Ndukun lə Darius gə kunda kəi-Ala gə kəmee lé
1 Yen ŋga mbai Darius un ndia gə mba kar dee saŋg mee kəi-ŋgəm-maktubje gə́ to loo gə́ d’ɔm nébaoje lə ɓee gə́ Babilɔn keneŋ. 2 Ndá deḛ d’iŋga maktub gə́ kə́ na̰’d gə́ ndaŋg ta kolé-mee-dɔ’g mee ɓee gə́ Ahmeta gə́ to ɓee-boo lə dəb ɓeeko̰ gə́ Médi lé. Ta gə́ ndaŋg keneŋ lé ɓa nee:
3 Mee ləb ko̰ɓee gə́ dɔtar’g lə mbai Sirus lé, mbai Sirus ar dee ndukun gə́ wɔji dɔ kəi-Ala gə́ to Jerusalem pana: Maji kar dee ra kəi neelé gogo gə mba karee to loo gə́ d’a kinja nékinjanéməsje keneŋ ləm, maji kar ginee to kiriŋ kiriŋ-kiriŋ ləm tɔ. Dəree gə́ ḭ gə́ tar a k’as kəmkil dəw rɔ-misa̰ ləm, tadee a k’as kəmkil dəw rɔ-misa̰ ləm, 4 d’a tɔs kɔr mbalje gə́ boi gə́ tɔl dee dɔ na̰’d gun munda gə kagje gə́ sigi dɔ na̰’d gun kára ləm tɔ. Lar kuga njékulaje a kḭ mee kəi’g lə mbai ya. 5 Tɔɓəi nékulaje gə́ ra gə larlɔr ləm, gə larnda ləm tɔ gə́ to mee kəi-Ala’g lé gə́ to néje gə́ Nebukadnesar odo dee mee kəi-Ala gə́ to Jerusalem aw ne Babilɔn kédé lé d’a tel kaw ne kəi-Ala gə́ to Jerusalem lé gogo mba kunda dee léeje’d gə́ wɔji dɔ dee kédé ndá d’a kunda dee mee kəi-Ala’g ya.
6 Bèe ndá i Tatnai gə́ to njeguburuɓee gə́ to kel tura-baa gə́ nu, gə i Setar-Bosnai, gə seḭ kuramar deeje gə́ toje njé gə́ Aparsak gə́ síje kel tura-baa gə́ nu lé maji kar sí ɔrje rɔ sí aarje əw. 7 Maji kar sí ya̰ deeje ar dee ra kula kunda kəi-Ala neelé kəm dee gə́ kédé ya. Maji kar njeguburuɓee lə Jibje gə ŋgatɔgje lə Jibje tel d’unda kəi-Ala neelé d’aree to lé gə́ to ne kédé lé ya. 8 Aa ooje, ndukun gə́ m’un m’ar sí gə́ wɔji dɔ né gə́ kəm kar sí raje gə ŋgatɔgje lə Jibje mbata kula kunda kəi-Ala ɓa to nee: Lar lə mbai gə́ seḭ iŋgaje gə goo nékoga-dɔ-rɔ lə dəwje gə́ d’isi kel tura-baa gə́ nu lé d’a kuga ne dɔ ji dəwje neelé karee as béréré ya gə mba kar né kára kara ɔg dee loo rəa el. 9 Da-kulje gə́ d’aw ndòo dee mba kinja dee gə́ nékinjanéməsje gə́ ka̰ roo kar Ala gə́ si dara lé ɓa nee: Bɔ maŋgje ləm, gə bàl badje ləm, gə ŋgan badje ləm, gə kó ləm, gə kad ləm, gə mán-nduú ləma, gə ubu ləm tɔ lé néje neelé seḭ a kar deeje gə goo dəji gə́ njékinjanéməsje gə́ d’isi Jerusalem d’a dəji sí ndá seḭ a kar deeje gə ndɔ dee ndɔ dee ɓó a lalje el 10 gə mba kar dee d’inja nékinjanéməsje gə́ baḭyeḛ ə̰də lel Ala gə́ si dara lé ləm, gə mba kar dee ra tamaji mbata lə mbai gə ŋganeeje kar dee d’isi ne gə́ majee ləm tɔ. 11 Tɔɓəi aa ooje, ndukun gə́ m’un m’ar sí lé nana ɓa gə́ a kalta dɔ ta’g neelé ndá d’a kɔr kag gə́ boi gə́ mee kəi’g ləa ya kur teá keneŋ, tɔɓəi d’a kar kəi ləa tel to gə́ ɓiri-ɓisi tɔ. 12 Maji kar Ala gə́ ar ria ɓar loo gə́ nee’g lé tuji mbai gə́ rara gə dəwje gə́ rara gə́ d’un ji dee mba tuji tapam əsé gə mba tuji kəi-Ala neelé gə́ to Jerusalem lé. Ma Darius m’un ndum njaŋg bèe ya. Maji ra née gə́ léegəneeya.
