Kai gə́ deḛ kai na̰ ɓee par gə́ dɔ-gó lə baa gə́ Jurdɛ̰ lé
1 Aa ooje, dɔ naŋg gə́ Israɛlje d’iŋga gə́ né ka̰ dee-deḛ mee ɓee’d gə́ Kana̰ gə goo kai gə́ Eləajar gə́ to njekinjanéməs gə Juje, ŋgolə Nun kaiyee dana d’ar njékaa dɔ gel-bɔje lə ginkoji Israɛlje lé. 2 Deḛ kai nana kara ɓee gə goo nékwɔji lée gə́ to asəna gə téḛ bèe to gə́ Njesigənea̰ un ne ndia ar Moyis mbata lə ginkojije jinaikara ləm, gə ges ginkoji gə́ kára ləm tɔ . 3 Mbata Moyis ar ginkojije gə́ joo gə ges ginkoji gə́ kára lé dɔ naŋg gə́ né ka̰ dee-deḛ kel tura-baa gə́ Jurdɛ̰ gə́ nu mba̰, nɛ Ləbije lé ɓa yeḛ ar dee dɔ naŋg gə́ né ka̰ dee-deḛ mbuna dee’g el tɔ . 4 Ŋgalə Jisəb lé tel to ginkojije gə́ joo gə́ ri dee lə Manasə gə Eprayim. Ləbije lé d’iŋga dɔ naŋg gə́ né ka̰ dee-deḛ mee ɓee’g neelé el, nɛ d’ar dee ɓee-booje mba kar dee d’isi keneŋ ləm, gə looje gə́ gugu dɔ ɓee-booje mbata lə nékulje lə dee gə nékiŋgaje lə dee ləm tɔ. 5 Israɛlje ra né gə goo ndukunje gə́ Njesigənea̰ un ar Moyis ndá deḛ kai na̰ ɓee lé tɔ.
Dɔ naŋg gə́ Ebro̰ ɓa d’ar Kaleb
6 Ŋgalə Juda ree rɔ Josué’g loo-siée’g Gilgal, ndá Kaleb, ŋgolə Jepune gə́ to dəw gə́ Keni lé ulá pana: Ta gə́ Njesigənea̰ ula Moyis gə́ to dəw lə Ala gə́ wɔji dɔm-ma ləm, gə wɔji dɔi-i ləm tɔ loo gə́ j’isi Kades-Barnea lé i gər gao ya . 7 Ləbm aḭ rɔ-sɔ ɓa Moyis, kura lə Njesigənea̰ ulam am m’ḭ Kades-Barnea m’aw tən loo mee ɓee’g ndá m’tel m’ulá taree gə məəm gə́ to goo kára ba bərəŋ lé . 8 Ŋgakɔmje gə́ d’aw səm lé d’ar meḛ dəwje ila kas nɛ ma lé m’ndolè goo Njesigənea̰, Ala ləm gə məəm gə́ kára ba sur. 9 Mee ndəa’g neelé Moyis man rəa pana: Dɔ naŋg gə́ a kila dabla gɔli keneŋ lé a to nédɔji ləi gə no̰ mbata ləi-i ləm gə mbata lə ŋganije ləm tɔ, mbata i ndolè goo Njesigənea̰, Ala ləi gə məəi gə́ kára ba sur ya . 10 Ɓasinè aa oo, Njesigənea̰ am m’isi kəmba ɓəi to gə́ yeḛ pa ne taree lé ya. Ləbje rɔ-sɔ-giree-mi dəs goo taje gə́ Njesigənea̰ ula Moyis togə́bè loo gə́ Israɛlje njaa ne dɔdilaloo’g lé. Ɓasinè ndá ləbm aḭ rɔ-jinaijoo-giree-mi ɓogənè ŋga. 11 Siŋgam to kɔgərɔ-kɔgərɔ ya ɓəi to gə́ mee ndəa gə́ Moyis ulam ne lé ya, siŋgam to to gə́ kédé ya ɓəi gə mba kɔr rɔ kaw rɔ ləm, əsé gə mba kunda loo teḛ raga əsé mba tel ree kəi gogo ləm tɔ. 12 Bèe ndá am mbal gə́ neelé gə́ Njesigənea̰ pa taree mee ndəa gən lé, mbata i oo ta lə Anakje gə́ d’isi keneŋ ləm, ɓee-booje gə́ boi-boi gə́ ndògo-bɔrɔ gugu dɔ dee to keneŋ ləm tɔ. Ɓó lé Njesigənea̰ a nai səm ndá m’a tuba dee gə́ raga to gə́ Njesigənea̰ pa ne taree lé ya.
13 Juje tɔr ndia dɔ Kaleb, ŋgolə Jepune’g, tɔɓəi yeḛ aree Ebro̰ gə́ né kea̰-yeḛ tɔ. 14 Togə́bè ɓa Kaleb, ŋgolə Jepune gə́ to dəw gə́ Keni lé iŋga ne Ebro̰ gə́ né kea̰-yeḛ saar teḛ ne mee ndɔ gə́ ɓogənè mbata yeḛ ndolè goo Njesigənea̰, Ala lə Israɛlje gə mee gə́ kára ba sur. 15 Ebro̰ lé kédé d’unda ria lə Kirjat-Arba, Arba lé to dəw gə́ boo ur dɔ Anakje’g lai ya.
Togə́bè ɓa ɓee neelé to ne lɔm ar rɔ godo ne keneŋ tɔ.
© Ngambai Bible © Alliance Biblique du Tchad 1989, 2015.
