Tel gɔl Jerusalem gogo
1 I ɓee-boo gə́ Jerusalem lé ḭta!
Ar ndogó ləi nduba rəa
Mbata lookàr ləi ree ləm,
Rɔnduba lə Njesigənea̰ ndogó dɔi’g ləm tɔ.
2 Aa ooje, loondul dəb rigim dɔ naŋg nee ləm,
Loo gə́ ndul njudu-njudu dəb dɔ koso-dəwje’g ləm tɔ,
Nɛ i lé lookàr lə Njesigənea̰ nduba dɔi’g ləm,
Rɔnduba ləa ndogó dɔi’g ləm tɔ.
3 Ginkoji dəwje gə raŋg d’a njaa
Goo néndogó’g ləi ləm,
Mbaije kara d’a njaa
Goo lookàr’g ləi ləm tɔ.
4 Un kəmi aa ne looje gə́ gugu dɔi sub oo,
Deḛ lai mbo̰ na̰ ree gə́ rɔi’g,
Ŋganije gə́ diŋgam d’ḭ loo gə́ əw’g ree ləm,
Ŋganije gə́ dené kara d’odo dee kag ji dee’g ləm tɔ.
5 Loo gə́ i oo njai-njai ndá
Rɔi a leli ləm,
Məəi a gər njai-njai gə kalrɔ ləm tɔ,
Loo gə́ nébaoje d’a kḭ dan baa-boo-kad ree rɔi’g ləm,
Loo gə́ nébaoje lə ginkoji dəwje gə raŋg d’a ree rɔi’g ləm tɔ.
6 Koso-jambalje gə́ bula digi-digi lé
D’a taa ɓee ləi pəl-pəl
Gə jambalje gə́ Madian gə Epa,
D’a kḭ Seba ɓa ree,
D’a kodo larlɔr gə néje gə́ ə̰də sululu ləm,
D’a pidi ne Njesigənea̰ dɔ néreaje’g ləm tɔ.
7 Koso-nékulje lə njé gə́ Kedar
D’a mbo̰ na̰ rɔi’g,
Bàl badje lə njé gə́ Nebajot
D’a to néra kula ləi,
D’a kaw sə dee dɔ loo-nékinjaməs’g ləm ndá
D’a taa kəm rəgm ləm,
M’a kula rɔnduba dɔ kəi rɔnduba’g ləm ləm tɔ.
8 Deḛje nee gə́ d’ḭ to gə́ kil-lə-ndi bèe ləm,
To gə́ dərndaje gə́ d’ḭ d’aw gə́ kəi-kul dee’g ləm tɔ lé
See to na̰je wa.
9 Mbata dɔgoré-looje d’unda meḛ dee yel dɔm’g ləm,
Batoje gə́ Tarsis ɓa to gə́ ŋgaw ta deeje
Gə mba kaw kodo ŋganije gə́ loo gə́ əw’g ree sə dee
Gə larnda gə larlɔr lə dee ləm tɔ
Gə mbata ri Njesigənea̰, Ala ləi,
Yeḛ gə́ to Njerɔkunda lə Israɛlje gə́ ula rɔnduba dɔi’g lé.Bato (60.9)
10 Dəw-dɔ-ɓeeje d’a gɔl ndògo-bɔrɔ ləi gogo ləm,
Mbaije lə dee d’a tel to kuraje ləi ləm tɔ,
Mbata loo gə́ oŋg ram lé ɓa m’kundai ya
Nɛ gə goo meekoso lemsé ləm lé
M’tel m’oo ne kəmtondoo ləi.
11 Tarəwkɔgje ləi d’a to tag bə̰dəŋ ya
Ɓó d’a kudu dan kàrá əsé loondul’g el
Gə mba kya̰ loo kar ginkoji dəwje gə raŋg
Ree gə nébaoje lə dee mee kəi’g ləi ləm,
Kar mbaije lə dee gə njé’g lə dee d’a ree ne ləm tɔ .
12 Mbata ginkoji dəwje gə́ rara gə ɓeeko̰ gə́ rara gə́ a ra né kari el ndá a tuji ləm, ginkoji dəwje gə raŋg neelé d’a tuji dee pugudu-pugudu kar dee godo ləm tɔ.
