1 Aa oo, məəi gə́ i unda yel gə́ mba kwá ne lé to né gə́ kari ba,
Koo gə́ i ée lé see i rəm gə gooi oso gaŋnda el wa.
2 Dəw kára kara askəm kɔs gel oŋg ləa el,
Ŋga see na̰ ɓa askəm kaar nɔm’g kɔsm rəw wa.
3 See na̰ ɓa un né am unda ne ɓaŋg dɔm’g mba kam m’uga wa.
Néje lai gə́ to gin dara’g lé to kama ya.
4 Ma m’ndigi pata gə́ wɔji dɔ barkəmreaje ya ɓəi ləm,
Gə dɔ siŋgamoŋ ləa ləma, gə dɔ rəa gə́ maji pəd-pəd ləm tɔ.
5 See na̰ ɓa askəm kɔr ndaree rəa’g wa.
See na̰ ɓa askəm kandə ka təa’g wa.
6 See na̰ ɓa askəm kwa təa teḛ wa.
Loo gə́ mbɔr ŋgaŋgee’g lé to ɓəl kədm-kədm.
7 Ŋgwɔiyeeje lé yee ɓa to dər ko̰ rɔ ləa gə́ kədərə yaa̰ ləm, maji dum ləm tɔ,
Ŋgwɔiyeeje wa na̰ məji-məji asəna gə nétorji gə́ tia̰ né’g bèe,
8 Dee tia̰ na̰’d tigi-tigi ɓó
Lel askəm kandə mbuna dee’g el.
9 Dee tia̰ na̰’d tigi-tigi
Ar né kára kara askəm kandə mbuna dee’g el.
10 Loo gə́ yee ur aitiso ndá loo ndogó jol-jol ləm,
Kəmee to asəna gə kṵji kàr gə́ teḛ gə́ ndɔ rad bèe ləm tɔ.
11 Ndo̰ pər teḛ təa’g bilim-bilim
Ar ndɔbee ubu pur-pur tɔ.
12 Saa pər teḛ əmee’g
Asəna gə mán gə́ olé mee jo-muru’g əsé ŋgoro gə́ nuŋga kəd-kəd bèe.
13 Kəmə gə́ teḛ təa’g lé tó ne kɔr pər ləm,
Tea lé ndo̰ pər teḛ keneŋ ləm tɔ.
14 Gwɔbee ɓa to loo siŋgamoŋ ləa,
Né gə́ to ɓəl aw nea̰’d gə́ kédé tɔ.
15 Kɔr rəa ɔs na̰’d ndər tim-tim
Ar siŋgá to yaa̰, loo yə rəa godo.
16 Dɔ ɓəŋgəree kədərə asəna gə mbal bèe,
Kədərə asəna gə mbal kusu né gə́ gel maree’g bèe
17 Loo gə́ yee uba naŋg ḭ tar ndá bao-rɔje ɓəl,
Deḛ d’unda bala tigi-tigi d’aḭ.
18 Loo gə́ dəw rɔ səa gə kiambas ndá a koma səa pi,
Lée niŋga əsé ɓandaŋg əsé ko̰-niŋga dubu kara a ra səa né el.
19 Yee oo larndul gə́ mu ləm,
Yee oo larkas gə́ kag gə́ ndusu ləm tɔ.
20 Kandə ɓandaŋgje gə́ teḛ lé ɔm ɓəl dəa’g aree aḭ el ləm,
Kɔri-ərje gə́ reá ne gə yɔroŋ-dooje lé yee oo gə́ ləm mu ləm tɔ.
21 Ɗuguru-kag lé yee oo gə́ mu ləm,
Kaa niŋga gə́ ɓar gə́ dəa’g kara yee oo gə́ nékogo ləm tɔ.
22 Ta mée lé ndajee to ŋgəŋgəŋgḛ to gə́ kunje bèe ləm,
To asəna gə négɔl dɔ naŋg gə́ təa adə gə́ ndɔr dɔ bɔrɔ’g bèe ləm tɔ.
23 Yee ar kuru lə mán baa-boo olé to gə́ mán gə́ pər’d ləm
Yee telee aree to asəna gə jo gə́ ubu gə́ ə̰də sululu rusu mée tub bèe ləm tɔ.
24 Tor gɔlee gə́ gée’g gogo lé ndɔḭ ləm,
Dɔ ɓul mán gə́ yee uru lé asəna gə yiŋga dɔ dəw gə́ ɓuga bèe ləm tɔ.
25 Dɔ naŋg neelé béeje kára kara godo keneŋ ləm,
D’undá d’aree ɓəl né kára kara el ləm tɔ.
26 Yee oo néti-rɔje gə́ né gə́ kari ba ləm,
Yee to mbai dɔ daje gə́ mḭ lai ləm tɔ.
© Ngambai Bible © Alliance Biblique du Tchad 1989, 2015.
