Ndərta gə́ wɔji dɔ Sedesias, mbai gə́ Juda lé
1 Ta gə́ Njesigənea̰ ula Jeremi, loo gə́ mbai Sedesias ula Pasur, ŋgolə Malkija, gə Soponi ŋgolə Maaséja, njekinjanéməs lé rəa’g mba kar dee d’ulá pana: 2 Maji kari dəji Njesigənea̰ ta mbata lə sí mbata Nebukadnesar, mbai gə́ Babilɔn rɔ sə sí. Banelə Njesigənea̰ a ra némɔri ləa kára mba kɔsee ne rəw dɔ sí’g . 3 Jeremi tel ila dee keneŋ pana: Aw ulaje Sedesias pajena: 4 Njesigənea̰, Ala lə Israɛlje pa togə́bè pana: Aa ooje, nérɔje gə́ to ji sí’d gə́ seḭ aw rɔje ne gə mbai gə́ Babilɔn gir ndògo-bɔrɔje’g ləm, gə Kaldeje gə́ d’aḭ dɔ sí sub gə rɔ ləm tɔ lé n’a tel ta dee gə́ dɔ sí-seḭ’g ndá n’a mbo̰ dee dan mee ɓee-boo’g neelé tɔ. 5 Tɔɓəi n’a rɔ sə sí gə ji neḛ gə́ n’ula ndiŋ gə meeko̰, gə meekḭ jugugu, gə oŋg gə́ al dɔ loo sula. 6 N’a kunda njé gə́ mee ɓee-boo’g neelé, dəwje ləm, gə daje ləm tɔ, d’a kwəi yoo-koso gə́ to ɓəl kədm-kədm. 7 Njesigənea̰ pana: Gée’g gogo ndá n’a kuba Sedesias, mbai gə́ Juda, gə kuraje ləa, gə koso-dəwje gə́ teḛ ta yoo-koso’g gə ta kiambas’g, gə ji njéba̰je’g lə dee lé kya̰ dee ji Nebukadnesar, mbai gə́ Babilɔn’g ləm, gə ji njéba̰je’g lə dee ləma, gə ji deḛ gə́ ndigi kar dee d’wəi ləm tɔ. Yen ɓa Nebukadnesar a tɔl dee gə kiambas ɓó yeḛ a kya̰ dee el ləm, a koo kəmtondoo lə dee el ləma, mée a kaw taḭ-taḭ mbata lə dee el ləm tɔ.
8 Njesigənea̰ ula koso-dəwje neelé ta nee togə́bè pana: Aa ooje, neḛ n’unda rəw ka̰ kisi kəmba ləm, gə ka̰ kwəi ləm tɔ no̰ sí’g. 9 Yeḛ gə́ a nai mee ɓee-boo’g neelé ndá a kwəi yoo-kiambas, gə ɓoo-boo əsé yoo-koso. Nɛ yeḛ gə́ a teḛ kaw rɔ Kaldeje gə́ d’aḭ dɔ sí sub gə rɔ lé ndá a si kəmba ləm, si kəmba ləa ɓa a to nébanrɔ ləa ləm tɔ. 10 Mbata neḛ n’orè kəm neḛ sḭ dɔ ɓee-boo’g neelé mba ra səa majel ɓó maji ɓa el, Njesigənea̰ ɓa pa bèe. Ɓee-boo neelé a koso meḛ ji mbai gə́ Babilɔn’g karee rée dula-dula.
11 I a kula njémeekəije lə mbai gə́ Juda pana:
Urje mbi sí ooje ne ta lə Njesigənea̰!
12 Seḭ gel-bɔje lə Dabid!
Njesigənea̰ pa togə́bè pana:
Un kudee gə ndɔ rad saar lé
Maji kar sí gaŋgje rəwta gə́ gə goo rəbee ləm,
Taaje dɔ deḛ gə́ d’ula kəm dee ndòo
Ji njekula kəm loo ndòo’g ləm tɔ.
Nà oŋg-boo lə neḛ a mbudu ko̰
To gə́ pər bèe
Kar dəw gə́ njetɔl pəree godo
Mbata néra meeyèrje lə sí lé.
13 Njesigənea̰ pana:
Aa ooje, seḭ gə́ síje ɓee-boo
Gə́ to kəm wəl-loo’g
Dɔ kɔr mbal gə́ ndag-loo’g lé
Neḛ n’aw sə sí gə ta.
To seḭ gə́ pajena:
See na̰ ɓa a ree koma̰ sə sí wa,
See na̰ ɓa a kandə kaw mee loo-si sí’g wa.
14 Njesigənea̰ pana:
N’a kwɔji sí kəmkàr
Gə goo kandə néra síje,
N’a kila pər mee kag-kɔr’g lə sí
Ndá yee a roo looje lai gə́ gugu dəa.
© Ngambai Bible © Alliance Biblique du Tchad 1989, 2015.
