Ala a kar bo̰ néra Israɛlje ɔs ta dee’g
1 Ma ŋgon-dəw lé maji kam m’un né gə́ adə làm-làm to gə́ yiŋga lə njḛdisa mbaita bèe, m’un m’ndisa ne dɔm gə mbaitam. Tɔɓəi maji kam m’un nékwɔji-kwɔi lə néje m’kai ne yiŋga lé loo munda. 2 Yee gə́ loo kára lé m’a roo dan mee ɓee-boo’g loo gə́ ndɔ kaḭ dəa sub gə rɔ lé aw lée’g béréré mba̰, yee gə́ njekɔm’g loo joo lé m’a kodo kaw tḭja gə yiŋga gugu ne gir ɓee-boo lé sub, tɔɓəi yee gə́ njekɔm’g loo munda lé m’a sané dan lel’g ndá n’a kɔr kiambas korè ne gée. 3 M’a dḭ yiŋga neelé lam-lam tɔ ta kubu’g ləm. 4 Tɔɓəi yiŋga neelé m’a dḭ təa lam gə mba kɔm dan pər’d mba roo. Pər a kḭ keneŋ mba roo gel-bɔje lə Israɛl lai ya.
5 Mbaidɔmbaije gə́ Njesigənea̰ pa togə́bè pana: Yee ɓa to né gə́ a teḛ dɔ Jerusalem gə́ neḛ nja n’aree to mbuna ginkoji dəwje gə raŋg’g gə ɓeeje gə́ gugu dəa lé. 6 Njé gə́ Jerusalem d’al dɔ godnduje lə neḛ gə dɔ ndukunje lə neḛ d’ar ta gə́ wa dɔ dee lé ur dɔ ka̰ ginkoji dəwje gə raŋg’g gə ɓeeje gə́ gugu dɔ dee. Mbata deḛ d’ə̰ji godnduje lə neḛ bəḭ-bəḭ ləm, deḛ njaa gə goo ndukunje lə neḛ el ləm tɔ. 7 Gelee gə́ nee ɓa Mbaidɔmbaije gə́ Njesigənea̰ pa ne ta togə́bè pana: To gə́ seḭ alje ta areeje ur dɔ ka̰ ginkoji dəwje gə raŋg gə́ gugu dɔ sí sub lé ləm, to gə́ seḭ aaje dɔ ndukunje lə neḛ kər-kər el ləma, gə raje godnduje lə neḛ el ləm tɔ nɛ seḭ raje né gə goo godndu lə ginkoji dəwje gə raŋg gə́ gugu dɔ sí sub lé 8 ndá yee gə́ bèe ɓa Mbaidɔmbaije gə́ Njesigənea̰ pa ne ta togə́bè pana: Aa ooje, neḛ n’aw sə sí gə ta tɔɓəi n’a gə gaŋgta dɔ sí’g kəm ginkoji dəwje gə raŋg’g. 9 N’a ra sə sí né gə́ n’ra kédé el ɓəi ləm, gə́ n’a tel ra gogo nda̰ el ləm tɔ mbata néra síje lai gə́ mina̰ lé. 10 Gelee gə́ nee ɓa bɔ ŋganje d’a sɔ ŋgan deeje mbuna sí’g ləm, ŋganje d’a sɔ bɔ deeje ləm tɔ, n’a gaŋgta dɔ sí’g tɔɓəi n’a sané ne ges sí lai gə́ nai lé kad-kad dan lel’g .
11 Gelee gə́ nee ɓa Mbaidɔmbaije gə́ Njesigənea̰ un ne ndia njaŋg pana: Neḛ lé n’to Njesikəmba! To gə́ seḭ arje magəje lə sí lai gə néje lə sí lai gə́ mina̰ d’ar loo lə neḛ gə́ to gə kəmee lé mina̰ ndá neḛ kara n’a kun kəm neḛ dɔ sí’g ləm, kəm neḛ a kas ŋgɔgərɔ dɔ sí’g ləm tɔ ɓó n’a koo kəmtondoo lə sí nda̰ el. 12 Dəwje lai gə́ kudu munda lé kudu deḛ gə́ kára d’a kwəi yoo-koso ləm, ɓoo-boo a kula kəm dee ndòo mbuna sí’g ləm tɔ, deḛ gə́ kudu kára d’a kwəi yoo-kiambas gugu gir sí sub, tɔɓəi deḛ gə́ kudu kára lé n’a sané dee dan lel’g ndá n’a kɔr kiambas kore ne goo dee tɔ. 13 Bèe ɓa n’a kar oŋg lə neḛ aw lée’g béréré ləm, n’a dal ne ba̰ gə boo-oŋg lə neḛ dɔ dee’d gə́ kédé-kédé ləma, n’a kar mee neḛ oso ne naŋg po̰ ləm tɔ. Yee ɓa d’a gər ne to gə́ neḛ Njesigənea̰ m’pata dan oŋg’d lə neḛ loo gə́ neḛ n’ɔm boo-oŋg lə neḛ dɔ dee’g ya. 14 N’a kar ɓee lə sí tel to dɔdilaloo ləm, gə néboo-rɔkul mbuna ginkoji dəwje gə raŋg gə́ gugu dəa sub lé gə kəm dee-deḛ lai gə́ dəs keneŋ ləm tɔ. 15 Ɓee lé a to néboo-rɔkul, gə nékunda kogo ləm, a to nékwa kwɔji ne maree gə néɓəl ləm tɔ mbata ginkoji dəwje gə raŋg gə́ gugu dəa sub lé loo gə́ n’a gaŋg rəw-taje lə neḛ dəa’g gə oŋg ləm, gə boo-oŋg ləma, gə nékwɔji kəmkàrje gə́ kəbərə-kəbərə ləm tɔ. Neḛ Njesigənea̰ nja ɓa m’pata nee ya.
16 Loo gə́ n’a rɔ dee gə ɓandaŋgje lə ɓoo-boo gə́ d’adə njel-njel gə́ wa dəw ndá wəi lé ɓandaŋgje neelé n’a rɔ gə mba tuji sí ne pugudu-pugudu mbata n’a kila ɓoo-boo dɔ nékəmndooje’g lə sí, ndá n’a tuji nésɔje lə sí gə́ ŋgəmje lé mbad-mbad. 17 N’a kula gə ɓoo-boo gə daje gə́ majel dɔ sí’g kar dee tuji ŋgan síje kya̰ sí kari ba, yoo-koso gə kɔm məs d’a dəs mbuna sí’g, n’a kila rɔ dɔ sí’g tɔ. To neḛ Njesigənea̰ ɓa m’pata nee ya .
© Ngambai Bible © Alliance Biblique du Tchad 1989, 2015.
