Esai unda rəa gə kəmee mba ra kula tegginta
1 Mee ləb kwəi’g lə mbai Ojias lé, ma m’oo Mbaidɔmbaije gə́ si dɔ kalimbai gə́ to tar sab, ar ta kubu ləa gə́ ŋgal yududu taa loo mee kəi-Ala’g pəl-pəl . 2 Kuraje gə́ dara gə́ njérɔndɔḭje d’aar dəa’g, deḛ lai lé bag dee misa̰-misa̰, bag dee gə́ joo lé d’o̰ ne kəm dee ləm, njé gə́ joo gə́ raŋg lé d’o̰ ne gɔl dee ləma, njé gə́ joo gə́ raŋg lé wɔji dɔ kḭ ne tar lə dee ləm tɔ. 3 Deḛ ra né wəl-wəl d’ula ne na̰ ta gə́ yo gə́ nee pana:
Njerɔkunda gə kəmee, njerɔkunda gə kəmee, njerɔkunda gə kəmee
Njesigənea̰ gə́ njeboo-néje!
Rɔnduba ləa taa naŋg nee pəl-pəl .
4 Gə goo ndu deḛ gə́ ɓar wəl lé gin tarəwkəije yə ləm, sa pər udu mee kəi rəd-rəd ləm tɔ . 5 Yen ŋga m’ula m’pana: Meeko̰ oso dɔm’g! Ma m’tuji mba̰ mbata m’to dəw gə́ tapam majel ləm, m’isi mbuna dəwje gə́ tapa dee majel’g ləm tɔ. Nɛ kəm oo Mbai gə́ to Njesigənea̰ gə́ njeboo-néje ya.
6 Nɛ kura gə́ dara gə́ njerɔndɔḭ kára mbuna mareeje’g ḭ ree rɔm’g. Yeḛ wa kɔr pər gə́ taa gəgəgə gə́ yeḛ un gə ŋgon kɔgəlɔ dɔ loo-nékinjaməs’g 7 ndá yeḛ ɔs ne tam tèm pana:
Né neelé n’ɔs ne tam
Ndá n’ɔr ne némajel ləm ləm,
N’ɔr ne kaiya ləm ləm tɔ.
8 M’oo ndu Mbaidɔmbaije gə́ pana:
See na̰ ɓa n’a kulá karee aw mbata lə neḛje wa.
Ma m’ilá keneŋ m’pana:
Yḛ̀ m’aar nee, ulam am m’aw.
9 Yen ŋga yeḛ pana:
Maji kam m’aw ndá m’ula koso-dəwje neelé m’pana:
Seḭ a kooje gə mbi sí ya
Nɛ a ɓar mbi sí’d gə́ ɓar
Ɓó a gərje ginee el ləm,
Seḭ a kooje gə kəm sí ya
Nɛ a kaaje gə́ kaa mbə̰ ləm tɔ .
10 Ar meḛ koso-dəwje neelé ndər ləm,
Ar mbi dee udu ləma,
Ar kəm dee libi ləm tɔ,
Ɓa nà d’a koo gə kəm dee gə mbi dee ləm,
D’a kḛji meḛ dee’g gər ginee ləma,
D’a kɔs badm tel kar neḛ n’aji dee ləm tɔ.
11 Ma m’dəjee m’pana:
See a to bèe saar ndɔ gə́ ra wa.
Ndá yeḛ ilam’g pana:
Saar kar ɓee-booje neelé tuji pugudu
Kar dee tel to nduba piu-piu,
Saar kar dəw kára kara nai mee kəi’g el
Gə mba kar ɓee neelé tel to nduba.
12 Saar kar Njesigənea̰ unda ne dəwje ɓad
Kar ɓee lé tel to ne dɔ nduba gə́ tad rəg-rəg.
13 Ɓó lé ges njéɓeeje gə́ kudu dɔg nai loo kára
Ndá d’a tel tuji pugudu.
Nɛ to gə́ tuga ne kag-terebḭtə gə kag-sɛnə
D’ar dɔ jigi dee nai lé
Ginka gə́ to gə kəmee kara
A kḭ gin koso-dəwje’g neelé tɔ.
© Ngambai Bible © Alliance Biblique du Tchad 1989, 2015.
