1 Aa ooje, m’a kula njekaḭkula ləm ndá yeḛ ɓa a gɔl rəw nɔm’g ndá Mbaidɔmbaije gə́ seḭ sa̰geeje lé a teḛ wai kandə kəi-siée’g. Aa ooje, njekaḭkula gə́ ka̰ manrɔ gə́ seḭ ndiŋgaje lé yeḛ si ree ya. Njesigənea̰ gə́ njeboo-néje lé ɓa pa bèe . 2 See na̰ ɓa a kaskəm kisi kəmba ndɔ ree’g ləa wa. See na̰ ɓa a kaar tar ndɔ gə́ yeḛ a teḛ lé wa. Mbata yeḛ a to kasəna gə pər lə njelḛ̀ lar ləm, a kasəna gə ya̰-kià lə njétogo kubuje kar dee ndá bèe ləm tɔ . 3 Yeḛ a si naŋg ndá a léḛ larnda gə mba kar siḭyee teḛ. Yeḛ a togo ŋgaka Ləbije kɔr ne néje gə́ mina̰ gə́ meḛ dee’g ndɔs-ndɔs to gə́ deḛ togo ne larlɔr gə larnda bèe tɔ. Bèe ɓa d’a kun nékarje kar Njesigənea̰ gə goo rəbee ɓəi. 4 Bèe ɓa nékarje lə Judaje gə njé gə́ Jerusalem lé d’a taa kəm Njesigənea̰ rəgm to gə́ mee ndəaje gə́ ləw lé ləm, to gə́ mee ləbje gə́ dəs mba̰ lé ləm tɔ. 5 M’a rəm pər gə́ rɔ sí’g gə mba gaŋg rəwta ləm, m’a kɔs rɔm ɓad gə mba kɔr ta kila dɔ njésukəmlooje’g ləm, gə dɔ njémɔdkaiyaje’g ləm, gə dɔ deḛ gə́ d’ubu rɔ dee gə taŋgɔm ləm, gə dɔ deḛ gə́ d’uga dɔ ji njékulaje lə dee gə goo rəbee el ləm, gə dɔ deḛ gə́ buguru njékəisiŋgaje gə ŋganalje ləma, gə dɔ deḛ gə́ ra majel gə dəw-dɔ-ɓeeje ɓəlm ne el ləm tɔ. Njesigənea̰ gə́ njeboo-néje lé pa bèe.
Maji kar dəw ɓogo Ala el
6 Ma kara m’a tel ree mbata ma lé m’to Njesigənea̰ ɓó m’tel rɔm ɓəd el. Bèe ɓa seḭ ŋgaka Jakob lé seḭ tujije ne el. 7 Un kudee mee ndəa’g lə bɔ síje-je lé seḭ undaje rɔ sí ŋgərəŋ dɔ tornduje’g ləm ɓó seḭ ilaje koji dɔ dee’g nda̰ el. Gə́ telje reeje rɔm’g ndá ma kara m’a tel ree rɔ sí’g ya tɔ. Njesigənea̰ gə́ njeboo-néje lé ɓa pa bèe. Nɛ seḭ pajena: See kəm kar sí n’telje n’reeje to gə́ ban wa. 8 See dəw a su kəm Ala wa. Mbata seḭ suje kəm ya. Nɛ seḭ pajena: See loo gə́ ra ɓa seḭ suje kəm keneŋ wa. To loo gə́ néje lə sí dɔg ɓa kəm kar sí unje təa kára arje Ala ləm, gə loo kar nékarje ləm tɔ. 9 Ndɔl wa dɔ sí mba̰ mbata seḭ lé gə ginkoji lə sí mbad ya seḭ suje kəm ya. 10 Njesigənea̰ gə́ njeboo-néje lé pana: Reeje gə néje lə sí dɔg kun təa kára-kára lai kəi-ŋgəm’g mba kar nésɔ to mee kəi’g ləm. See m’a kar kəm dara ɔr wuyum dɔ sí’g el wa. See m’a kar nétɔrndu taa rɔ sí pəl-pəl el wa . 11 Néje gə́ d’a gə tuji kó lə sí lé m’a ndaŋg dee mbata lə sí ndá d’a tuji dɔ kó lə sí gə́ a gə teḛ mbi lé el ləm, nduú gə́ mee ndɔje’g lə sí kara d’a lal kandə el ləm tɔ. Njesigənea̰ gə́ njeboo-néje lé ɓa pa bèe. 12 Ginkoji dəwje gə raŋg lai lé d’a pa pana: Rɔlel nai sə sí ya. Mbata dɔ naŋg lə sí a to ɓee rɔlel. Njesigənea̰ gə́ njeboo-néje lé ɓa pa bèe.
