Lugu 19 - Ngambai Bible révision (SBA2015)

Jasee wa Jeju gə́ rəa’g

1 Jeju uru mee ɓee gə́ Jeriko unda dana gaŋg. 2 Aa ooje, dəw kára gə́ to bao ria lə Jasee gə́ to mbai dɔ njétaa lar-gədɓeeje lé ndiŋga rəa mba kila kəmee dɔ Jeju’g kée ne see yeḛ to gə́ dəw gə́ banwa koo, 3 nɛ yeḛ duu dɔ loo tasəra mbata boo-dəwje d’o̰ loo mbèd mbata yeḛ to dəw gə́ gwɔji ɗugusu bèe ba. 4 Togə́bè yeḛ teḛ aḭ aw gaŋg loo no̰ dee’g kédé al sí dɔ kag-ɓɔl gə́ to mbɔr rəbə mba koo Jeju gə́ a gə dəs gə rəw gə́ gelee’g lé. 5 Loo gə́ Jeju teḛ lée’g neelé ndá yeḛ un kəmee gə́ tar ɓaree ulá pana: Jasee, risi gə́ tɔgi uru naŋg, mbata lé riri kara ɓogənè m’a ra ɓee mee kəi ləi ya.

6 Jasee ɔs rəa ɓad risi uru naŋg, wa Jeju gə́ rəa’g gə rɔlel tɔ. 7 Loo gə́ koso-dəwje d’oo togə́bè ndá deḛ jém ta gə ŋgan gwɔs dee pana: Yeḛ aw uru kəi lə njekaiya mbidi.

8 Jasee aar no̰ Mbaidɔmbaije’g ulá pana: Mbaidɔmbaije, aa oo, nékiŋgamje lé m’unda mée dana loo joo m’un loo kára m’ar njéndooje, ɓó lé m’tuji né lə dəw ndá m’a karee maree toree’g sɔ ya tɔ.

9 Jeju tel ilá keneŋ pana: Ɓogənè ya kaji uru mee kəi’g nee mbata yeḛ neelé to gə́ ŋgoka Abrakam ya tɔ.Jasee si dɔ kag-ɓɔl’g aw ŋgina̰ Jeju (19.1-9) 10 Mbata Ŋgon-dəw lé ree gə mba ndolè yeḛ gə́ ndəm igi gə mba karee aji ya .

Gosɔta gə́ wɔji dɔ ŋgan larlɔr

Mat 25.14-30

11 D’isi d’oo taje neelé ndá Jeju ila gosota gə́ raŋg keneŋ tɔɓəi mbata yeḛ si mbɔr Jerusalem’g dəb, nɛ deḛ la̰ji ta meḛ dee’g pana: Ɓeeko̰ lə Ala lé a teḛ wai ŋga . 12 Yeḛ ula dee pana: Dəw kára gə́ gelee gə́ mbai lé ḭ aw ɓee gə́ əw gə mba kar dee d’ula mbai dəa’g d’aree un ne kula ko̰ɓee ɓa gə mba tel ree ɓəi. 13 Yeḛ ɓar kuraje ləa dɔg, ar dee ŋgon lar kára-kára ula dee ne pana: Telje kəmee saar m’a tel ree ɓəi. 14 Nɛ njéɓeeje ləa d’ə̰jee bəḭ-bəḭ ndá d’ula njékaḭkulaje gée’g mba kar dee pana: Jeḛ ndigi kar dəw neelé o̰ ɓee dɔ sí’g el.

