Ala lé pata gə rəw gə́ rɔ Ŋgonee’g
1 Ləw ləw ɓa Ala pata gə tapea ləm, gə néreaje ɓəd-ɓəd gə́ d’ɔs goo na̰ goo na̰ ar ka síje d’oo ar njéteggintaje ɓa ria ne sə dee dəa ya. 2 Nɛ ndəa gə́ gogo nee, yeḛ pata ar sí nɛ Ŋgonee ɓa ria ne sə sí dəa. Yeḛ nja ɓa Ala unda ne naŋg nee ləm, yeḛ aree to njenéje lai ləm tɔ. 3 Yeḛ to bao-ronduba lə Ala ləm, gə njekɔr rəa ləm tɔ. Tapea gə́ ɓar mḭ lé yeḛ gəd ne nékundaje ləa gəd-gəd. Loo gə́ yeḛ ɔr won kaiya gə́ wa naŋg nee mba̰ ndá yeḛ ɔd si dɔ jikɔl Njeboo-ronduba gə́ si sém dara’g.
Ŋgon-Ala lé ur dɔ kuraje gə́ dara lai
4 Togə́bè ɓa yeḛ ur dɔ dəwje gə́ dara ləm, ria gə́ yeḛ iŋga gə́ nédɔji kara ur dɔ ri dee-deḛ’g nja ləm tɔ. 5 See na̰ ɓa mbuna dəwje gə́ dara lé Ala ulá ta nee pana:
I to Ŋgonəm,
Ɓogənè ɓa m’ojii ya. See yeḛ pa bèe wa. Esé see yeḛ pa pana:
M’a to Bɔbeeje ləm,
Yeḛ a to Ŋgonəm ləm tɔ
See yeḛ pa bèe wa .
6 Nɛ loo gə́ yeḛ ar ŋgondəree ree naŋg nee ndá yeḛ pana:
Maji kar kuraje lə Ala gə́ dara lai d’wá meḛ dee’g .
7 Nɛ aa ooje, ta gə́ yeḛ pa wɔji ne dɔ kuraje gə́ dara ɓa to nee:
Kuraje ləa gə́ dara lé yeḛ tel dee gə́ lel ləm,
Kuraje ləa kara yeḛ tel dee gə ndo̰ pər ləm tɔ .
8 Nɛ aa ooje, ta gə́ yeḛ ula Ŋgonee lé ɓa nee:
Ǝi Ala, kalimbai ləi to saar gə no̰.
Kag-mbai gə́ ka̰ ko̰ɓee ləi lé ɓa to kag-mbai gə́ ka̰ meekarabasur .
9 I lé unda meekarabasur dan kəmi’g nɛ néra gə́ yèr lé i ə̰ji bəḭ-bəḭ,
Gelee gə́ nee ɓa, əi Ala, gə́ to Ala ləi lé
Wa ne dɔi gə ubu gə́ ka̰ rɔlel
Undai ne gə kəmee unda kuramarije.
10 Yeḛ pa tɔɓəi pana:
I Mbaidɔmbaije lé kédé gə́ dɔtar i nja tum gin naŋg nee ləm,
Dara kara to né gə́ jii nja ɓa ra ləm tɔ .
11 D’a tuji pugudu, nɛ i a nai,
Deḛ lai d’a ŋgisi to gə́ kubu bèe.
12 I a kə́ dee to gə́ kubu gə́ ŋgal yududu bèe
Ndá d’a tel to ne ɓəd ya.
Nɛ i nja a si to gə́ kédé ləm,
Ləb sii kara rudee a kun el ləm tɔ.
13 See kura gə́ dara gə́ ra ɓa yeḛ ulá pana:
Si dɔ jikɔlm’g
Saar mba karm m’ar njéba̰je ləi tel to nétura-gɔl-kɔm ləi lé wa .
14 See kuraje lə Ala gə́ dara lé to ndilje gə́ njéra né kar Ala gə́ yeḛ ula dee mba kar dee ra kula la ne gə deḛ gə́ d’a gə kiŋga kaji lé el wa.
© Ngambai Bible © Alliance Biblique du Tchad 1989, 2015.
