Ndur ta kəmkàr
1 Larnda lé bwa gə́ ka̰ kɔr keneŋ to gən ləm,
Larlɔr lé kara loo tɔgee karee àr ŋgad-ŋgad to gən ləm tɔ.
2 Larndul lé d’ɔree gel naŋg’d ləm,
Kɔr mbal lé d’aree léḛ ɓa tel to larkas ɓəi ləm tɔ.
3 Loondul gə́ ndul njudu-njudu lé dəw telee gə́ lookàr ləm,
Yeḛ tən loo njal teḛ ne loo gə́ uru’g
Saŋg ne kɔri mbalje gə́ d’iya rɔ dee loo gə́ ndul njudu-njudu’g ləm,
Gə loo gə́ to rigim’g ləm tɔ.
4 Yeḛ uru bwa loo gə́ əw gə́ dəwje d’isi keneŋ el,
Gɔlee askəm la səa keneŋ el tɔ,
Deḛ d’ar dəw si rḭgi-kúla naa̰ jərəŋ loo gə́ dəwje godo keneŋ.
5 Naŋg gə́ muru ḭ keneŋ lé
Gelee gə́ uru gə́ naŋg tuji to gə́ pər ɓa roo bèe.
6 Kɔr mbalje ləa lé jər gə́ ɓaree sapir to keneŋ ləm,
D’iŋga nduji larlɔr keneŋ ləm tɔ.
7 Yel gə́ njesɔ mareeje gər kila rəbee el ləm,
Kəm mal kara oso dɔ’g el ləm tɔ.
8 Daje gə́ mḭ d’ur dɔ mar deeje’g lai lé njaa keneŋ el ləm,
Toboḭ kara dəs lée’g neelé el saar ləm tɔ.
9 Dəw un jia ɔrɔ ne rɔ kɔr mbal gə́ kədərə,
Yeḛ ɔs mbalje gə ŋgira dee bura ɓugu dee.
10 Yeḛ sɔi rəwje mee mbalje’g,
Kəmee as koo néje gə́ gad dee uru kugu keneŋ ya.
11 Yeḛ udu kəm-rəw-kula lə mán jigi-jigi,
Né gə́ iya rəa lé yeḛ a ree ne dan lookàr’g raga ndəgəsə.
12 Nɛ kəmkàr lé see iŋga loo gə́ ra wa.
Esé gosonégər lé see si ra wa.
13 Dəw lé askəm gər gadee el ləm,
Dəw a kiŋga dɔ naŋg lə njésikəmbaje el ləm tɔ.
14 Ɓul mán pana: Yee godo mee neḛ’g ləm,
Baa-boo-kad pana: yee godo rɔ neḛ’g ləm tɔ.
15 Dəw askəm kiŋga gə larlɔr gə́ àr ŋgad-ŋgad el ləm,
Dəw a kwɔji kwɔi lə larnda ndogo ne el ləm tɔ.
16 Dəw askəm kwɔjee gə larlɔr gə́ Opir el ləm,
Esé gə jər gə́ ɓaree Onikis gə́ gadee to yaa̰ el ləma, əsé gə jər sapir el ləm tɔ.
17 Yee lé dəw as kunee kwɔji ne larlɔr əsé né gə́ ɓaree ber el ləm,
Esé dəw askəm kun mbél ne jo larlɔr gə́ àr ŋgad-ŋgad el ləm tɔ.
18 Kag gə́ gel mán’d gə́ ɓaree korail ləm,
Gə jər gə́ ndɔḭ wər-wər gə́ ɓaree kristal ləm tɔ lé
To néje gə́ kari ba mbɔree’g ləm
Kəmkàr lé gadee to yaa̰ ur dɔ mər mbaije’g ləm tɔ.
19 Jer gə́ Etiopi gə́ ria lə topaj lé gadee as səa el ləm,
Larlɔr gə́ àr ŋgad-ŋgad kara kwɔi ləa as səa el ləm tɔ.
20 Ŋga see loo gə́ ra ɓa kəmkàr ḭ keneŋ wa.
See loo gə́ ra ɓa gosonégər lé si keneŋ wa.
21 Yee iya rəa kəm dəwje’g lai gə́ d’isi kəmba ləm,
Yee iya rəa kəm yelje’g lai gə́ d’aw pə̰ dara’g ləm tɔ.
22 Bwa-wəl gə́ suna godo gə yoo pa pana:
N’ooje ta ləa gə mbi neḛje ya.
23 To Ala ya kára ba ɓa gər rəbee ləm,
Yeḛ nja kára ba gər loo-siée ləm tɔ.
24 Mbata yeḛ nja oo loo ɔr gwɔi naŋg nee njal ləm,
Yeḛ oo néje lai gə́ to gel dara’g ləm tɔ.
25 Loo gə́ yeḛ wɔji kwɔi lə lel lé
Ndá yeḛ wɔji ŋgaŋ mán ləm tɔ.
26 Loo gə́ yeḛ un godndiaje ar ndi lé
Ndá yeḛ wɔji rəw tèl ləa ləm, gə ndaŋg ləa ləm tɔ.
27 Yen ɓa yeḛ oo kəmkàr ndá yeḛ riba dəa pərəg gə́ raga,
Yeḛ tum gin kəmkàr ləm, yeḛ neán ləm tɔ.
28 Tɔɓəi yeḛ ula dəw pana:
Aa oo, ɓəl Mbaidɔmbaije ɓa to kəmkàr,
Kunda rɔi ɓad dɔ néra gə́ majel’g ɓa gə́ gosonégər tɔ .
© Ngambai Bible © Alliance Biblique du Tchad 1989, 2015.