13 Yen ŋga Tatnai, njeguburuɓee gə́ kel tura-baa gə́ nu ləm, gə Setar-Bosnai ləma, gə kuramar deeje ləm tɔ lé d’ḭ kalaŋ d’aw ra né gə goo ndukun neelé gə́ mbai Darius un ar dee lé.
Kəi gə́ tel gɔl gogo lé d’unda gə kəmee
14 Ŋgatɔgje lə Jibje ra kəi neelé d’aree aw maji gə goo ndər ta gə́ Ajee njetegginta gə Jakari, ŋgolə Ido pa. Deḛ ra kula neelé saar tɔlee bém gə goo ndukun lə Ala lə Israɛlje ləm, gə goo ndukun lə Sirus, gə Darius, gə Artajerjɛs, mbaije gə́ Persə ləm tɔ . 15 Deḛ tɔl kəi lé bém mee ndɔ gə́ njekɔm’g munda’g lə naḭ gə́ ɓaree Adar mee ləb ko̰ɓee gə́ njekɔm’g misa̰ gə́ Darius to ne mbai lé. 16 Israɛlje, gə njékinjanéməsje gə Ləbije gə ges ŋgalə deḛ gə́ d’ḭ ɓee-ɓər’g tel ree lé d’unda kəi-Ala neelé gə kəmee gə rɔlel. 17 Nékinjaməsje gə́ d’inja d’unda ne kəi-Ala gə kəmee lé to bɔ maŋgje tɔl (100) kára ləm, bàl badje tɔl joo (200) ləma, ŋgan badje tɔl sɔ (400) ləm tɔ, tɔɓəi nékinjanéməsje gə́ ka̰ kuga dɔ kaiya lə Israɛlje lai lé bàl bya̰je dɔg-giree-joo gə goo bula lə ginkoji Israɛlje. 18 Deḛ d’unda njékinjanéməsje gə kudu dee kudu dee ləm, Ləbije kara d’unda dee gə goo kai na̰ kula lə dee ləm tɔ mba ra kula kar Ala mee ɓee gə́ Jerusalem to gə́ deḛ ndaŋg ne taree mee maktub’g lə Moyis lé tɔ.
19 Deḛ gə́ d’ḭ ɓee-ɓər’g tel ree lé ra naḭ Pag mee ndɔ gə́ njekɔm’g dɔg-giree-sɔ lə naḭ gə́ dɔtar’g . 20 Mbata njékinjanéməsje gə Ləbije d’ɔr won rɔ dee na̰’d ndá deḛ lai rɔ dee àr ŋgad-ŋgad. Deḛ d’inja ŋgon badə Pag neelé mbata deḛ lai gə́ d’ḭ ɓee-ɓər’g tel ree ləm, gə mbata lə ŋgako̰ deeje gə́ to njékinjanéməsje ləma, gə mbata lə dee-deḛ nja kara ləm tɔ. 21 Israɛlje gə́ d’ḭ ɓee-ɓər’g tel ree lé d’usɔ badə Pag na̰’d gə deḛ lai gə́ d’ɔr rɔ dee rɔ néje gə́ mina̰’g lə ginkoji dəwje gə́ d’isi mee ɓee’g neelé gə́ d’ɔm sə dee na̰’d sad mba saŋg goo Njesigənea̰ Ala lə Israɛlje lé. 22 Deḛ ra naḭ gə́ wɔji dɔ muru gə́ lal əm-tiné gə rɔlel as ndɔ dee siri mbata Njesigənea̰ ar rɔ dee lel dee loo gə́ yeḛ tel mee mbai gə́ Asiri aree ula diŋgam meḛ dee’g dɔ kula kunda kəi Ala gə́ to Ala lə Israɛlje lé.
© Ngambai Bible © Alliance Biblique du Tchad 1989, 2015.
