Ta lə Sopar
1 Sopar, dəw gə́ Naaman un ta pa pana:
2 See boo-taje gə́ i pa yaa̰-yaa̰ neelé loo kila keneŋ a godo wa.
Dəw gə́ njepata kubu pur-pur lé see ta ləa to gə goo rəbee wa.
3 See ta beelé ləi gə́ gə mḭdé ba lé a kar dəwje d’isi mundu wa.
See i a kula sul dɔ loo’g lal kar dəw gə́ raŋg ila rɔkul dɔi’g wa.
4 I pana: Ta ləi to gə goo rəbee
I àr ŋgad-ŋgad kəmi’g.
5 Ǝi, ɓó lé Ala ndigi pata ləm,
Ɓó lé yeḛ teḛ təa gə mba kilai’g ləma,
6 Esé ɓó lé yeḛ riba səi dɔ kəmkàr ləa to gə́ to loo-kiya’g
Gə́ to kəmkàr ləa gə́ dum dɔ loo ləm tɔ
Ndá i a gər to gə́ Ala ra səi gə goo néra kori-kori ləi el.
7 See i askəm kuru mee Ala mba gər takə̰ji ləa
Mba gər ne ndaa Bao-siŋgamoŋ lé njai-njai wa.
8 Négər ləa dəree ḭ gə́ tar unda dara. See ɗi ɓa i a ra wa.
Kuru ləa to yaa̰ unda ɓee lə njé gə́ d’wəi. See ɗi ɓa i a gər wa.
9 Ŋgalee to yaa̰ unda dɔ naŋg nee ləm,
Tadee to yaa̰ unda baa-boo-kad ləm tɔ.
10 Ɓó lé Ala dəs ləm, ɓó lé yeḛ wa dəw ləma,
Ɓó lé yeḛ ɓar dəw loo-gaŋg-rəwta’g ləa ləm tɔ ndá
See na̰ ɓa a kaskəm kɔgee wa.
11 Mbata yeḛ gər dəwje gə́ gə mḭdé ba ləm,
Deḛ gə́ ta wa dɔ dee kara yeḛ gər dee kalaŋ ləm tɔ.
12 Nɛ dəw lé gosonégər ləa gə́ dəa’g to gə́ némbə,
Dəw gə́ darɔ’g lé d’ojee asəna gə ŋgon mbur bèe.
13 Nɛ i lé maji kari tel məəi par gə́ rɔ Ala’g ləi ləm,
Maji kari ula jii ndiŋ gə́ rəa’g gə tamaji ləi ləm tɔ.
14 Maji kari unda rɔi ŋgərəŋ dɔ néra kori-kori’g ləm,
Ya̰ loo ar néra gə́ lal najee to mee kəi’g ləi el ləm tɔ.
15 Yen ɓa i a kɔr ne dɔi tar lal rɔkul ləm,
I a kaar ne kɔgərɔ lal ɓəl ləm tɔ,
16 Mbata məəi a kwəi dɔ némeekonje’g ləi,
Məəi a kolé dɔ’g asəna gə manje gə́ ula dəs bèe.
17 Ndɔje ləi d’a ndogó unda kàr gə́ aar daŋdɔ bèe ləm,
Loondulje ləi lé d’a tel to asəna gə lookàr gə́ gə ndɔ bèe ləm tɔ.
18 I a ndá məəi kaḭ-kaḭ mbata meekundayel ləi to né gə́ gə mḭdé el.
I a kaa looje gə́ gugu dɔi sub ndá i a to naŋg gə meekulɔm.
19 I a to naŋg ndá dəw kára kara a jɔgi el,
Dəwje bula d’a bɔr bèli.
20 Nɛ kəm njémeeyèrje to bibli,
Deḛ lé loo gə́ gə mba kaḭ kiya rɔ dee keneŋ godo.
Yoo ɓa gə́ nékunda mee yel dɔ’g lə dee.
© Ngambai Bible © Alliance Biblique du Tchad 1989, 2015.