13 D’a ree gə nérɔnduba gə́ Liba̰ mee ɓee’g ləi,
Yee ɓa to kag-siprɛs gə ɗəŋgərə gə warəm gə́ d’a ree ne na̰’d
Gə mba ɗɔi ne loo ləm gə́ to gə kəmee,
M’a kula ne rɔnduba dɔ loo-tura-gɔl-kɔm’g tɔ.
14 Ŋgalə njékula kəmi ndooje lé
D’a ree kula dɔ dee naŋg nɔḭ’g ləm,
Deḛ lai gə́ d’ḛjii bəḭ-bəḭ lé
D’a ree kunda barmba gin gɔli’g ləm tɔ.
D’a ɓari ɓee-boo lə Njesigənea̰,
Sio̰ lə Njerɔkunda lə Israɛlje .
15 Mee loo gə́ d’ubai keneŋ d’ya̰’i ləm,
Gə d’ḛjii bəḭ-bəḭ keneŋ ləm tɔ
Ar dəw kára kara teḛ rɔi’g el lé
M’a kari to néra-rɔ gə́ ndɔḭ saar gə no̰ ləm,
M’a kari to gə́ nérɔlel lə ŋgaka dəwje gə́ kédé-kédé ləm tɔ.
16 I a taa némajije lə ginkoji dəwje gə raŋg
To gə́ ŋgon il ne mbà kea̰je bèe ləm,
I a taa ka̰ mbaije kara togə́bè ləm tɔ.
Bèe ɓa i a gər ne to gə́ ma m’to Njesigənea̰
Gə́ to njekajii ləm, gə njekoga dɔi
Gə́ to njesiŋgamoŋ lə Jakob ləm tɔ.
17 M’a kar dee ree gə larlɔr
Taa ne tor larkas ləm,
M’a kar dee ree gə larnda
Taa ne tor larndul ləm,
M’a kar larkas
Taa tor kag ləma,
M’a kar larndul
Taa tor kɔr mbal ləm tɔ.
M’a kar meekulɔm o̰ ɓee dɔi’g ləm,
M’a kar néra gə́ gə dɔ najee o̰ ɓee dɔi’g ləm tɔ.
18 Dəw a koo ta néra gə́ kərm-kərm mee ɓee’g ləi el ŋga ləm,
D’a koo ta tuji gə tuji-boo dɔ naŋg’d ləi el ŋga ləm tɔ,
I a kunda ri kaji dɔ ndògo-bɔrɔje’g ləi ləm,
A kunda ri rɔnduba dɔ tarəwkɔgje’g ləi ləm tɔ.
19 Kàr ɓa a to néndogó ləi dan kàrá el ləm,
Naḭ ɓa a kar loo àr ŋgad-ŋgad dɔi’g loondul’g el ləm tɔ,
Nɛ Njesigənea̰ ɓa a to lookàr ləi saar-saar gə no̰ ləm,
Ala ləi ɓa a to gə́ nérɔnduba ləi ləm tɔ .
20 Kàr ləi a kur naŋg el ŋga ləm,
Naḭ ləi kara a kwa til el ŋga ləm tɔ.
Mbata Njesigənea̰ ɓa a to lookàr ləi saar-saar gə no̰ ləm,
Ndɔ-kwa-ndòo-yoo ləi a dəs ŋga ləm tɔ.
21 Koso-dəwje ləi lai
D’a to njéra né gə́ gə dɔ najee-je ləm,
D’a kiŋga ɓee lé gə́ ka̰ dee gə no̰ ləm tɔ,
Yee ɓa to barkəmkag gə́ ma ɓa ma̰a ləm,
To kula gə́ jim ɓa ra ləm tɔ
Gə mba karee ula rɔnduba dɔm’g.
22 Yeḛ gə́ lam ba ɓa a tel to koso-dəwje gə́ tɔl-dɔg-dɔg (1.000) ləm,
Yeḛ gə́ gɔ a tel to dəwje gə́ njésiŋgamoŋje ləm tɔ.
Ma Njesigənea̰ m’a kɔs kudu néje neelé
Mee ndəaje gə́ wɔji dɔ dee lé.
© Ngambai Bible © Alliance Biblique du Tchad 1989, 2015.
