Ta kila’g lə Jɔb
1 Jɔb tel ilá keneŋ pana:
2 Tɔgərɔ ya, d’a pana: Négər gə́ ka̰ dəw gə́ darɔ’g lé to rɔ sí-seḭ’g ya.
To seḭ lé ɓa kəmkàr a kwəi sə sí na̰’d.
3 Ma kara m’isi gə kəmkàr to gə́ seḭ bèe ya to
Ɓó ma m’to ŋgon gə́ goo sí’g el.
See na̰ ɓa gər néje gə́ seḭ paje lé el wa.
4 Ma m’to nékunda-kogo lə baokuraje ləm
Loo gə́ m’dəji Ala karee la səm,
Dəw gə́ njemeekarabasur ləm, gə́ ta wa dəa el ləm tɔ lé to nékunda-kogo ya.
5 Kaa njekəmndoo gə kəm dɔbee lé yee ɓa gə́ né gə́ wa meḛ dee gə́ d’isi dan maji’g,
Dəw gə́ gɔlee unda ndolé lé kḛji bəḭ-bəḭ ɓa wɔji dəa.
6 Meelɔm to mee kəi’g lə njétujilooje ləm,
Si gə́ majee to mbata deḛ gə́ d’unda Ala ɓad ləma,
Mbata dəw gə́ ar siŋgamoŋgee to magə ləa ləm tɔ.
7 Maji kari dəji daje ndá d’a ndooi né ləm,
Dəji yelje ndá d’a riba dəa kari oo ləm tɔ.
8 Maji kari wɔji ta gə naŋg ndá yee a ndooi né ləm,
Ka̰jije gə́ dan baa-boo’g kara d’a kɔr soree kari oo ləm tɔ.
9 Mbuna dee-deḛ’g lai neelé see na̰ ɓa a lal gər
To gə́ ji Njesigənea̰ ɓa ra néje lai neelé wa.
10 Yeḛ wa kəmə lə néje lai gə́ d’aw kəmba lé jia’g ləm,
Kəmə lə dəwje lai kara to jia’g ləm tɔ.
11 See mbi dəw unda ta gə kəmee-kəmee
To gə́ ndəa̰ naa ne lel lə nésɔje el wa.
12 Meḛ ɓugaje lé kəmkàr to keneŋ ləm,
Gosɔnégər to rɔ dəw gə́ ləbee to yaa̰’g ləm tɔ.
13 Mee Ala to loo-si kəmkàr gə siŋgamoŋ,
Kwɔjita kəmkàr gə gosonégər to kea̰.
14 Né gə́ yeḛ tuji lé dəw askəm tel gɔl gogo el,
Dəw gə́ yeḛ udee kəi kara njekɔree godo tɔ.
15 Ɓó lé yeḛ ɔg mán ndi kər ndá loo tudu kurum-kurum,
Ɓó lé yeḛ ya̰ loo aree ər ndá mán taa loo yəŋgəm-yəŋgəm tɔ.
16 Siŋgamoŋ gə kunda kəmkàr dɔ rɔ’g to kea̰,
Yeḛ gə́ ndəm rəw əsé ar mareeje ndəm rəw kara yeḛ dum dɔ dee joo bɔr.
17 Yeḛ aw gə njékəmkàrje ɓee-ɓər’g ləm,
Yeḛ ar takə̰ji lə njégaŋ-rəwtaje tel to ta mbə ləm tɔ.
18 Yeḛ tudu gagəra reŋ mbaije’g
Ndá tel tɔ kúla ɓər ɓa reŋ dee’g.
19 Yeḛ aw gə njékinjanéməsje ɓee-ɓər’g ləm,
Yeḛ ar njésiŋgamoŋje d’oso ləm tɔ.
20 Yeḛ ɔr ta ta deḛ gə́ gər loo pata yororo-yororo’g ləm,
Yeḛ ɔr kɔrkəmta meḛ ɓugaje’g ho̰d ləm tɔ.
21 Yeḛ ula sul dɔ dəwje gə́ boo’g ləm,
Yeḛ tudu gagəra reŋ njésiŋgamoŋje’g ləm tɔ.
22 Né gə́ iya rəa loondul’g lé yeḛ riba dəa pərəg gə́ raga ləm,
Yeḛ ar ndil yoo gə́ dəb rigim lé to raga ndəgəsə ləm tɔ.
23 Yeḛ ar riɓar lə ginkoji dəwje gə raŋg ḭ dɔ maree’d gə́ kédé-kédé ləm,
Yeḛ tel rəm gə riɓar lə dee gogo ləm tɔ.
24 Yeḛ tuji négər lə mbaije lə koso-dəwje ləm,
Yeḛ ar dee d’ila mbir-mbir dɔdilaloo’g lal rəw-kaw dee ləm tɔ.
25 Deḛ mam loo bab-bab dan loondul’g ɓó d’oo loo njai el,
Yeḛ ar dee d’ila mbir-mbir to gə́ dəwje gə́ kido ra dee bèe.
© Ngambai Bible © Alliance Biblique du Tchad 1989, 2015.
