Kəi-kubu-si-Ala
1 Kəi-kubu-si-Ala d’a ra gə pal-kubuje dɔg gə́ d’ṵji gə kúla palégal gə́ sorè ləm, gə kubu gə́ ndiri ndul piro-piro gə kas gəḭ gə kas njir-njir ləm tɔ, d’a ndaji Nékundaje gə́ dara gə́ tɔs dee gə ŋgaŋgee béréré-béréré keneŋ tɔ. 2 Pal-kubu kára lé ŋgalee a k’as kəmkil dəw rɔ-joo-giree-jinaijoo ləm, tadee a k’as kəmkil dəw sɔ ləm tɔ, pal-kubuje lai lé d’a kasəna kára ba ya. 3 Pal-kubuje gə́ mi neelé d’a kuru dee ta na̰’d ləm, pal-kubuje gə́ mi gə́ raŋg lé kara d’a kuru dee ta na̰’d ləm tɔ. 4 D’a kuru kəm-kəi-kulaje gə́ ndul piro-piro ta pal-kubuje gə́ mi’d gə́ d’uru dee ta na̰’d lé ləm, d’a ra togə́bè ta pal-kubuje gə́ raŋg gə́ mi’d gə́ d’uru dee ta na̰’d lé ləm tɔ. 5 D’a kuru kəm-kəi-kulaje rɔ-mi ta pal-kubuje gə́ dɔtar’g lé ləm, d’a kuru kəm-kəi-kulaje rɔ-mi ta pal-kubuje gə́ d’uru dee na̰’d gə́ njekɔm’g joo’g lé ləm tɔ, kəm-kəi-kulaje neelé ta dee a kwɔji dɔ na̰ njoroŋ-njoroŋ. 6 D’a ra nékwa-né-na̰’dje rɔ-mi gə́ ra gə larlɔr ndá d’a tuga pal-kubuje lé ta na̰’d keg-keg gə nékwɔji-né-na̰’dje neelé bèe-bèe ya. Bèe ɓa kəi-kubu-si-Ala a tel to ne né gə́ kára ba.
7 D’a ra pal-kubuje gə́ d’ṵji dee gə bḭ-bya̰ mba dəb dɔ kəi-kubu-si-Ala’g, d’a ra pal-kubuje gə́ togə́bè as dɔg-giree-kára. 8 Pal-kubu gə́ kára lé ŋgalee a k’as kəmkil dəw rɔ-munda ləm, tadee a k’as kəmkil dəw sɔ ləm tɔ, pal-kubuje gə́ dɔg-giree-kára neelé d’a kasəna kára ba ya. 9 Pal-kubuje gə́ mi neelé d’a kuru dee ta na̰’d ɓəd ləm, njé gə́ misa̰ gə́ raŋg kara d’a kuru dee ta na̰’d ɓəd ləm tɔ ndá yee gə́ njekɔm’g misa̰ lé d’a kudu na̰’d gun joo no̰ kəi-kubu gə́ kédé’g lé ya. 10 D’a kuru kəm-kəi-kulaje rɔ-mi ta pal-kubuje gə́ d’uru dee na̰’d dɔtar’g lé ləm, d’a kuru kəm-kəi-kulaje rɔ-mi ta pal-kubuje gə́ raŋg’d gə́ d’uru dee na̰’d gə́ njekɔm’g joo’g lé ləm tɔ. 11 D’a ra nékwa-né-na̰’dje rɔ-mi gə larkas ndá d’a kula nékwa-né-na̰’dje mee kəm-kəi-kulaje’g neelé. Togə́bè ɓa d’a tuga ne ta kəi-kubu gə́ neelé karee to ne né gə́ kára ba ya. 12 To gə́ pal-kubuje gə́ ra ne kəi-kubu neelé a kal dɔ kəi gə́ la bèe ndá gesee gə́ al dəa lé a koso gir kəi gə́ la’g lé tɔ. 13 Kubu gə́ as kəmkil dəw kára gə́ dəs ta maree loo kára ləm, gə kubu gə́ as kəmkil dəw kára gə́ dəs ta maree loo gə́ raŋg’d ləm tɔ gə́ tur dɔ ŋgal kəi-kubu neelé ndá a kuru naŋg mbɔree’d gə́ loo joo neelé mba ko̰ ne dəa. 14 Né ka̰ dəb dɔ kəi-kubu’g neelé d’a ra gə ndar bàl badje gə́ ndiri kas ləm, d’a ra né dəb dəa’g gə ndar daje gə́ mán gə́ ɓar dee dopḭje mba kila dəa gə́ tar ləm tɔ.