15 Loo gə́ d’ula mbai dəa’g mba̰ ɓa yeḛ tel ree ɓée ɓəi ndá yeḛ ula kula ɓar kuraje ləa gə́ yeḛ ar dee lar lé mba koo loo lar gə́ deḛ tel kəmee lé ŋga. 16 Yeḛ gə́ dɔtar lé ree ulá pana: Mbai, ŋgon lar ləi gə́ kára lé oji maree aree aḭ dɔg. 17 Mbai lé tel ilá keneŋ pana: A! i to kura gə́ maji ya, mbata né gə́ tḛ́ ba bèe ya i to ŋgonkoji dɔ’g bèe ndá aa oo, ma m’un ndum m’ari ɔn dɔ ɓee-booje’g dɔg tɔ. 18 Yeḛ gə́ njekɔm’g joo ree ulá pana: Mbai ŋgon lar ləi gə́ kára lé oji maree aree aḭ mi. 19 Mbai ila keneŋ pana: I kara m’ari ɔn dɔ ɓee-booje’g mi ya tɔ. 20 Yeḛ gə́ raŋg ree ulá pana: Mbai, aa oo, ŋgon lar ləi gə́ kára gə́ i am lé ma m’ŋgəm mbida ta kubu’g, 21 mbata ma m’ɓəli mbata i to dəw gə́ kədərə yaa̰, i unda né ɓa un el ləm, i dubu kó ɓa ra el ləm tɔ. 22 Mbai tel ilá keneŋ pana: Ta gə́ teḛ tai’g ɓa m’ila ne ta dɔi’g ya, i kura gə́ njemeeyèr. I gər gao to gə́ ma m’to gə́ dəw gə́ kədərə gə́ m’unda né ɓa m’un el ləm, m’dubu kó ɓa m’ra el ləm tɔ 23 ndá ŋga see ban ɓa i un lar ləm ar njételkəmeeje gə mba kar ndɔ telm ndá m’taa manee dɔ’g ji dee’g el wa. 24 Tɔɓəi yeḛ tel ula deḛ gə́ d’aar keneŋ neelé pana: Wáje ŋgon lar gə́ jia’g lé taaje arje yeḛ gə́ njelarlɔr gə́ dɔg lé. 25 Deḛ d’ulá pana: Mbai, yeḛ lé si gə larlɔr jia’g dɔg mba̰. 26 Nɛ mbai lé ula dee pana: Ma m’ula sí təsərə, yeḛ gə́ si gə né jia’g ndá d’a karee maree dɔ’g ya, nɛ yeḛ gə́ si gə né ɓa iŋga maree dɔ’g el ndá d’a kwa taa jia’g tɔ . 27 Ges ta gə́ nai ɓa nee: Njéba̰je ləm gə́ ndigi karm m’o̰ ɓee dɔ dee’g el lé wa deeje gə́ nee amje ndá tɔl deeje kəm’g nee ya.

28 Loo gə́ Jeju pa togə́bè mba̰ ndá yeḛ ɔd no̰ boo-dəwje’g kédé gə́ Jerusalem tɔ.

Jeju andə mee ɓee gə́ Jerusalem

Mat 21.1-11, Mar 11.1-11, Ja̰ 12.12-19

29 Loo gə́ d’unda dɔ Betpage gə Betani gə́ wɔji dɔ mbal gə́ ria lə Koiyoje dəb ndá Jeju ɔr njékwakiláje joo ula dee pana: 30 Ɔd awje ɓee gə́ to no̰ sí’g kédé lé. Loo gə́ seḭ a teḛje keneŋ ndá a kiŋgaje ŋgon mulayḛ̀je gə́ teá naŋg gə́ dəw kára kara uba giree ɗab el ɓəi, tudeeje reeje səa amje. 31 Ɓó lé dəw a bəg sí gə mbəa pana: See ban ɓa seḭ tudeeje wa. Ndá seḭ a kuláje pajena: Mbaidɔmbaije ɓa aw ndée ya.

32 Deḛ gə́ yeḛ ula dee lé d’ɔd d’aw ndá d’iŋga to gə́ yeḛ ula dee lé ya tɔ. 33 Loo gə́ d’isi tudu ŋgon mulayḛ̀je lé bèe-bèe ndá njeaje-je dəji dee pana: See ban ɓa seḭ tuduje ŋgon mulayḛ̀je lé wa.

