Néra Melkisedek lé teggin kula ra Jeju
1 Melkisedek neelé to mbai dɔ Salem ləm, yeḛ to njekinjanéməs lə Ala gə́ Njesisémdara’g ləm tɔ. Loo gə́ Abrakam ḭ loo dum gə́ yeḛ dum ne mbaije’g ndá Melkisedek tila kəmee ləm, yeḛ tɔr ndia dəa’g ləm tɔ . 2 Abrakam lé kai nébanrɔje lé kudu dɔg ɓa un təa kára ar Melkisedek. Melkisedek lé to mbai gə́ ka̰ meekarabasur gə goo gin ria-yeḛ nja ləm, yeḛ to mbai gə́ Salem, yee ɓa wɔji dɔ mbai gə́ njekar dəwje d’isi gə meekulɔm ləm tɔ. 3 Yeḛ neelé bɔbeeje godo ləm, kea̰je kara godo ləma, gin ka-dɔgeje godo ləm tɔ. Dəw oo ndɔ kojee əsé ndɔ gə́ kəmə ləa godo lé el tɔ. Nɛ deḛ d’ée gə́ dəw gə́ tel to asəna gə Ŋgon-Ala ya. Melkisedek neelé sí gə́ njekinjanéməs ya saar-saar gə no̰.
4 Ǝ̰jije ooje to gə́ Melkisedek lé ur dɔ ka síjeḛ mbata Abrakam kai ta nébanrɔje loo dɔg ɓa un təa kára aree. 5 Ŋgalə Lébi gə́ to njékinjanéməsje lé maktub godndu wɔji mba kar dee taa ta néje lə dəwje gə́ to ŋgako̰ deeje nɛ deḛ lé to gə́ ŋgan Abrakam ya . 6 Nɛ Melkisedek gə́ to ginkoji dee el lé taa ta néje ji Abrakam’g ɓa tɔr ne ndia dɔ yeḛ gə́ Ala tɔr ndia dəa’g lé ɓəi. 7 Tɔgərɔ ya, yeḛ gə́ tɔr ndia dɔ maree’g lé ur dɔ maree’g ya, loo maḭyee godo. 8 Loo kára neelé deḛ gə́ taa nékar gə́ kaiee loo dɔg ɓa un təa kára-kára lé to gə́ dəwje ba nɛ loo kára gə́ raŋg lé njetaa nékar neelé to yeḛ gə́ to njesikəmba to gə́ maktub pa taree lé. 9 Tɔɓəi Lébi gə́ taa nékar gə́ kaiee loo dɔg ɓa un təa kára-kára ji dəwje’g lé yeḛ nja ɓa uga təa kára bèe gə ji bɔbeeje Abrakam 10 mbata yeḛ nai mee bɔbeeje’g ɓa Melkisedek ree tila kəm Abrakam ɓəi. 11 Kula ra ka̰ Lebije gə́ to kula ra njékinjanéməsje lé ginee ḭ maktub godndu gə́ d’ar dəwje. Ɓó lé kula ra dee to né gə́ maji ɔr njoroŋ ndá see ban ɓa njekinjanéməs gə́ raŋg gə goo ka̰ Melkisedek ɓó gə goo ka̰ Aaro̰ el lé see a kḭ keneŋ wa. 12 Mbata loo gə́ kula kinja néməs tel to ɓəd ndá godndu kara d’a telee ɓəd tɔ. 13 Tɔgərɔ ya, yeḛ gə́ ta neelé wɔji dəa lé ginkojee to gə́ ɓəd, dəw ləa gə́ kára kara ra kula loo-nékinjaməs’g gɔl kára el. 14 Jeḛ n’gər gao, Mbaidɔmbaije lə sí lé ḭ ginkoji Juda’g, ginkoji dəwje neelé Moyis pata lə njekinjanéməs gə́ a kḭ keneŋ ree lé bèe el.
