Né gə́ ləw lé mee dəw olé dɔ’g el, né gə́ a gə ree gogo lé kara a kya̰ nékolé-mee-dɔ’g kar deḛ gə́ d’a gə koji dee gogo ɓəi lé el tɔ.
Kəmkàr lə dəw to né gə́ kari ba
12 Ma Njekilamber, ma m’to mbai lə Israɛlje mee ɓee-boo’d gə́ Jerusalem. 13 Gə goo kəmkàr lé ma m’wɔji məəm’g njaŋg m’saŋg ne gin néje lai gə́ ra dɔ naŋg nee lé, yee ɓa gə́ kula gə́ kədərə gə́ Ala ɔm ji dəwje’g ar dee d’ula rɔ dee keneŋ mbiriri dao ne. 14 Ma m’oo néje lai gə́ ra dee dɔ naŋg neelé ndá aa ooje, to néje gə́ gə mḭdé ba, to ŋgwɔd gə́ kaḭ goo lel’g ba. 15 Né gə́ rugu lé askəm ndɔji rəa karee aar dana el ləm, né gə́ godo lé loo tura godo ləm tɔ.
16 Ma m’pa məəm’g pana: Aa oo, ma m’tɔg mba̰ ndá kəmkàr ləm ur dɔ deḛ lai gə́ d’o̰ ɓee gə́ Jerusalem nɔm’g kédé ləm, m’iŋga kəmkàr gə gosonégər yaa̰ m’unda dee ləm tɔ . 17 Ma m’wɔji məəm’g njaŋg gə mba gər kəmkàr ləm, gə néra mbə ləma, gə néra dəw gə́ ar dəa tel wagəsa ləm tɔ. Ndá ma m’oo to gə́ yee neelé kara to gə́ ŋgwɔd gə́ kaḭ goo lel’g ba ya tɔɓəi. 18 Mbata dəw gə́ kəmkàr ləa to yaa̰ lé iŋga némeeko̰ yaa̰ tɔ. Yeḛ gə́ ar gər gin né ləa ḭ dɔ maree’d gə́ kédé-kédé lé ar némeeko̰ ləa kara ḭ dɔ maree’d gə́ kédé-kédé ya tɔ.
© Ngambai Bible © Alliance Biblique du Tchad 1989, 2015.
