Ndərta gə́ wɔji dɔ njéteggintaje gə́ ŋgɔm lé
1 Njesigənea̰ ulam ta gə rɔtaje nee pana: 2 Ma ŋgon-dəw lé maji kam m’tegginta m’wɔji ne dɔ njéteggintaje lə Israɛl gə́ d’aw tegginta lé ləm, m’ula dee-deḛ gə́ d’aw tegginta gə́ ḭ meḛ dee-deḛ’g ya ləm tɔ lé m’pana: Maji kar sí ooje ta lə Njesigənea̰! 3 Mbaidɔmbaije gə́ Njesigənea̰ pa togə́bè pana: Meeko̰ a koso dɔ njéteggintaje gə́ to mbəje, deḛ gə́ ndolè goo ta gə́ to meḛ dee-deḛ’g ɓó d’oo ne né kára kara el! 4 Ǝi Israɛlje, njéteggintaje lə sí lé to d’asəna gə tàlje gə́ d’isi dɔ nduba’g bèe. 5 Seḭ aarje mba gɔl kəm ndògo-bɔrɔje gə́ ta̰ lé el ləm, seḭ raje ndògo-bɔrɔ guguje ne dɔ gel-bɔje lə Israɛl mba kaar ne njaŋg loo-rɔ’g mee ndɔ’g lə Njesigənea̰ el ləm tɔ. 6 Némḭdije lə dee to gə́ néje gə́ gə mḭdé ba ləm, ginta gə́ deḛ teg to gə́ taŋgɔm ləm tɔ, deḛ pana: Njesigənea̰ ɓa pa bèe. Nɛ Njesigənea̰ ɓa ula dee kula el! Deḛ d’ar dəwje d’unda meḛ dee yel to gə́ ta lə dee a kaw lée’g béréré. 7 Némḭdije gə́ seḭ ooje lé see to gə́ néje gə́ gə mḭdé ba el wa. Gintaje gə́ seḭ tegje lé see to taŋgɔmje el wa. Seḭ pajena: Njesigənea̰ ɓa pa bèe-bèe. Nɛ neḛ m’pata kára kara el. 8 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Aa ooje, neḛ n’aw sə sí gə ta mbata seḭ paje taje gə́ mḭdé-mḭdé ba ləm, némḭdije lə sí kara to gə́ néŋgɔmje ləm tɔ, Mbaidɔmbaije gə́ Njesigənea̰ ɓa pa bèe.
9 N’a rɔ gə njéteggintaje gə ji neḛ, deḛ gə́ némḭdije lə dee to néje gə́ gə mḭdé-mḭdé ba ləm, ginta tegje lə dee to taŋgɔmje ləm tɔ, d’a godo loo-mbo̰-dɔ-na̰’g lə koso-dəwje lə neḛ ləm, d’a ndaŋg ri dee mee maktub’g lə gel-bɔje lə Israɛl el ləma, d’a kandə mee ɓee gə́ Israɛl el ləm tɔ. Yee ɓa seḭ a gərje ne to gə́ neḛ n’to Mbaidɔmbaije gə́ Njesigənea̰ lé.
10 Néje neelé a teḛ mbata deḛ d’ar koso-dəwje lə neḛ ndəm. Loo gə́ meelɔm godo ɓəi kara deḛ pana: Meelɔm, meelɔm! Koso-dəwje lə neḛ d’ila ndògo-bɔrɔ nɛ deḛ lé rḛdə bɔrɔ gə́ majel keneŋ. 11 Maji kam m’ula njérḛd bɔrɔ gə́ majel kenḛgje lé to gə́ ndògo-bɔrɔ lé a gə təd. Ndi bura-boo a tɔ kub kər ɓai-ɓai ndá, əi, seḭ kwɔjije a juraje naŋg ləm, lel-ndi a kula mbḭ-mbḭ ləm tɔ. 12 Yee ɓa aa ooje, ndògo-bɔrɔ lé təd ya! See d’a dəji sí pana: See bɔrɔ gə́ rḛdje keneŋ lé to ra wa, d’a dəji sí bèe el wa. 13 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: N’a kar lel-ndi ula mbḭ-mbḭ dan boo-oŋg’d lə neḛ ləm, ndi bura-boo a tɔ kub kər dan oŋg’d lə neḛ ləm tɔ, tɔɓəi ndi kwɔji a jura naŋg wururu-wururu gə mba tuji loo pugudu-pugudu. 14 N’a tɔ ndògo-bɔrɔ gə́ seḭ rḛdje bɔrɔ gə́ majel keneŋ ləm, n’a karee unda naŋg rab-rab ləma, gineje gə́ tum kara a to raga ndəgəsə-ndəgəsə ləm tɔ, yee a təd dana guyum ndá seḭ kara a tujije keneŋ pugudu-pugudu tɔ. Yen ɓa seḭ a gərje ne to gə́ neḛ n’to Njesigənea̰ ya. 15 Togə́bè ɓa n’a kar boo-oŋg lə neḛ aw lée’g béréré dɔ ndògo-bɔrɔ’g ləm, gə dɔ njérḛd bɔrɔ gə́ majel kenḛgje ləm tɔ, ndá n’a kula sí pana: Ndògo-bɔrɔ lé godo ŋga! Deḛ gə́ njérḛd bɔrɔ gə́ majel kenḛgje 16 gə́ to njéteggintaje gə́ Israɛl gə́ d’aw tegginta d’wɔji ne dɔ Jerusalem ləm, deḛ gə́ d’oo némḭdije gə́ ka̰ meelɔm loo gə́ meelɔm godo lé kara d’a godo ləm tɔ. Mbaidɔmbaije gə́ Njesigənea̰ ɓa pa bèe.
