Jakob gə njémeekəije ləa d’ɔm na̰ rəbə gə mba kaw Ejiptə
1 Israɛl uba naŋg ḭ aw gə néje lai gə́ to kea̰. Yeḛ teḛ Beer-Seba ndá yeḛ inja nékinjanéməsje keneŋ ar Ala lə bɔbeeje gə́ Isaak. 2 Ala teḛ dɔ Israɛl’g gə́ némḭdi loondul’g ɓaree pana: Jakob! Jakob!
Israɛl ndigi təa’g pana: M’oo tai’g ya!
3 Ala pana: Ma m’to Ala, Ala lə bɔbije ya. Maji kari ɓəl mba kaw ɓee gə́ Ejiptə lé el mbata lé gə́ neelé ɓa m’a kari tel to ginkoji dəwje gə́ boo keneŋ ya. 4 Ma nja m’a kaw səi na̰’d ɓee gə́ Ejiptə, tɔɓəi ma nja m’a tel səi gogo ya tɔ. Ndá Jisəb ɓa a tɔi kəmi gə jia ya.
5 Jakob ḭ Beer-Seba aw. Ŋgalə Israɛl d’ar bɔ deeje gə́ Jakob, gə ŋgan deeje, gə denéje lə dee d’isi mee pusuje’d gə́ Parao̰ ula ne mba kodo dee ne lé. 6 Deḛ d’aw gə nékulje lə dee ləm, gə nékiŋgaje lə dee gə́ d’iŋga dɔ naŋg ɓee gə́ Kana̰ ləm tɔ. Bèe ɓa Jakob gə ŋgakeaje lai ya ree Ejiptə . 7 Yeḛ aw gə ŋganeeje gə́ diŋgam gə ŋgan meḛ ŋganeeje gə́ diŋgam ləm, gə ŋganeeje gə́ dené gə ŋgan meḛ deeje gə́ diŋgam ləm tɔ, deḛ lai gə́ to ŋgakeaje lé yeḛ ar dee ree səa na̰’d ɓee gə́ Ejiptə tɔ.
8 Aa ooje ri ŋgalə Israɛl gə́ ree Ejiptə ɓa to nee: Jakob gə ŋganeeje.
Ŋgondər Jakob lé ria lə Rubḛ. 9 Ŋgalə Rubḛ ɓa ri dee to nee: Enok gə Palu gə Hesron gə Karmi.
10 Ŋgalə Simeo̰ ɓa ri dee to nee: Jəmuel gə Jamin gə Ohad gə Jakin gə Sohar, tɔɓəi Sawul, ŋgolə dené gə́ Kana̰.
11 Ŋgalə Ləbi ɓa ri dee to nee: Gerson gə Keat gə Merari.
12 Ŋgalə Juda ɓa ri dee to nee: Er gə Onan gə Sela gə Peres gə Jera. Nɛ Er gə Onan lé d’wəi ɓee gə́ Kana̰. Ŋgalə Peres lé ri dee lə Hesron gə Hamul.
13 Ŋgalə Isakar lé ri dee ɓa to nee: Tola gə Puba gə Jɔb gə Simron.
14 Ŋgalə Jabulo̰ lé ri dee ɓa to nee: Sered, gə Elon, gə Jaleel.
15 Deḛ nja to ŋgalə Lea gə́ yeḛ oji dee gə Jakob Padan-Aram, gə ŋgonee gə́ dené Dina tɔ. Ŋganeeje gə́ diŋgam gə njé gə́ dené lai lé to dəwje rɔ-munda-gir-dee-munda.
16 Ri ŋgalə Gad ɓa to nee: Sipion gə Hagi gə Suni gə Esbon gə Eri gə Arodi gə Areeli.
17 Ŋgalə Aser ɓa ri dee to nee: Jimna gə Jisba gə Jisbi gə Beria, tɔɓəi ŋgoko̰ dee gə́ dené gə́ ria lə Sera tɔ. Ŋgalə Beria ɓa ri dee to nee: Heber, gə Malkiel.