15 D’a tɔl gaji kagje mbata lə kəi-kubu-si-Ala neelé, d’a tɔl gaji kag-akasiaje ɓa d’a kur dee tar. 16 Gaji kag kára lé ŋgalee a k’as kəmkil dəw dɔg ləm, tadee a k’as kəmkil dəw kára gə gesee ləm tɔ. 17 Gaji kagje kára-kára lai lé d’a goré dee gel joo-joo mba kar dee d’wa boa ta na̰-na̰, d’a ra togə́bè mbata lə kagje lai gə́ wɔji dɔ kəi-kubu neelé ya. 18 D’a tɔl gaji kagje rɔ-joo mbata lə kəi-kubu neelé mbɔree’g par gə́ dɔkɔl. 19 D’a léḛ larnda ra gə́ gɔl gaji kagje as rɔ-sɔ mba kya̰ kəmbolee keneŋ-keneŋ gə mba kunda gel gaji kagje gə́ rɔ-joo’g neelé ndá néje gə́ ra gə larnda lé d’a ra joo-joo mbata lə gaji kag kára-kára mba tula teaje gə́ goré joo-joo lé keneŋ tɔ. 20 D’a tɔl kagje rɔ-joo mbata lə mbɔree gə́ njekɔm’g joo par gə́ kel dɔgel ləm, 21 d’a ra gɔl kagje gə larnda as rɔ-sɔ ndá gɔl kagje neelé joo-joo d’a to gel gaji kagje’g kára-kára lai ləm tɔ. 22 D’a tɔl gaji kagje misa̰ mbata lə dun kəi-kubu-si-Ala gə́ to par gə́ dɔ-gó lé. 23 D’a tɔl gaji kagje joo mbata lə dɔ kum kəi-kubu-si-Ala gə́ par gə́ dunee’g, 24 gaji kagje neelé d’a kwa dee na̰’d, un kudee gel dee gə́ bər lé pə̰ dee a to lam ndá d’a kwa dee gə nḭgá na̰’d més par gə́ dɔ gə́ tar, a to togə́bè gə mbata lə dee joo bɔr gə́ d’unda dee dɔ kumeeje gə́ joo lé tɔ. 25 Togə́bè ɓa gaji kagje lé d’a kas jinaijoo ləm, gɔl kagje gə́ ra gə larnda gə́ wɔji dɔ dee d’a kas dɔg-giree-misa̰ ləm tɔ mba kar gɔl kagje joo-joo to mba gaji kag kára-kára ya.
26 D’a tɔl kunda kag-akasiaje mi mbata lə kagje gə́ gel kəi-kubu-si-Ala gə́ kára’g ləm, 27 gə kunda kagje mi mbata lə kel kəi-kubu-si-Ala gə́ raŋg ləma, gə kunda kagje mi mbata lə dun kəi-kubu-si-Ala gə́ to par gə́ dɔ-gó lé ləm tɔ. 28 Kunda kag gə́ dana lé a kḭ ŋgaŋ gaji kagje gə́ kára’g dəs dɔ mareeje’g njal teḛ ŋgaŋgee gə́ raŋg’d. 29 D’a kɔr gir gaji kagje gə́ tɔl lé gə larlɔr ləm, d’a ra niŋgáje gə́ wɔji dɔ dee gə́ kəm kula kunda kagje keneŋ gə larlɔr ləma, d’a kɔr gir kunda kagje gə larlɔr ləm tɔ. 30 D’a la kəi-kubu-si-Ala gə goo lé gə́ tɔji-i dɔ mbal’g lé ya.
31 D’a ra pal-kubu gaŋg mee kəi gə kubu gə́ ndul piro-piro gə kas gəḭ gə kas njir-njir ləm, gə kúla palégal gə́ sorè ləm tɔ. Pal-kubu neelé njekɔsee a kɔsee gə ŋgaŋgee béréré-béréré ləm, a ndaji Nékundaje gə́ dara keneŋ ləm tɔ. 32 D’a tɔ pal-kubu neelé dɔ gaji kag-akasiaje gə́ sɔ gə́ d’ɔr gir dee gə larlɔr, gaji kagje lé nétugané-ta-na̰’dje gə́ ra gə larlɔr d’a to keneŋ ləm, d’a ɓər dee tar dɔ gɔl gaji kagje gə́ ra dee gə larnda lé ləm tɔ. 33 D’a kila pal-kubu neelé gel nétuga-né-ta-na̰’dje gə́ ra gə larlɔr ndá loo gə́ mee ŋgon kəi gə́ gaŋg gə pal-kubu lé d’a kar dee d’andə gə sa̰duk kɔrgoota lé keneŋ. Pal-kubu neelé a to mba gaŋg ne mee kəi mba kai ne loo gə́ to gə kəmee ɓəd ləm, gə loo gə́ to gə kəmee doi ɓəd ləm tɔ . 34 Sa̰duk kɔrgoota neelé d’a kila kidatea gə́ ka̰ meekoso lemsé ta’g mee loo gə́ to gə kəmee doi’g lé. 35 D’a kunda tabul no̰ pal-kubu gə́ gaŋg ne mee kəi lé ləm, kag pərndɔ lé kara a kwɔji ne dɔ tabul njoroŋ par gə́ kel kəi-kubu gə́ dɔkɔl lé ləm tɔ, ndá d’a kunda tabul neelé par gə́ kelee gə́ dɔgel tɔ.
36 D’a ra pal-kubu mba kila ta kəi-kubu-si-Ala’g ndá d’a ra gə kubu gə́ ndul piro-piro gə kas gəḭ gə kas njir-njir ləm, gə kúla palégal gə́ sorè lé ləm tɔ, a to kubu gə́ d’ɔs gə́ kɔs ya béréré-béréré. 37 D’a tɔl gaji kag-akasiaje mi ndá d’a kɔr gir dee gə larlɔr mba kila pal-kubu neelé dɔ dee’g, nétuga-né-na̰’dje gə́ ra gə larlɔr lé d’a to keneŋ ləm, d’a léḛ larkas ra ne gɔl gaji kagje gə́ mi lé ləm tɔ.
© Ngambai Bible © Alliance Biblique du Tchad 1989, 2015.