Ndərta gə́ wɔji dɔ denéje gə́ njéra némbeḛje lé
17 Ma ŋgon-dəw lé maji kam m’turu kəm par gə́ dɔ ŋganje gə́ dené’g lə koso-dəwje ləm gə́ d’aw tegginta gə́ ḭ meḛ dee-deḛ’g ya lé ndá m’tegginta m’wɔji ne dɔ dee. 18 M’a pana: Mbaidɔmbaije gə́ Njesigənea̰ pa togə́bè pana: Meeko̰ a koso dɔ denéje gə́ njékɔs gajije kar dəwje lai nim dɔ kuru ji dee’gje ləm, gə dɔ njékṵji kubu gə́ wɔilɔje kar njé gə́ ŋgal əsé njé gə́ gwɔji d’ila dɔ dee’g mba karee to gum kwa dəwje lé ləm tɔ! See seḭ ə̰jije meḛ sí’g pajena: A kwaje koso-dəwje lə neḛ ŋga lal kwa sí-seḭ wa. 19 Seḭ ulaje sul dɔ neḛ’g rɔ koso-dəwje’g ləm, tɔlje ne dəwje gə́ kəm kar dee d’wəi el ɓəi ləm, nɛ ya̰je dəwje gə́ kəm kar dee d’isi kəmba el lé kəmba ləm tɔ mba kiŋga ne nduji kó-blé as ŋgo ji dəwje ləm, gə goŋ muruje ba ya ləm tɔ. Bèe ɓa seḭ ərje ne kəm koso-dəwje lə neḛ ar deeje tuga ne mbi dee gə́ dɔ taŋgɔm’g. 20 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Aa ooje, gumje lə sí gə́ seḭ aw waje ne dəwje to gə́ yelje bèe lé neḛ ndigi ra sə dee né ndá n’a ti dee dɔ ji síje’g mbidi-mbidi. Dəwje gə́ seḭ saŋgje mba kwa deeje to gə́ yelje bèe lé n’a taa dee kɔm dee tar. 21 Kubu-kila-doje’g lə sí gə́ wɔilɔ lé n’a til ŋgərərə-ŋgərərə ndá n’a taa koso-dəwje lə neḛ ji sí’g kɔm dee tar. D’a tel to gə́ nékwa lə sí gogo el ŋga, bèe ɓa seḭ a gərje ne to gə́ neḛ n’to Njesigənea̰ ya. 22 Mbata seḭ arje mee njemeekarabasur pélé wəs-wəs gə taŋgɔmje loo gə́ neḛ nja n’ula kəmee ndòo el ləm, mbata seḭ arje ji njemeeyèr ɓar mèr-mèr mba kɔgee ne loo kuba rəw néra ləa gə́ majel kya̰ mba si ne kəmba ləm tɔ. 23 Seḭ a kooje némḭdije gə́ gə mḭdé-mḭdé lé el ŋga ləm, seḭ a paje ta néje gə́ to gə ndəree ɓəi lé el ŋga ləm tɔ, n’a taa koso-dəwje lə neḛ ji sí’g kɔm dee tar. Bèe ɓa seḭ a gərje ne to gə́ neḛ n’to Njesigənea̰ ya.
© Ngambai Bible © Alliance Biblique du Tchad 1989, 2015.