18 Deḛ nja to ŋgalə Jilpa, yeḛ gə́ Laba̰ ar Lea, ŋgonee gə́ dené lé, tɔɓəi yeḛ oji dee gə Jakob. Deḛ lai to dəwje dɔg-gir-dee-misa̰.
19 Ŋgalə Rasel, dené lə Jakob ɓa ri dee to nee: Jisəb, gə Bḛjami. 20 Jisəb oji Manasə gə Eprayim mee ɓee gə́ Ejiptə gə Asnat, ŋgolə Poti-Pera gə́ to njekinjanéməs gə́ Ɔn lé . 21 Ŋgalə Bḛjami ɓa ri dee to nee: Bela gə Beker gə Asbel gə Gera gə Naaman gə Ehi gə Rɔs gə Mupim gə Hupim gə Ard. 22 Deḛ nja to ŋgalə Rasel gə́ yeḛ oji dee gə Jakob. Deḛ lai to dəwje dɔg-gir-dee-sɔ.
23 Ŋgolə Dan ɓa to Usim.
24 Ŋgalə Neptali ɓa ri dee to nee: Jasiel gə Guni gə Jeser gə silem.
25 Deḛ nja to ŋgalə Bila, yeḛ gə́ Laba̰ ar Rasel, ŋgonee gə́ dené lé ndá yeḛ oji dee gə Jakob. Deḛ lai to dəwje siri.
26 Dəwje lai gə́ d’aw gə Jakob Ejiptə lé deḛ gə́ to ŋgan méeje lé d’aḭ rɔ-misa̰-gir-dee-misa̰ lal tura denéje lə ŋgalə Jakob. 27 Ŋgalə Jisəb gə́ yeḛ oji dee Ejiptə deḛ joo. Bula lə njémeekəije lə Jakob gə́ ree Ejiptə lé to dəwje rɔ-siri (70) .
Jakob gə njémeekəije ləa d’isi Ejiptə
28 Jakob ula Juda nea̰’g kédé rɔ Jisəb’g mba karee ulá to gə́ d’isi d’aw gə́ Gosen ndá d’aw dɔ naŋg gə́ Gosen ya. 29 Jisəb wa dɔ gɔl pusu ləa al si keneŋ mba kaw Gosen mba tila kəm bɔbeeje gə́ Israɛl. Loo gə́ yeḛ teḛ aar nea̰’g ndá yeḛ tuga gwɔbee ka̰ bɔbeeje’g no̰ ne gə́ kuree ya. 30 Israɛl ula Jisəb pana: Maji kam m’wəi ɓasinè mbata m’ila kəm dɔi’g ləm, i kara si kəmba ɓəi ləm tɔ.
31 Jisəb ula ŋgakea̰je gə njémeekəije lə bɔbeeje pana: Ma lé m’a kḭ kaw rɔ Parao̰’g ndá m’a kulá pana: Ŋgakɔmje, gə njémeekəije lə bɔmje gə́ d’isi ɓee gə́ Kana̰ lé ree rɔm’g mba̰. 32 Dəwje neelé to njénékulje mbata d’ul koso-nékulje. Deḛ ree gə badje lə dee gə maŋgje lə dee, gə néje lai gə́ to ka̰ dee ya. 33 Togə́bè ɓa loo gə́ Parao̰ a ɓar sí mba dəji sí pana: See kula ɗi ɓa seḭ raje wa. 34 Ndá seḭ a kiláje keneŋ pajena: Kuraje ləi lé gə basa sí saar ɓasinè kara jeḛ n’toje gə́ njénékulje, jeḛ ləm, gə bɔ síje ləm tɔ. Yeḛ ɓa seḭ a síje ne Gosen mbata njénékulje lé to kḛji kəm Ejiptəje’g ya.
© Ngambai Bible © Alliance Biblique du Tchad 1989, 2015.
