Magəje lə Babilɔnje tuji
1 Magə-Bel gə magə-Nebo toso,
D’odo néndajije gə́ wɔji dɔ dee d’ɔm dɔ da-kulje’g
Ar dee tel to nékodo gə́ wɔi
Dɔ da-kulje’g neelé ar dee dao ne!
2 Magəje neelé siŋga dee as el ar dee toso,
Deḛ d’askəm kaa dɔ néndajije gə́ wɔji dɔ dee lé el
Ndá deḛ nja kara d’aw sə dee na̰’d ɓee-ɓər’g tɔ.
3 Tugaje mbi sí gə́ rɔm’g nee,
Seḭ gel-bɔje lə Jakob
Gə seḭ ges gel-bɔje lə Israɛl gə́ nai,
Seḭ gə́ ma m’ŋgəm sí
Un kudee mee ndəa gə́ seḭ naije ne meḛ ko̰ síje’g saar ləm,
Ma m’odo sí
Un kudee ndɔ koji sí’g ya saar ɓasinè ləm tɔ!
4 Saar teḛ ne dɔ ɓuga sí’g kara
Ma m’to togə́bè ya ləm,
Saar teḛ dɔ dɔ sí gə́ pudu’g lé kara
M’a gəd sí ya ləm tɔ.
Ma m’odo sí tɔɓəi m’a tel gə mba kodo sí ya ɓəi ləm,
M’a gəd sí kaji sí ne ya ɓəi ləm tɔ.
5 See na̰ ɓa seḭ a kasje kəm kwáje kwɔjimje ne kaareeje as səm wa.
See na̰ ɓa a kamje m’to tana səa kar síjeḛ səa n’taje gə na̰ pai-pai wa.
6 Deḛ tɔr larlɔr gə́ mee ɓɔlje’g lə dee,
Deḛ d’wɔji larnda gə nékwɔjee tɔ.
Deḛ d’uga ne dɔ ji njelḛ̀ né
Gə mba karee rəa gə́ magə.
Deḛ d’unda barmba nea̰’g d’wa meḛ dee’g.
7 Deḛ d’unee d’unda dɔ tam dee’g ləm,
D’aw d’uree loo-kaaree’g d’aree to keneŋ ləm tɔ.
Yee ɔd aw raŋg el,
Deḛ ra né wəl gə́ rəa’g
Nɛ yee ila dee keneŋ el ləm,
Yee aji dəw dan néurti’g ləa el ləm tɔ.
8 Arje meḛ sí olé dɔ néje’g neelé ndá
Waje rɔ sí gə́ diŋgam!
Seḭ kaiya-dəwje lé
La̰jije tor ta neelé meḛ sí’g.
9 Arje meḛ sí olé dɔ néje gə́ dəs’g
Mee ndəaje gə́ ləw’g lé
Mbata ma m’to Ala
Ɓó yeḛ gə́ njekorè dɔm-ma’g godo,
Ma m’to Ala
Ɓó yeḛ gə́ njetana səm kára kara godo ya saar.
10 Néje gə́ d’a gə ree lé
M’pa taree kédé gə́ dɔtar,
Néje gə́ teḛ el ɓəi kara
Ma m’pa ləw ba tɔ.
Ma m’pana:
Néje gə́ m’wɔji lé
D’a to njaŋg gə no̰ ləm,
M’a kar torndumje lai d’aw lée’g béréré ya ləm tɔ.
11 To ma ɓa m’ɓar yel gə́ njesɔ mareeje
M’aree ḭ bər ree ləm,
Ma m’ɓar dəw gə́ njekar néje gə́ m’wɔji-kwɔji ra lé d’aw lée’g béréré lé
M’aree ḭ dɔ naŋg gə́ əw’g ree ləm tɔ.
Ma m’pa taree ndá
M’a karee aw lée’g béréré ya ləm,
Ma m’wɔji njaŋg ndá
M’a ra née ya ləm tɔ.
12 Ooje ta ləm,
Seḭ dəwje gə́ njémeekədərəje
Gə́ toje njéba̰je lə néra gə́ danasur!
13 M’ar néra gə́ gə dɔ najee ləm ree
M’aree to mbɔr sí’g dəb ɓó to əw el,
Kaji ləm kara a tila gə́ tila el tɔ.
M’a kar kaji to mee ɓee gə́ Sio̰’g ləm,
M’a kar rɔnduba ləm ɔm dɔ Israɛlje’g ləm tɔ.
© Ngambai Bible © Alliance Biblique du Tchad 1989, 2015.
