Ndərta gə́ wɔji dɔ kaḭ dɔ Jerusalem sub gə rɔ
1 Ma ŋgon-dəw lé maji kam m’un dərŋgel kára m’ila nɔm’g ndá m’a ndaji ɓee-boo gə́ Jerusalem dɔ’g. 2 Maji kam m’wɔji loo kaḭ dəa sub gə rɔ keneŋ ləm, m’ndaji kəi-kumje ləm, gə dɔndalje gə́ ka̰ rɔ ne səa ləm, gə loo-si njérɔje ləma, gə pusu-rɔje gugu ne dəa sub ləm tɔ. 3 Maji kam m’un əb-larndul m’ur tar asəna gə ndògo-lar gə́ d’ila bèe mbuna ma’g gə ɓee-boo lé, m’a tel kəm njoroŋ ndá d’a kaḭ dəa sub gə rɔ ləm, ma kara m’a kaḭ dəa sub gə rɔ ləm tɔ. Maji kar né neelé to nétɔji mbata gel-bɔje lə Israɛl.
4 Tɔɓəi maji kam m’to naŋg dɔ jigelm’g m’ɔm ne néra kori-korije lə gel-bɔje lə Israɛl dɔm’g, bèe ɓa m’a kodo ne néra kori-korije lə dee gə ndɔje lai gə́ m’a to ne dɔ jim’g neelé. 5 N’a tura bula lə ndɔje ləm karee as gə bula lə ləb néra kori-korije lə dee, ndɔ tɔl-munda gə dəa rɔ-jinaikara (390). Ndá m’a kodo ne néra kori-korije lə gel-bɔje lə Israɛl togə́bè ya. 6 Loo gə́ m’a tɔl ndɔje neelé bém ndá maji kam m’tel m’to dɔ jikɔlm’g, bèe ɓa m’a kodo ne néra kori-korije lə gel-bɔje lə Juda as ndɔm rɔ-sɔ. N’a tura ndɔ kára wɔji dɔ ləb kára-kára. 7 M’a tel kəm njoroŋ par gə́ dɔ Jerusalem gə́ d’aḭ dəa sub gə rɔ lé ləm, m’a kula kag jim gə́ to kari ba lé par gə́ dəa’g ləm tɔ ndá m’a teg ne ginta kwɔji ne dəa. 8 Bèe ɓa aa oo, n’a tɔm gə kúla mba karm m’oo loo turu rɔm yo gə́ nee el saar kar ndɔje gə́ wɔji dɔ kaḭ dɔ ɓee sub gə rɔ lé aw lée’g béréré ya. 9 Maji kam m’dḭ kó-wa ləm, gə kó gə́ ɓaree blé ləm, gə mḭji-kag ləm, gə mḭji-təni ləm, gə ma̰gəra ləma, gə teḭ-bḭ ləm tɔ ndá m’ɔm dee mee jo gə́ kára ba ya m’koro gə́ muru m’wɔji ne dɔ ndɔje gə́ m’a gə to ne naŋg dɔ jim’g lé, m’a ko̰ as ndɔm tɔl-munda gə dəa rɔ-jinaikara (390). 10 Muru gə́ m’a ko̰ lé ndɔ kára ndá kwɔi ləa a kas nékwɔji kwɔi-lə-né kára gə́ kaiyee loo-sɔ kun təa kára ya, yee ɓa m’a sɔ ndɔje lai togə́bè gə ndɔje lai. 11 Man gə́ m’a kai lé a kas litər kára gə ndɔm-ndɔm. 12 M’a sɔ mbəə gə́ ra gə kó-blé gə́ m’a kila kəm dee’g dɔ pər gə́ m’ra gə siḭ dəwje lé.
13 Tɔɓəi Njesigənea̰ pana: Togə́bè ɓa Israɛlje d’a ko̰ ne muru lə deḛ gə́ mina̰ mbuna ginkoji dəwje gə raŋg gə́ n’a gə tuba dee kɔm dee keneŋ lé.
14 Ma m’pana: Wai, Mbaidɔmbaije gə́ Njesigənea̰, aa oo, m’ar rɔm mina̰ gɔl kára el, un kudee gə basəm ba ya saar ɓasinè lé m’usɔ da gə́ wəi gə́ kwəi əsé gə́ maree wá el ləm, dakas da gə́ mina̰ gə́ rara kara ɔrɔ tam el ləm tɔ.
15 Yeḛ tel ilam keneŋ pana: Aa oo, n’am siḭ maŋgje tor siḭ dəwje’g ndá m’a yel ne pər koro ne muru ləm.
16 Yeḛ ulam tɔɓəi pana: Ma ŋgon-dəw lé n’a gə tuji nésɔje gə́ ŋgəm mee ɓee gə́ Jerusalem. D’a kwɔji muru gə́ kwɔji ɓa ko̰ gə meekaarkərm ləm, d’a kwɔji mán gə́ kwɔji ɓa kai gə kaar gəd ləm tɔ. 17 Muru gə mán a lal dee ləm, kaar dee a kwa dee paḭ-paḭ loo gə́ d’oo na̰ ləma, d’a kunda mbəbəg mbata lə néra kori-korije lə dee ləm tɔ.
© Ngambai Bible © Alliance Biblique du Tchad 1989, 2015.
