1 Koso-dəwje gə́ njaa dan loondul’g lé
D’oo lookàr gə́ boo,
Deḛ gə́ d’isi ɓee gə́ ndul njudu-njudu’g lé
Loo ndogó dɔ dee’g ya .
2 I ar bula lə koso-dəwje ḭ dɔ maree’d gə́ kédé-kédé ləm,
I ar dee boo-rɔlelje ləm tɔ,
Deḛ ra ne rɔlel nɔḭ’g
To gə́ ra ne rɔlel naḭ kinja kó’g bèe ləm,
To gə́ d’al ne rɔ dee loo-kai-na̰ nébanrɔ’g bèe ləm tɔ.
3 Mbata néməməna̰ gə́ wɔi gwɔs dee’g ləm,
Gə kag-tɔs gə́ d’unda ne bargir dee ləma,
Gə ndəi gə́ d’ula ne kəm dee ndòo ləm tɔ lé
I təd dee ne rém-rém to gə́ mee ndəa’g lə Madianje bèe.
4 Mbata markob-rɔje lai gə́ d’aw ne loo-rɔ’g ləm,
Gə kubu-rɔje lai gə́ rogo dan məs’g ləm tɔ lé
D’a kɔm dee pər’d
Kar dee roo dula-dula ya.
5 Mbata d’oji ŋgon d’ar sí ləm,
D’ar sí ŋgon gə́ diŋgam ləm tɔ,
Ko̰ɓee lé a to dɔ tamee’g,
D’a kunda ria lə Njemaji dum ləm,
Gə Njekwɔji ta kəmkàr ləm,
Gə Ala gə́ njesiŋgamoŋ ləm,
Gə Bɔ gə́ Njesigənea̰ ləma,
Gə Mbai gə́ njemeelom ləm tɔ.
6 Ko̰ɓee ləa a kḭ dɔ maree’d gə́ kédé-kédé ləm,
Meelɔm gə́ ka̰ kalimbai lə Dabid
Gə ka̰ ɓeeko̰ ləa lé rudee a kun ɗiao el ləm tɔ.
Néra gə́ danasur
Gə né gə́ to gə dɔ najee lé ɓa
D’a karee to ne njaŋg ləm,
D’a gədee ne ləm tɔ
Un kudee ɓasinè saar-saar gə no̰:
Yee ɓa ŋgur né gə́ ra Njesigənea̰ gə́ njeboo-néje lé
A karee ra née ya .
Tɔji ji lə Njesigənea̰ dɔ Israɛlje’g
7 Mbaidɔmbaije ula gə ta ar Jakob,
Ta neelé oso dɔ ŋgaka Israɛlje’g.
8 Koso-dəwje lai d’a gər ləm,
Eprayimje gə deḛ gə́ d’isi Samari ləm tɔ
Deḛ gə́ pata beelé gə kəsta pana:
9 Dərŋgelje toso
Nɛ n’a kundaje kəi gə kɔr mbalje gə́ tɔl dee.
Deḛ tuga kag-ɓɔlje
Nɛ n’a taaje tor dee gə kag-sɛdrəje.
10 Yen ŋga Njesigənea̰ a kar njéba̰je lə Resin d’ḭ sə dee ləm,
Yeḛ a kɔs kudu njéba̰je lə dee ɓɔḭ-ɓɔḭ.
11 Deḛ Aramje gə́ par gə́ bər ləm,
Gə Pilistije gə́ par gə́ dɔ-gó ləm tɔ,
D’a teḛ ta dee hagaga
Gaŋ ne Israɛlje mbidi-mbidi.
Nɛ lé bèe kara oŋg ləa wəi bèm el ləm,
Jia wɔi dɔ dee’g ndiŋ-ndiŋ ɓəi ləm tɔ.
12 Nɛ Koso-dəwje neelé
Tel ree rɔ yeḛ gə́ unda dee’g lé el ləm,
Deḛ tel ndolè goo Njesigənea̰
Gə́ to Ala gə́ njeboo-néje lé el ləm tɔ.
13 Bèe ɓa, mee ndɔ gə́ kára ba ya
Njesigənea̰ a gaŋg dɔ Israɛlje gə ɓoŋ dee ləm,
A gaŋg barkəm kag-tumbur gə twatɔg ləm tɔ.
14 (Ŋgatɔgje gə njekoogootaje ɓa to gə́ dɔ Israɛlje ləm,
Njetegginta gə́ ndoo dəwje taŋgɔm lé ɓa to gə́ ɓoŋ dee ləm tɔ.)
15 Deḛ gə́ d’ɔr no̰ koso-dəwje neelé
D’ar dee ndəm ləm,
Deḛ gə́ d’ya̰ loo d’ar dee d’ɔr no̰ dee lé
Deḛ ndəm ne rəw ləm tɔ.
16 Gelee gə́ nee ɓa Mbaidɔmbaije a koo loo kal ne rəa rɔ basaje’g lə dee el ləm,
Yeḛ a koo ne kəmtondoo lə ŋganalje gə njékəisiŋgaje lə dee el ləm tɔ,
Mbata deḛ lai to njéhulaije ləm,
Gə njémeeyèrje ləm tɔ,
Ta dəwje lai pata nérɔkulje.
Nɛ lé bèe kara oŋg ləa wəi ne bèm el ləm,
Jia wɔi dɔ dee’g ndiŋ-ndiŋ ɓəi ləm tɔ.
17 Mbata némeeyèrje lé o̰ loo to gə́ pər
Gə́ roo kun-pɔrɔrɔje gə kunje bèe,
Yee taa mee kag-kɔr gə́ ndər lé
Ar sa pər uba keneŋ ŋgɔg-ŋgɔg.
18 Gə goo oŋg lə Njesigənea̰ gə́ njeboo-néje lé ɓa
Pər taa ne ɓee pəl-pəl
Ar koso-dəwje tel to d’as ne na̰
Gə kir gə́ pər o̰ bèe,
Dəw kára kara oo kəmtondoo lə ŋgokea̰ yá̰ ne el.
19 Dəw nar nésɔ gə́ to dɔ jikɔlee’g
Nɛ si gə ɓó ya ɓəi,
Dəw gaŋg nésɔ gə́ to jigelee’g
Nɛ asee el ya ɓəi tɔ,
Nana kara dakas jia-yeḛ ya ɓa sɔ.
20 Manasə d’oma̰ gə Eprayimje ləm,
Eprayimje d’oma̰ gə Manasə ləm tɔ,
Tɔɓəi deḛ joo bɔr d’oma̰ gə Judaje.
Nɛ lé bèe kara oŋg ləa wəi bèm el ləm,
Jia wɔi dɔ dee’g ndiŋ ya ɓəi ləm tɔ.
© Ngambai Bible © Alliance Biblique du Tchad 1989, 2015.