15 Yee gə́ neelé to raga ndəgəsə ya. Tɔɓəi njekinjanéməs gə́ raŋg asəna gə Melkisedek ɓa ḭ tum ginee gə́ raŋg. 16 Yeḛ neelé d’undá gə goo godndu gə́ wɔji dɔ darɔ dəw ɓa el, nɛ d’undá gə goo siŋgamoŋ gə́ ḭ rɔ dəw gə́ a si kəmba gə no̰. 17 Mbata d’ɔr taree d’wɔji ne dəa pana:
I to njekinjanéməs gə no̰,
Gə goo ka̰ Melkisedek .
18 Tɔgərɔ ya, godndu gə́ ləw lé d’ya̰ mbata yee kul ɗəŋ-ɗeŋ ɓó gao el. 19 Mbata godndu gə́ ləw lé ar dəw kára kara maji ne ɔr njoroŋ el. Nɛ nékunda mee yel dɔ’g gə́ maji undá ɓa teḛ, yee ɓa j’oo loo mba rəm ne pər gə́ rɔ Ala’g.
20 Né neelé teḛ lal kar dee manrɔ dee dɔ’g el. 21 Mbata Lebije lé loo gə́ deḛ tel to njékinjanéməsje ndá deḛ manrɔ dee dɔ dee’g el. Nɛ Jeju lé tel to njekinjanéməs gə goo ta manrɔ lə yeḛ gə́ ulá ta pana:
Mbaidɔmbaije un ndia njaŋg gə rɔkubu ɓó a pəl ta el.
I to njekinjanéməs gə no̰, gə goo ka̰ Melkisedek .
22 Gelee gə́ nee ɓa Jeju ila ne dər gin manrɔ gə́ to maji ɔr njoroŋ lé ya.
23 Tɔɓəi, njékinjanéməsje lé deḛ bula d’ɔs goo na̰ goo na̰ mbata kwəi lə dee o̰ el ɓa ɔg dee si njaŋg gə no̰. 24 Nɛ yeḛ nja gə́ si kəmba gə no̰ ɓa si gə kula kinja néməs gə́ to né kya̰ gogo kar dəw gə́ raŋg el. 25 Yee gə́ bèe ɓa, yeḛ askəm kaji ne deḛ gə́ mbɔl dəa ɓa rəm pər gə́ rɔ Ala’g lé, a kaji dee ne kɔr njal mbata yeḛ to njesikəmba saar-saar gə no̰ mba ra rəwta lə dee-deḛ kar dee ya.
26 Tɔgərɔ ya, ŋgɔ-njekinjanéməs to gə́ yeḛ bèe ɓa jeḛ j’aw ndée ya, yeḛ gə́ to gə kəmee ləm, gelee godo ləm, won né kára kara wa mée el ləm, yeḛ ɔm na̰’d sad gə njékaiyaje el ləma, yeḛ ur dɔ dara’g pubug ləm tɔ. 27 Ŋgɔ-njékinjanéməsje gə́ neen lé ndɔ dee ndɔ dee d’inja nékinjanéməsje mba kuga ne kaiya lə dee-deḛ nja kédé ɓa ka̰ koso-dəwje lé ɓəi. Nɛ kea̰-yeḛ lé to togə́bè el. Mbata yeḛ ya̰ rəa ar yoo tel ne nékoga-kaiya lə dəwje gɔl kára ba kiao gə́ ŋgaŋgee . 28 Tɔgərɔ ya, godndu lé ɔr dəwje gə́ to gə́ njérəmje ɓa unda dee gə ŋgɔ-njékinjanéməsje, nɛ ta manrɔ gə́ orè goo godndu lé yee ɓa ɔr Ŋgon gə́ maji péd-péd lé undá gə́ njekinjanéməs saar-saar gə no̰.
© Ngambai Bible © Alliance Biblique du Tchad 1989, 2015.
