Ɔmje meḛ sí dɔ nébaoje’g lə sí el
1 Ɓasinè ooje ta nee seḭ bao-nékiŋgaje: No̰je gə mán-no̰ kəm sí’g ləm, tuma̰je ŋgururu-ŋgururu ləm tɔ mbata némeekonje gə́ d’a gə teḛ dɔ sí’g lé. 2 Nébaoje lə sí moré ɗugugu-ɗugugu ləm, kəm-mbə-nda o̰ kubuje lə sí ləm tɔ . 3 Larlɔr lə sí gə larnda lə sí d’wɔməs, məs gə́ wɔ néje lə sí lé a kḭ kila ta dɔ sí’g ləm, a bɔr darɔ sí mbuji-mbuji asəna gə doo-pər bèe ləm tɔ. Seḭ mbo̰je nébaoje lə sí mee ndɔje gə́ to ndɔje gə́ rudu lé. 4 Aa ooje, njékulaje gə́ d’inja kó mee ndɔje’g lə sí gə́ seḭ bəŋgərə deeje nɛ lar kuga ji dee lé ɓaŋgee ɓar yor-yor, ndu kii no̰ lə njékulaje kara oso mbi Mbaidɔmbaije gə́ njeboo-néje gə́ dara lé tɔ . 5 Seḭ sije ga̰daŋ dɔ naŋg nee dan nérɔlel gə́ wɔji dɔ darɔ sí-seḭ ləm, seḭ sije gə meendan ndɔ ndum mburug-mburug lə dəwje ya ləm tɔ. 6 Seḭ gə́ ilaje ta dɔ njemeekarabasur tɔleeje ne, nɛ yeḛ aar keneŋ kərərə-kərərə ɓó ɔs sí rəw el.
Meekila ləm, gə tamaji ləm tɔ
7 Ŋgakɔmje, ilaje meḛ sí dɔ maree’g saar ndɔ ree lə Mbaidɔmbaije. Aa ooje, njendɔ ndɔ lé ila mée po̰ ŋgina ne ndi gə́ doŋgɔr ləm, gə ŋgaŋ ndi gə́ gogo ləm tɔ ɓa mba kiŋga ne dɔ kó gə́ maji gə́ a teḛ mbi ɓəi. 8 Seḭ nja kara ilaje meḛ sí dɔ maree’g ləm, aije meḛ sí sam-sam mbata ndɔ ree lə Mbaidɔmbaije nai ŋgwɔi bèe.
9 Ŋgakɔmje, imje na̰ el mba kar dəw gaŋgta dɔ sí-seḭ’g el tɔ. Aa ooje, njegaŋ-rəwta aar takəi’g pèrèrè mba̰. 10 Ŋgakɔmje, njéteggintaje gə́ pa gə ri Mbaidɔmbaije ləm, d’ai meḛ dee sam-sam dan némeeko̰ gə́ ra dee’g ləm tɔ lé maji kar sí wa deeje wɔjije ne mareeje lə sí. 11 Aa ooje, jeḛ m’pana: Deḛ gə́ d’ai meḛ dee sam-sam dan némeeko̰’g lé a maji dɔ dee’g. Seḭ ooje ta meekai sam-sam lə Jɔb ləm, tɔɓəi seḭ ooje né gə́ Mbaidɔmbaije aree ndɔ gə́ rudee un’g lé ləm tɔ mbata Mbaidɔmbaije lé koo kəmtondoo gə meekɔrjol taa rəa pəl-pəl ya .
12 Ŋgakɔmje, ta gə́ m’pa neelé dum mareeje gə́ kédé: Ubuje rɔ sí gə ri dara el ləm, əsé gə dɔ naŋg nee el ləma, əsé gə né gə́ rara kara el ləm tɔ. Nɛ maji kar sí pajena: Tɔgərɔ ndá tɔgərɔ ya, əsé a paje: Wah! ndá wah tɔ. Togə́bè ɓa seḭ a kosoje ne dan ta’g el . 13 See dəw kára mbuna sí’g sí dan némeeko̰’g wa. Maji karee ra tamaji ta Ala’g. See dəw kára mbuna sí’g sí gə rɔlel wa. Maji karee ɔs pa kula rɔnduba dɔ Ala’g lé. 14 See dəw kára mbuna sí’g oso gə rɔko̰ wa. Maji karee ɓar ŋgatɔgje gə́ d’aa dɔ Eglisə mba kar dee ra tamaji dəa’g ləm, kar dee ndèm ubu dəa’g gə ri Mbaidɔmbaije ləm tɔ . 15 Ndá tamaji gə́ d’a ra gə meekun lé njerɔko̰ a kaji ne ɓa Mbaidɔmbaije a kundá kuree tar, ɓó lé yeḛ ra nékaiyaje ndá a kiŋga mee-ti-mbidi lé tɔ. 16 Tegje gin kaiya lə sí gə́ raga arje na̰ ləm, raje tamaji mbata lə na̰ ləm tɔ mba kar kəm sí tuga ne sib. Tamaji gə́ rara gə́ njemeekarabasur ra gə́ ɓar mḭ ndá to tamaji gə́ mḭ ya. 17 Eli to gar síje gə́ naŋg nee nja tɔ, yeḛ ra mbai ta Ala’g mba kar ndi ər el ndá ndi oso naŋg teŋ el as ləb munda gə naḭ misa̰ . 18 Tɔɓəi yeḛ tel ra tamaji ta Ala’g gɔl kára tɔɓəi ndá mán ndi ḭ dara ər dɔ naŋg nee ləm, ar naŋg kinja ne gə kandə néje ləm tɔ .
19 Ŋgakɔmje, ɓó lé dəw kára mbuna sí’g ɔs rəw kankəmta pad lal ndəm igi wɔrɔg ɓa maree ndolee iŋgá rəm səa lée’g gogo 20 yeḛ kara maji karee gər gao, yeḛ gə́ njekɔr njekaiya rəw ndəm’g lé to njetaa maree ta yoo’g o̰ ne dɔ kaiyaje bula ləm tɔ .
© Ngambai Bible © Alliance Biblique du Tchad 1989, 2015.
