1 Njéteggintaje gə́ Ajee gə Jakari, ŋgolə Ido gə́ to njetegginta lé, tegginta gə ri Ala lə Israɛlje d’ar Jibje gə́ d’isi Juda gə Jerusalem tɔ. 2 Yen ŋga Jorobabel, ŋgolə Səaltiel, gə Josué, ŋgolə Josadak, d’ḭ d’un kudu kunda kəi-Ala gə́ to Jerusalem lé. Tɔɓəi njéteggintaje lə Ala gə́ d’isi sə dee keneŋ lé la sə dee tɔ .
3 Mee ndəa’g neelé Tatnai gə́ to njeguburuɓee gə́ si kel tura-baa gə́ nee, gə Setar-Bosnai, gə kuramar deeje ree rɔ dee’g dəji dee togə́bè pana: See na̰ ɓa un ndia ar sí gə mba kar sí undaje kəi gə́ to gə kəmee neelé ləm, gə mba kar sí tel gɔlje ndògo-bɔrɔje neelé gogo ləm tɔ wa. 4 Deḛ dəji dee tɔɓəi pana: See dəwje gə́ njékṵda kəije neelé ri dee lə na̰je wa.
5 Nɛ kəm Ala to dɔ ŋgatɔgje’g lə Jibje. Togə́bè ɓa dəw gə́ njekɔg dee dɔ kula’g neelé godo ya saar ar taree teḛ rɔ Darius’g ɓa yeḛ tel gə maktub ar dee ula dee ne ta gə́ wɔji dɔ ta neelé ɓəi.
6 Ta gə́ Tatnai, njeguburuɓee gə́ kel tura-baa gə́ nee, gə Setar-Bosnai, gə ges kuramar deeje gə́ d’isi Aparsak gə́ to kel tura-baa gə́ nee ndaji d’ar Darius, mbai lé ɓa nee:
7 Deḛ ndaŋg maktub d’ɔr ne goo taree d’aree togə́bè pana:
Lapia ɓòo, mbai Darius!
8 Maji kar mbai gər gao to gə́ jeḛ j’aw dəb ɓeeko̰ gə́ Juda mee kəi gə́ wɔji dɔ Ala gə́ boo ndá j’oo to gə́ d’unda gə kɔr mbalje gə́ tɔl ləm, d’ɔm kunda kagje dɔ’g tar ləm tɔ, ar kula aw kalaŋ ya ləm, teḛkɔr ji dee’g ləm tɔ. 9 Bèe ɓa jeḛ n’dəjije ŋgatɔgje m’pana: See na̰ ɓa un ndia ar dee mba kar dee ra ne kəi neelé ləm, gə kar dee tel gɔl ndògo-bɔrɔje neelé gogo ləm tɔ wa. 10 Jeḛ n’dəjije dee ri dee gə mba kari gər dee ləm, jeḛ j’undaje ri dəwje gə́ to njékɔrno̰ deeje ləm tɔ. 11 Aa oo, ta gə́ deḛ tel d’ula sí ɓa nee: Deḛ pana: Neḛ n’toje kuraje lə Ala gə́ to mbai dɔ dara gə mbai dɔ naŋg nee. Tɔɓəi neḛ n’tel n’gɔlje kəi gə́ d’unda mee ləbje bula gə́ dəs ləw ba, to kəi gə́ mbai gə́ boo gə́ to mbai lə Israɛlje ra kédé tɔlee bém ya. 12 Nɛ loo gə́ bɔ neḛje-je d’ar mee Ala gə́ to mbai dɔ dara ea̰ dɔ dee’g ndá yeḛ uba dee ya̰ dee ji Nebukadnesar, mbai gə́ Babilɔn gə́ to dəw gə́ Kalde ndá yeḛ ɓa tuji kəi neelé ləm, yeḛ wa koso-dəwje ɓər aw sə dee Babilɔn ləm tɔ . 13 Nɛ mee ləb ko̰ɓee gə́ dɔtar’g lə Sirus, mbai gə́ Babilɔn lé ndá mbai Sirus lé un ndia mba kar neḛ n’gɔlje kəi-Ala neelé gogo . 14 Tɔɓəi mbai Sirus neelé nja odo nékulaje gə́ ra gə larlɔr gə larnda gə́ to mee kəi-magəje gə́ to Babilɔn, gə́ to néje gə́ Nebukadnesar ɔr dee mee kəi-Ala gə́ Jerusalem kédé ɓa yeḛ aw ɔm mee kəi-magə gə́ to Babilɔn ndá Sirus lé ɔm néje neelé ji dəw gə́ ria lə Sesbasar gə́ yeḛ undá gə́ njeguburuɓee lé. 15 Tɔɓəi yeḛ ulá pana: Maji karee odo nékulaje neelé aw ne aw ɔm dee mee kəi’d gə́ to gə kəmee gə́ to Jerusalem ləm, maji kar dee tel gɔl kəi-Ala gogo loo toree’d gə́ kédé lé ləm tɔ. 16 Yee ɓa Sesbasar neelé ree tum ne gin kəi-Ala gə́ to Jerusalem lé, un kudee mee ndəa gən lé saar kara n’isi n’raje kəi lé gə́ ra ɓó neḛ n’tɔleeje bém el ɓəi. 17 Ɓasinè, ɓó lé mbai oo gə́ nékəmra ndá maji kar dee saŋg mee kəi-nébaoje’g lə mbai gə́ to Babilɔn mba kar dee d’oo see mbai Sirus lé un ndia mba kar dee d’unda kəi-Ala gə́ to Jerusalem lé tɔgərɔ ya wa. Tɔɓəi maji kar mbai ula gə torndia gə́ wɔji dɔ né neelé ar sí j’oo ɓa.
© Ngambai Bible © Alliance Biblique du Tchad 1989, 2015.