34 Deḛ tel d’ila dee keneŋ pana: Mbaidɔmbaije ɓa aw ndée ya.

35 Deḛ ree gə ŋgon mulayḛ̀je lé rɔ Jeju’g ndá d’ɔm kubuje lə dee giree’g d’ar Jeju uba dəa ɗab si keneŋ. 36 Loo gə́ d’isi d’aw lé ndá dəwje mbalé kubuje lə dee naŋg rəbə. 37 Tɔɓəi loo gə́ d’unda dɔ Jerusalem dəb par gə́ loo gə́ wɔji dɔ wəl mbal gə́ ria lə Koiyoje lé ndá boo-njékwakiláje d’al rɔ dee, pidi ne Ala gə ndu dee gə́ boi wəl-wəl mbata némɔrije lai gə́ deḛ d’oo gə kəm dee lé. 38 Deḛ pana: Maji kar dɔkaisəgərə nai gə mbai gə́ ree gə ri Mbaidɔmbaije. Maji kar meekulɔm nai gə deḛ gə́ d’isi mee dara’g ləm, maji kula rɔnduba dɔ Ala’g ləm tɔ .

39 Parisiḛje gə́ na̰je gə́ d’aar mbuna boo-dəwje’g neelé d’ula Jeju pana: Mbai, maji kari ḭ gə njékwakilaije lé ndaŋg dee ɓa.

40 Nɛ yeḛ tel ila dee keneŋ pana: Ma m’ula sí təsərə, ɓó lé deḛ ɓa d’wa ta dee d’isi mundu ndá kɔr mbalje ɓa d’a ra né wəl-wəl ya!

Jeju no̰ mbata Jerusalem

41 Loo gə́ nai tḛ́ bèe gə mba kar dee teḛ mee ɓee’g lé ndá Jeju ila kəmee dɔ ɓee-boo’g neelé ndá no̰ gə mán kəmee dəa’g pana: 42 Ɓó lé ɓogənè gə́ to ndɔ kaḭ lé ɓa kəmi-i nja inja dɔ néje gə́ wɔji dɔ meekulɔm ləi bèe lé ɓa a maji yaa̰. Nɛ ɓasinè lé néje neelé d’iya rɔ dee kəmi’g pḛ́-pḛ́ nja ɓəi. 43 Mbata ndɔje gə́ njéba̰je ləi d’a teḛ dɔi’g kuru bwa gugu ne dɔi sub ləm, d’a gugu giri sub ləma, d’a kudu dɔi jigi-jigi ləm tɔ lé kàree a teḛ ndá d’a tujii pugudu gə ŋganije gə́ d’isi səi lé na̰’d. 44 D’a kya̰ mbal kára dɔ maree’g gə mba kari el mbata ree gə́ deḛ ree d’ooi ndəa gən lé i gər dee keneŋ el lé.

Jeju tuba njérab-néje mee kəi-Ala’g

Mat 21.12-17, Mar 11.15-19, Ja̰ 2.13-22

45 Yeḛ andə aw mee kəi-Ala’g ndá yeḛ un kudu tuba deḛ gə́ d’isi rab néje lə dee keneŋ ləm, gə deḛ gə́ ndogo sə dee ləm tɔ, 46 ula dee pana: Deḛ ndaŋg mee maktub’g pana: Kəi ləm a to kəi-ra-tamaji keneŋ. Nɛ seḭ ɓa seḭ teleeje undaje gə́ duu-loo lə njéɓogoje ya .

47 Yeḛ ndoo dee ta mee kəi-Ala’g gə ndəa-ndəa. Nɛ mbai dɔ njékinjanéməsje-je ləm, gə njéndaji-maktubje ləma, gə ŋgatɔgje lə dəwje ləm tɔ lé saŋg loo gə mba karee udu ne bo̰ . 48 Nɛ deḛ d’oo loo gə mba kwá el mbata ta gə́ yeḛ ndoo dee lé ar kaar boo-dəwje lai wa dee paḭ.