1 See i gər kàr gə́ bya̰je gə́ wala d’oji ne ŋgan deeje wa.
See loo gə́ arkasje d’aar d’oji ŋgan deeje lé i aa dee gərərə wa.
2 See i tura naḭje gə́ dee d’aw ne gə kèm ləm,
Gə ndɔje gə́ dee d’oji ne ŋgan deeje ləm tɔ wa.
3 Dee rugu dun dee ŋguji ɓa d’oji ne ŋgan deeje,
Yee ɓa gel ndóo gə́ ra dee lé gaŋg ne.
4 Ŋgan deeje lé siŋga dee ḭ dɔ maree’d gə́ kédé-kédé ləm,
Dee ra tɔg pir-pir mee wala’g ləma,
Dee d’aw par-par tel ree rɔ dee’g el ləm tɔ
5 See na̰ ɓa ar mburje aw to gə́ mée ndigi ləm,
Gə tudu kúla rəa’g ilá tar ləm tɔ wa.
6 Ma nja m’ar dɔdilaloo ɓa to gə́ loo-karee ləm,
M’ar dɔ naŋg-kad ɓa to gə́ loo-karee ləm tɔ.
7 Yee kogo dɔ kunda bula’g lə koso-dəwje gə́ mee ɓee-boo’g ləm,
Yee oo ndu ɓéeje gə́ ɓar wəl el ləm tɔ.
8 Yee aiŋgwɔd dɔ mbalje’g mba saŋg nésɔ ləa,
Yee saŋg néje lai gə́ to təb.
9 See dadɔg a ndigi ra kula kari wa.
See a kaar mbɔr bəgərə-sɔ-né’g lə maŋgje ləi loondul’g wa.
10 See i a kwá gə kúla karee un ɓai wa.
See yee a njaa goi’g mba tɔ kɔr-naŋgje gə́ kəm-wolje’g wa.
11 See i a kɔm məəi dəa’g mbata siŋgá gə́ to yaa̰ wa.
See i a kyá̰ karee ra kula ləi gə dɔrea wa.
12 See i a kɔm məəi dəa’g karee ree gə kó ləi kəi kari wa.
See yee nja a mbo̰ kó kɔm dɔ na̰’d loo-kunda-kó’g ləi wa.
13 Miru naji bagee gə rɔlel,
Deḛ d’oo bagee asəna gə lum ndilili bèe.
14 Nɛ miru uba kabee ya̰ naŋg,
Yee ar babur ɓa kabeeje lé nuŋga ne.
15 Yee ar mée wəi dɔ gɔl dəw gə́ askəm kuba dee tɔ dee ləm,
Gə da gə́ wala gə́ askəm njaa dɔ dee’g ləm tɔ.
16 Yee ra kədərə gə ŋganeeje to gə́ lə dee to kea̰je el bèe,
Kula rəa ndubu dɔ kabee’g lé yee oo gə́ né el
17 Mbata Ala ɔgee kəmkàr ləm,
Yeḛ kai gosonégər aree gə́ kea̰ el ləm tɔ.
18 Loo gə́ yee ḭ gə́ mba kaiŋgwɔd lé
Ndá yee kogo dɔ kunda dee gə njekalee’g.
19 See i ɓa ar kunda siŋgá ləm,
Gə ar wolé uba gwɔbee’g ḭ pu-pu ləm tɔ wa.
20 See i aree tal to gə́ beedéje bèe wa.
Ndil ləa ɔm ɓəl-boo dɔ loo’g.
21 Yee tuga naŋg pugudu-pugudu al rəa gə siŋgamoŋgee ləm,
Yee al uru kédé no̰ nérɔje’g ləm tɔ.
22 Yee kogo dɔ ɓəl’d gə́ kogo ɓó yee unda bala el ləm,
Yee tel giree ila ar kiambas el ləm tɔ.
23 Kaa ku ɓandaŋg ɓar dəa’g kogoro-kogoro ləm,
Nḭga-ndəi gə niŋga-dubu ndɔḭ pəl-pəl rəa’g ləm tɔ.
24 Mal né gə́ o̰ mée lém-lèm lé aree taa ne loo kalaŋ ləm,
Yee askəm kwa ŋgaŋ rəa loo ndu to̰to̰ gə́ ɓar el ləm tɔ.
25 Loo gə́ ndu to̰to̰ ɓar ndá yee pana: J’awje kəm sí kédé,
Loo gə́ rɔ nai əw ɓəi kara yee taa baḭyee pir-pir ləm,
Yee oo ɓé-njérɔje gə baŋga njérɔje gə́ ɓar yi-i-i ləm tɔ.
26 See to gosonégər ləi-i ɓa niŋga ḭ ne
Nar ne bag par gə́ dɔkɔl lé wa.
27 See gə goo torndui ɓa mal ḭ ne ləm,
Ra ne kəi ləa dɔ looje gə́ ndəw’g lé ləm tɔ wa.
28 Mbuna mbalje ɓa to loo-siée ləm, yee to keneŋ
Dɔ kɔr mbalje gə dɔ sèm mbalje gə́ ŋgal ləm tɔ.
29 Lée neelé ɓa yee si keneŋ tən nékwa ləa ləm,
Yee si əw ya kəmee ée gərərə ləm tɔ.
30 Ŋganeeje d’ai məs,
Loo gə́ nin to keneŋ ndá lé neelé i a kée keneŋ tɔ .
© Ngambai Bible © Alliance Biblique du Tchad 1989, 2015.
