1 Njesigənea̰ ula Moyis pana: Ɓasinè i a koo né gə́ m’a gə ra gə Parao̰, ji siŋgamoŋ gə́ ɓar mèr-mèr lé ɓa a kɔsee ɓɔḭ-ɓɔḭ gə mba karee ya̰ dee ar dee d’aw ləm, ji siŋgamoŋ gə́ ɓar mèr-mèr lé ɓa a kɔsee karee tuba dee ne mee ɓee’g ləa ləm tɔ.
Njesigənea̰ un ndia mba kɔm dee tar
2 Ala ula Moyis tɔɓəi pana: Ma m’to Njesigənea̰ . 3 Ma m’teḛ dɔ Abrakam’g gə dɔ Isaak’g gə dɔ Jakob’g tɔ, m’teḛ dɔ dee’g gə́ Ala gə́ Bao-Siŋgamoŋ lé ya, nɛ gin rim gə́ to Njesigənea̰ lé ɓa deḛ gər el. 4 Ma lé ma man rɔm m’ar dee gə mba kar dee ɓee gə́ Kana̰ gə́ to ɓee mbá lə dee gə́ deḛ d’isi keneŋ kédé lé gə́ né ka̰ dee-deḛ ya. 5 Ma m’oo ndu tuma̰ rɔ lə Israɛlje gə́ njé gə́ Ejiptə d’wa dee ɓər ndá m’ar məəm olé dɔ ndu manrɔ’g ləm tɔ. 6 Gelee gə́ nee ɓa, maji kari ula Israɛlje pana: Ma m’to Njesigənea̰. Kulaje ɓəd-ɓəd gə́ njé gə́ Ejiptə d’ɔm dɔ sí’g lé m’a kɔr dɔ sí’g ləm, m’a kar sí ɔrje dɔ sí kúla ɓər’g lə dee ləm, m’a kaji sí gə goo jim gə́ kula ndiŋ ləma, gə goo rəwta-gaŋgje gə́ boo-boo ləm tɔ. 7 M’a kar sí toje dəwje ləm doŋgɔ doi ləm, m’a to Ala lə sí ləm tɔ, ndá seḭ a gərje gao to gə́ ma m’to Ala lə sí gə́ Njesigənea̰ gə́ ɔr sí kula ɓərje gə́ njé gə́ Ejiptə d’ɔm dɔ sí’g lé. 8 M’a kaw sə sí mee ɓee gə́ ma man ne rɔm gə mba kar Abrakam, gə Isaak, gə Jakob lé, ma Njesigənea̰ lé m’a kar sí gə́ né ka̰ sí-seḭ ya.
9 Moyis ula Israɛlje taree togə́bè. Nɛ néurti gə́ ra dee ləm, gə kula ɓər gə́ wɔi dɔ dee’g ləm tɔ lé ɓa ɔg dee loo koo ta lə Moyis ya.
10 Njesigənea̰ ula Moyis pana: 11 Aw ula Parao̰, mbai gə́ Ejiptə, mba karee ya̰ Israɛlje ar dee d’unda loo mee ɓee’g ləa teḛ raga.
12 Moyis ila Njesigənea̰’g kəmee’g ya pana: Aa oo, Israɛlje ya ɓəi d’oo ta ləm el, ŋga see Parao̰ yḛ̀ a koo ta ləm loo gə́ ra’g wa. Ma lé m’to njetakwɔi.
13 Njesigənea̰ pata ar Moyis gə Aaro̰, tɔɓəi yeḛ un ndia ar dee d’oo ta gə́ wɔji dɔ Israɛlje ləm, gə ta gə́ wɔji dɔ Parao̰, mbai gə́ Ejiptə ləm tɔ, mba kar Israɛlje lé d’unda loo mee ɓee gə́ Ejiptə teḛ ya.
Ginkaje lə Moyis gə Aaro̰
14 Aa oo, ri mbai dɔ gel-bɔje lə dee ɓa nee: Ŋgalə Rubḛ, yeḛ gə́ to ŋgondər Israɛl ɓa ri dee to nee: Enok, Palu, Hesron, gə Karmi. Deḛ nja to gel-bɔje lə Rubḛ.
15 Ŋgalə Simeo̰ ɓa ri dee to nee: Jəmuel, Jamḭ, Ohad, Jakḭ, gə Sohar gə Sawul gə́ to ŋgolə dené gə́ Kana̰. Deḛ nja to gel-bɔje lə Simeo̰.
16 Aa oo, ri ŋgalə Ləbi gə ŋgaka deeje ɓa nee: Gerso̰, Keat gə Merari. Ləb si kəmba lə Ləbi lé aḭ tɔl-dəa-rɔ-munda-giree-siri (137) . 17 Ŋgalə Gerso̰ ɓa ri dee to nee: Libni gə Simei gə njémeekəije lə dee. 18 Ŋgalə Keat ɓa ri dee to nee: Amram, Jisəar, Ebro̰ gə Ujiel. Ləb si kəmba lə Keat lé aḭ tɔl-dəa-rɔ-munda-giree-munda (133) tɔ. 19 Ŋgalə Merari ɓa ri dee to nee: Mali gə Musi. Deḛje neelé to gel-bɔje lə Ləbi gə ŋgaka deeje tɔ.
20 Amram taa Jokebed gə́ to beneje, təa gə́ dené ləa, yeḛ oji səa Aaro̰ gə Moyis. Ləb si kəmba lə Amram lé aḭ tɔl-dəa-rɔ-munda-giree-siri (137) tɔ.
21 Ri ŋgalə Jisəar ɓa nee: Koré, Nepeg gə Jikri. 22 Ri ŋgalə Ujiel ɓa nee: Misael, Elsapan gə Sitri.
23 Aaro̰ taa dené gə́ ria lə Eliseba, ŋgolə Aminadab gə́ dené gə́ to ko̰ na̰ Nasonje, yeḛ oji səa Nadab, Abihu, Eləajar gə Itamar.
24 Ŋgalə Koré ɓa ri dee to nee: Asir, Elkana gə Abiasap. Deḛ nja to njémeekəije lə Koritəje.
25 Eləajar, ŋgolə Aaro̰ taa dené mbuna ŋgalə Putiel gə́ dené’g, yeḛ oji səa Pines.
Deḛ nja ɓa to gə́ mbai dɔ gel-bɔje lə Ləbije gə njémeekəije lə dee na̰’d.
26 Aaro̰ deḛ gə Moyis neelé nja ɓa Njesigənea̰ ula dee ta pana: Arje Israɛlje d’unda loo mee ɓee gə́ Ejiptə teḛ gə goo bao-rɔje lə dee lə dee. 27 To deḛ nja ɓa pata d’ar Parao̰, mbai gə́ Ejiptə gə mba kar Israɛlje d’unda ne loo mee ɓee gə́ Ejiptə teḛ lé. Deḛ ɓa to gə́ Moyis gə Aaro̰ neelé ya.
Ala un ndia ar Moyis gɔl kára ya tɔɓəi
28 Loo gə́ Njesigənea̰ pata ar Moyis mee ɓee gə́ Ejiptə lé 29 ndá yeḛ ula Moyis pana: Ma m’to Njesigənea̰. Ula Parao̰, mbai gə́ Ejiptə, taje lai gə́ ma m’ulai lé.
30 Nɛ Moyis ila Njesigənea̰ keneŋ kəmee’g ya pana: Aa oo, ma lé m’to dəw gə́ njetakwɔi, see Parao̰ a koo ta ləm loo gə́ ra’g wa.
© Ngambai Bible © Alliance Biblique du Tchad 1989, 2015.
