Godnduje lə Ala gə́ dɔg
TtG 5.6-211 Togə́bè ɓa Ala pa taje neelé lai pana: 2 Ma m’to Njesigənea̰ Ala lə sí gə́ m’ar sí undaje loo mee ɓee gə́ Ejiptə teḛje mee kəi kula ɓər’g lé.
3 I a kwa magəje gə́ raŋg məəi’g korè dɔm ma’g joo el.
4 I a tɔl né ndaji ne magə el, lé néje gə́ tar mee dara’g əsé néje gə́ dɔ naŋg nee əsé néje gə́ dan mán’d gə́ to gel naŋg kara i a ra né ndaji dee ne kára kara bèe el ya . 5 I a kunda barmba dəb kəmi naŋg no̰ dee’g el ləm, i a kula kəm rɔi ndòo mbata lə dee el ləm tɔ, mbata ma Njesigənea̰, Ala ləi lé ma m’to Ala gə́ kəm əḭ dɔ koso-dəwje’g ləm gə́ m’ar bo̰ néra yèr lə bɔ ŋganje gə́ d’ḛjim bəḭ-bəḭ lé ɔs ta ŋgan deeje’g saar njéboakojije lə dee gə́ kudu munda əsé gə́ kudu sɔ tɔ , 6 nɛ ma m’oo kəmtondoo lə deḛ gə́ d’undam dan kəm dee’g ar dee d’aa ne dɔ ndukunje lem kər-kər lé saar ŋgaka deeje gə́ kudu tɔl-tɔl-dɔg (1.000) ya tɔ.
7 Ala ləi gə́ Njesigənea̰ lé maji kari ɓar ria pəd-pəd as ne loo el, mbata dəw gə́ ɓar ri Njesigənea̰ pəd-pəd as né loo lé yeḛ a lal kar bo̰ nérea ɔs təa’g el . 8 Ndɔ-kwa-rɔ lé arje məəi to dɔ’g bururu mba kunda gə kəmee . 9 I a ra kula ndɔi misa̰ ndá a kunda ŋgaŋ kulaje ləi lai ya . 10 Nɛ ndɔ gə́ njekɔm’g siri lé to ndɔ-kwa-rɔ gə́ ka̰ Ala ləi gə́ Njesigənea̰, I a ra kula kára kara keneŋ el, i əsé ŋgoni gə́ diŋgam əsé yeḛ gə́ dené əsé kura ləi gə́ diŋgam əsé yeḛ gə́ dené əsé nékulje ləi əsé dəw-dɔ-ɓee gə́ ree si mee ɓee’g ləi kara a ra kula mee ndɔ’g neelé el. 11 Mbata mee ndɔje gə́ misa̰ lé Njesigənea̰ unda dara gə naŋg gə baa-boo-kad gə néje lai gə́ to keneŋ lé ndá ndɔ gə́ njekɔm’g siri lé yeḛ wa rəa keneŋ, gelee gə́ nee ɓa Njesigənea̰ tɔr ne ndia dɔ ndɔ-kwa-rɔ’g ləm, undá ne gə kəmee ləm tɔ .
12 I a təd kag bauije gə kɔḭije mba kar dɔ naŋg nee gə́ Ala ləi gə́ Njesigənea̰ ari si keneŋ lé yeḛ a kɔm ndɔje ləi dɔ maree’g kari ya .
13 I a tɔl dəw el .
14 I a ndal mɔdkaiya el .
15 I a ɓogo el .
16 I a təd taŋgɔm kunda ta mari’g el .
17 I a ra kəmkəḭ dɔ kəi’g lə mari el, i a ra kəmkəḭ dɔ dené’g lə mari el ləm, a ra kəmkəḭ dɔ kura’g ləa gə́ diŋgam əsé yeḛ gə́ dené’g, əsé dɔ maŋg’g ləa əsé dɔ mulayḛ̀je’g ləa əsé dɔ né gə́ rara gə́ to ka̰ mari nja doŋgɔ lé i a ra kəmkəḭ dɔ’g kára bèe el ləm tɔ .
18 Koso-dəwje lai d’oo ndu ndaŋg lə ndi ləm, gə telje lə ndi ləma, gə ndu to̰to̰ gə́ ɓar ləm tɔ, deḛ d’oo ndo̰ pərje gə sa pər gə́ tuu dɔ mbal’g lé. Koso-dəwje d’oo néje neelé ndá ar dee d’unda bala ləm, ar dee d’ɔr rɔ dee d’aar ne əw ləm tɔ . 19 Deḛ d’ula Moyis pana: I nja ula sí ta ndá j’a kooje ya, nɛ maji kar Ala ɓa ula sí el nà banelə j’a kwəije.
20 Moyis ula koso-dəwje neelé pana: Ɓəlje el, mbata ree gə́ Ala ree lé ree mba kaḭ meḛ sí ləm, gə mba kar ɓəl gə́ seḭ ɓəleeje lé aarje dɔ’g njaŋg ɓó gə mba kar sí raje ne kaiya nda̰ el tɔ.
21 Koso-dəwje neelé d’aar ŋgərəŋ, nɛ Moyis rəm pər gə́ rɔ ndi gə́ ḭ ŋgwɔḭ-ŋgwɔḭ’g loo gə́ Ala si keneŋ lé.
Godndu gə́ wɔji dɔ ra loo-nékinjaməs
22 Njesigənea̰ ula Moyis pana: I a pata togə́bè kar Israɛlje pana: Seḭ ooje gao to gə́ ma m’isi mee dara’g tar ɓa m’ula sí ta lé ya. 23 Seḭ a raje magəje gə larnda əsé gə larlɔr mba korè deeje dɔm’g joo el, seḭ a raje togə́bè el ya. 24 Maji kar sí ubaje naŋg gə́ loo-nékinjaməs gə mba kar sí injaje nékinjanéməsje lə sí gə́ ka̰ roo ləm, gə nékinjanéməsje lə sí gə́ ka̰ kɔm na̰’d sad ləm tɔ gə́ to gə́ badje lə sí gə maŋgje lə sí lé keneŋ. Loo lai gə́ m’a kar meḛ dəwje olé dɔ rim’g ndá m’a ree pər gə́ rɔ sí’g ləm, m’a tɔr ndum dɔ sí’g keneŋ ləm tɔ. 25 Ɓó lé seḭ a gə kundaje loo-nékinjaməs gə kɔr mbal ɓa k’armje ndá seḭ a kundaje gə kɔr mbalje gə́ tɔl dee el, mbata loo gə́ seḭ arje tina ɔrɔ rɔ kɔr mbalje neelé ndá seḭ ar deeje tel to né gə́ mina̰ ŋga . 26 Seḭ a raje loo-kḭjanéməs ləm gə́ ka̰ tuga loo ɗao-ɗao gə́ tar kaw ne gə mba kar dee d’oo kudu sí gə́ dum lé el.
© Ngambai Bible © Alliance Biblique du Tchad 1989, 2015.
