1 Ma m’oo né gə́ majel kára dɔ naŋg nee ndá
To né gə́ boo gə́ al dɔ dəwje sula.
2 Dəw kára si keneŋ,
Ala aree nébaoje gə némajije gə rɔnduba ləm,
Né kára gə́ wɔji dəa gə́ malee rəa lé
Lalee el ləm tɔ
Nɛ Ala ya̰ loo aree ul ne rəa el
Mbata dəw-dɔ-ɓee ɓa a kal ne rəa ya.
Yee neelé to né gə́ gə mḭdé ba ya ləm,
To némajel gə́ boo ya ləm tɔ.
3 Ɓó lé dəw oji ŋganje tɔl (100) ləm,
Si kəmba ləbee bula ləma,
Ar ndɔje gə́ wɔji dɔ ləbje d’ḭ dɔ maree’g gə́ kédé-kédé ləm tɔ
Nɛ ɓó lé yeḛ si dan maji’g el ləm,
Ɓó lé dɔɓaree kara godo ləm tɔ ndá
Ma m’pana:
Ŋgon gə́ d’ɔree gə́ kɔr ya kara maji undá.
4 Mbata yeḛ ree dan né gə́ gə mḭdé ba’g ləm,
Yeḛ a tel kaw dan loondul’g ləma,
Ria kara loondul a dəb dɔ’g ləm tɔ.
5 Tɔɓəi yeḛ oo kàr el ləm
Yeḛ gəree el ləm tɔ
Yeḛ wa rəa yaa̰ unda debee neelé ya.
6 Lé yeḛ neelé si kəmba
Ləbee tɔl-dɔg-loo-joo (2.000) kara
Yeḛ a si dan maji’g el tɔ,
See néje lai neelé
D’aw gə́ loo gə́ kára ba kiao’g el wa.
7 Nékiŋgaje lə dəw lai lé
To mbata nésɔ gə́ təa’g ya
Nɛ lé bèe kara malee ɔr təa’g el ya saar.
8 Mbata see ɗi ɓa gə́ né
Gə́ njekəmkàr iŋga unda mbə-dəw wa.
Njenékəmndoo gə́ gər loo njaa
Mbuna deḛ gə́ d’isi kəmba’g lé
See ɗi ɓa yeḛ iŋga unda dee wa.
9 Né gə́ kəm dəw oo lé
Maji unda kunda bala néje:
Tɔɓəi yee neelé kara
To né gə́ gə mḭdé ba ya ɓəi ləm,
To gə́ kaiŋgwɔd goo lel’g ləm tɔ.
10 Né gə́ rara gə́ to keneŋ lé
D’unda ria mba̰ tɔ.
Tɔɓəi kəm gər to gə́ dəw lé
Askəm maḭta gə yeḛ gə́ siŋgá ur dəa’g lé el.
11 Loo gə́ taje bula yaa̰ ndá
Néje gə́ gə mḭdé ba bula yaa̰ tɔ.
See ɗi ɓa dəw iŋga keneŋ wa.
12 Mbata see na̰ ɓa gər né gə́ maji mbata lə dəw
Loo gə́ yeḛ si ne kəmba ləm,
Gə mee ndɔje bula gə́ yeḛ si ne kəmba
Gə́ dəs to gə́ ndil kag bèe ləm tɔ lé wa.
Esé see na̰ ɓa askəm kula dəw
Né gə́ a gə ree gée’g dɔ naŋg neelé wa.
© Ngambai Bible © Alliance Biblique du Tchad 1989, 2015.