Ndutɔrje gə́ wɔji dɔ deḛ gə́ ra né d’ar Njesigənea̰ lé
13 Tapa sí gə́ kədərə ɓa seḭ ilaje ne ta dɔm’g. Njesigənea̰ pa bèe. Nɛ seḭ pajena: See ta ɗi ɓa seḭ ilaje dɔm’g wa. 14 Tapa sí ɓa nee: Ra kula kar Ala to né gə́ kari ba. Koji gə́ seḭ ilaje dɔ torndumje’g lé əsé njaa gə́ seḭ njaaje gə kəmndoo mbata lə Njesigənea̰ gə́ njeboo-néje lé see ɗi ɓa seḭ iŋgaje keneŋ wa. 15 Ɓasinè lé seḭ ə̰jije meḛ sí’g pajena: Njébeeleje ɓa to gə́ njérɔlelje ya. Tɔgərɔ, njémeeyèrje lé deḛ teḛkɔr tɔ. Tɔgərɔ deḛ d’aḭ mee Ala lal karee gaŋgta dɔ dee’g ya.
16 Gelee gə́ ne ɓa deḛ gə́ ɓəl Njesigənea̰ lé d’ula na̰ ta gə́ yo gə́ nee. Njesigənea̰ lé tuga mbia oo ne ta lə dee ndá deḛ ndaŋg maktub gə́ ka̰ kolé mee Njesigənea̰ nea̰’g mbata lə deḛ gə́ ɓəl Njesigənea̰ ləm, d’ila riɓar dɔ ria’g ləm tɔ. 17 Njesigənea̰ gə́ njeboo-néje lé pana: D’a to koso-dəwje gə́ to ka̰ ma ya mee ndəa gə́ m’wa dɔ gɔlee’g lé. M’a koo kəmtondoo lə dee to gə́ dəw oo ne kəmtondoo lə ŋgonee gə́ ra né aree bèe. 18 Ndá seḭ a tel kooje loo to ɓəd lə njemeekarabasur gə njemeeyèr ləm, gə loo to ɓəd lə dəw gə́ njera né kar Ala gə yeḛ gə́ ra né aree el ləm tɔ.
Ndɔ lə Njesigənea̰ lé
19 Mbata aa ooje, ndɔ gə́ kàree a teḛ lé loo a nuŋga kəd-kəd asəna gə loo-kula-bṵda bèe ndá njébeeleje lai ləm, gə njémeeyèrje lai ləm tɔ d’a to kasəna gə ləm mu bèe. Njesigənea̰ gə́ njeboo-néje lé pana: Ndəa gə́ a gə teḛ lé a roo dee dula-dula kar ŋgira dee əsé barkəm dee kara nai el. 20 Nɛ seḭ gə́ ɓəlje ri neḛ lé kàr gə́ gə dɔ najee ɓa a kuba dɔ sí’g. Siŋgamoŋ ka̰ kɔr rɔko̰ a kḭ rəa’g. Seḭ a teḛje raga ndá a talje jagəra-jagəra asəna gə ŋgan maŋgje gə́ d’aar loo-ko̰-mu’g lə dee bèe. 21 Njémeeyèrje lé seḭ a tuba deeje naŋg gə gɔl sí mbata d’a to kasəna gə bu pər gel dabla gɔl sí’g mee ndəa gə́ ma m’wa dɔ gɔlee lé. Njesigənea̰ gə́ njeboo-néje lé ɓa pa bèe.
22 Arje meḛ sí olé dɔ godndu’g lə Moyis, kura ləm lé. Yeḛ lé m’un godnduje gə tornduje ləm m’aree mbata lə Israɛlje lai dɔ mbal gə́ Oreb.
23 Aa ooje, n’a kula Eli, njetegginta lé rɔ sí’g kédé ɓa gə mba kar ndɔ lə Njesigənea̰ lé teḛ ɓəi. Ndəa neelé a to ndɔ gə́ boo ləm, a to ɓəl kədm-kədm ləm tɔ . 24 Yeḛ a ree gɔl meḛ bɔ ŋganje-je kar deḛ tel d’wa ŋgan deeje gə́ rɔ dee’g ləm, a gɔl meḛ ŋganje kar dee tel d’ɔm na̰’d gə bɔ deeje-je ləm tɔ ndá m’a ree tuji dɔ naŋg ɓee lə sí.
© Ngambai Bible © Alliance Biblique du Tchad 1989, 2015.
