No̰ ndòo lə Moabje
1 Ndərta gə́ pa wɔji dɔ Moabje.
Mee til gə́ kára gə́ ɓee-boo gə́ Ar-Moab tuji pugudu-pugudu lé
Yee sané pá ləm,
Mee til gə́ kára lé ɓee-boo gə́ Kir-Moab tuji pugudu-pugudu lé
Yee sané pá ləm tɔ .
2 D’aw mee kəi-pole-magə gə́ to Dibo̰
Dɔ looje gə́ ndəw’g gə mba no̰ keneŋ,
Moabje no̰ tuma̰ ŋgururu-ŋgururu
Mbata lə ɓee gə́ Nebo ləm,
Gə mbata lə ɓee gə́ Médeba ləm tɔ,
Deḛ ndisa dɔ deḛ lai ŋgori-ŋgori ləm,
Deḛ tḭja mbaita dee bur-bur ləm tɔ.
3 Kila-rəwje ləa lai lé d’ula kubu-kwa-ndòo rɔ dee’g ɓa d’aw ne keneŋ,
Nana kara no̰ tuma̰ ŋgururu-ŋgururu
Gə mán-no̰ kəmee’g
Dɔ kəije’g ləm, gə ndaa-looje’g ləm tɔ.
4 Njé gə́ Esbon gə njé gə́ Eləalé ra né wəl
Ar dee d’oo ndu dee saar teḛ Jahas,
Bao-rɔje gə́ Moab kara no̰ tuma̰ ŋgururu-ŋgururu
Ar ɓəl ɔr siŋga dee ho̰d-ho̰d.
5 M’tuma̰ məəm’g ŋgururu-ŋgururu mbata lə Moabje,
Mbata njéteḛ-ta rɔ’g pəd-pədje d’ḭ keneŋ
D’aw njal teḛ Soar ləm,
Saar teḛ Eglat-Selisija ləm tɔ,
Mbata deḛ no̰ ta-ta d’un rəw
Gə́ ḭ dən gə́ Luhit ləm,
D’ɔr ndu dee no̰ wəl gə nékəmndoo
Rəw gə́ aw Koronayim ləm tɔ.
6 Mbata manje gə́ Nimrim lé
D’yi tə-tə ləm,
Mu tudu kurum-kurum
Ar mu gə́ təb gə́ idi lururu kara tuji pugudu ləm tɔ.
Né gə́ to təb kára kara godo.
7 Gelee gə́ nee ɓa deḛ mbo̰ ne ges néje lə dee gə́ nai ləm,
D’odo ne némajije lə dee d’aw ne kel tura-baa gə́ nu
Loo gə́ kag-tuŋguje d’uba ta’g ləm tɔ.
8 Mbata ndu no̰je lé gugu dɔ rəw-nim-ɓeeje gə́ Moab sub,
Ndu no̰ sii mbigi-mbigi lə dee ɓar saar teḛ Eglayim ləm,
Ndu no̰ sii mbigi-mbigi lə dee ɓar saar teḛ Beer-Elim ləm tɔ.
9 Manje gə́ Dimo̰ lé məs taa pəl-pəl ləm,
M’a kula gə nékəmndooje gə́ sigi dɔ Dimo̰’g ləma,
M’a kula gə toboḭ karee twa Moabje gə́ nai
Ges dee gə́ nai mee ɓee’g lé ləm tɔ.
© Ngambai Bible © Alliance Biblique du Tchad 1989, 2015.
