Ta gə́ Jeju ndoo dee wɔji ne dɔ tḭ-na̰ lə diŋgam gə dené
Mar 10.1-21 Loo gə́ Jeju pata ləa ila naŋg ɗəgərə ndá yeḛ ḭ Galile aw dɔ naŋg ɓee gə́ Jude gə́ gir Jurdɛ̰ gə́ kel tura’g. 2 Boo-dəwje gə́ bula digi-digi ndɔm na̰ gée’g ndá lée neelé yeḛ ɔr rɔko̰ rɔ njérɔko̰je’g.
3 Parisiḛje gə́ na̰je rəm pər gə́ rəa’g gə mba ndo̰ təa ndá deḛ dəjee pana: See diŋgam tuba dené ləa gə mba né lé see to né gə́ kəm ra wa.
4 Jeju ila dee keneŋ pana: Kédé gə́ dɔtar lé yeḛ gə́ njekunda gel dee unda diŋgam ləm, gə dené ləm tɔ lé see ta neelé seḭ turaje el ɓəi wa . 5 Gelee gə́ nee ɓa diŋgam a kya̰ bɔbeeje gə kea̰je gə mba kar dee-deḛ gə dené ləa d’ɔm na̰’d sad ndá d’a tel to gə́ darɔ gə́ kára ba tɔ . 6 Gelee gə́ nee ɓa deḛ to darɔ gə́ kára ba ɓó deḛ to dəwje gə́ ɓəd-ɓəd joo el. Bèe ndá deḛ gə́ Ala tɔ dee na̰’d lé maji kar dəw kára kara kai dee ɓəd-ɓəd el ŋga.
7 Deḛ tel d’ilá keneŋ pana: Ŋga ban ɓa Moyis un ndia ar dee maktub tḭ-na̰ mba kar diŋgam tuba ne dené ɓəi wa .
8 Yeḛ ila dee keneŋ pana: To mbata meendər lə sí gə́ togə́bè ɓa Moyis un ne ndia ar sí tubaje ne denéje lə sí ɓó gelee gə́ un gə́ dɔtar lé to togə́bè el. 9 Ma nja m’ula sí təsərə, nana ɓa gə́ tuba dené ləa gə́ ta kaiya wa dəa el ɓəi ɓa yá̰ taa dené gə́ raŋg ndá yeḛ ra kaiya .
10 Njékwakiláje d’ilá keneŋ pana: Ɓó lé to togə́bè mbuna diŋgam gə dené ləa ndá taa na̰ el ŋga ɓa maji.
11 Yeḛ tel ila dee keneŋ pana: Ta gə́ ma m’pa neelé dəwje lai d’askəm taa gə meḛ dee el nɛ deḛ gə́ lée dum dee el ndá d’a taa ya. 12 Mbata njé gə́ na̰je lé deḛ to njékujije mee ko̰ deeje’g ya, nɛ njé gə́ na̰je gə́ d’ɔr dee kuji ləm, njé gə́ na̰je lé deḛ nja tel rɔ dee kuji mbata ɓeeko̰ gə́ dara ləm tɔ. Nana ɓa gə́ askəm taa ta neelé ndá maji karee taa ya.
Jeju wa ŋganje gə́ gɔ-gɔ gə́ rəa’g
Mar 10.13-16, Lug 18.15-1713 Mee kàree’g neelé deḛ ree gə ŋganje gə́ gɔ-gɔ gə́ rəa’g mba karee ila jia dɔ dee’g ra ne tamaji mbata lə dee tɔ nɛ njékwakiláje d’ɔs dee rəw, 14 Jeju ula dee pana: Ya̰je ŋganje neelé ar deeje ree rɔm’g ɓó ɔg deeje rəw el, mbata ɓeeko̰ gə́ dara lé to mbata lə deḛ gə́ to d’asəna sə dee bèe ya tɔ.
15 Yeḛ ila jia dɔ dee’g mba̰ ɓa ɔd aw ɓəi.
Basa gə́ to bao
Mar 10.17-31, Lug 18.18-3016 Yen ŋga dəw kára rəm pər gə́ rɔ Jeju’g dəjee pana: Mbai, see né gə́ maji gə́ ban ɓa m’a ra gə mba si ne gə kəmə gə́ gə no̰ lé wa.
17 Yeḛ tel ilá keneŋ pana: See ban ɓa i dəjim loo néra gə́ maji wa. Dəw kára ba ɓa to dəw gə́ maji. Ɓó lé i ndigi kula dɔi gə́ loo gə́ a si gə kəmə keneŋ lé ndá godnduje lé i a tɔs kəmi dɔ dee’g bao-bao ya.
18 Basa neelé tel ilá keneŋ pana: See godnduje gə́ ban ɓəi wa.
Jeju tel ulá pana: Dee ɓa to nee: I a tɔl dəw el ləm, i a ndal mɔdkaiya el ləm, i a ɓogo el ləm, i a təd taŋgɔm kunda ta mari’g el ləm , 19 i a tədkag bɔbije gə kɔinje ləma, i a kunda mari dan kəmi’g to gə́ i ra ne gə darɔi bèe ləm tɔ .
20 Basa neelé tel ilá keneŋ pana: Néje nee lai lé ma m’tɔs kəm dɔ’g bao-bao ya. Yee gə́ ra tɔɓəi ɓa lalm ɓəi wa.
21 Jeju ulá pana: Ɓó lé i ndigi to maji kɔr njoroŋ ndá ɔd aw odo néje ləi lai ndogo, ya̰ laree ar njéndooje ndá i a kiŋga ne nébao ɓeeko̰ gə́ dara ɓəi, tɔɓəi un rəw goom’g.
22 Loo gə́ basa lé oo ta neelé ndá yeḛ mi mbidi-mbidi ɔd mbiriŋ aw mbata yeḛ to njenébaoje gə́ dum dɔ loo.
23 Yen ŋga Jeju tel ula njékwakiláje pana: Ma m’ula sí təsərə, kar bao un gɔlee ila mee ɓeeko̰ gə́ dara pà lé kədərə ya. 24 Ma m’tel m’ula sí ya tɔɓəi, kar bao un gɔlee ila mee ɓeeko̰’g lə Ala pà lé kədərə unda kar jambal andə kəmbolè libiri’g teḛ raga ya.
25 Loo gə́ njékwakiláje d’oo ta neelé ndá kaar dee wa dee paḭ ar dee pana: Bèe ŋga see na̰ ɓa askəm kaji wa.
26 Jeju aa dee gərərə ula dee pana: Né neelé dəwje ɓa lée a dum dee təs nɛ Ala ɓa yḛ̀ né gə́ njedumee godo.
27 Yen ŋga Piɛrə un ta dəjee pana: Aa oo, jeḛ lé j’uba néje lə sí lai j’ya̰ j’un rəw gooi’g. See né ka̰ síjeḛ gə́ jeḛ ŋgina lé see a to gə́ ɗi ɓəi wa.
28 Jeju tel ila dee keneŋ pana: Ma m’ula sí təsərə, ndɔ gə́ d’a gə kar néje lai tel to lée’g béréré lé ɓa Ŋgon-dəw a kuba dɔ kalimbai ndubarɔ ləa gao si’g ndá seḭ gə́ unje goom lad-lad lé seḭje kara a kubaje dɔ kalimbaije gə́ dɔg-giree-joo neelé gao si keneŋ mba gaŋgta dɔ ginkoji Israɛlje gə́ dɔg-giree-joo neelé tɔ . 29 Nana ɓa gə́ ya̰ ŋgakea̰je gə diŋgam əsé njé gə́ dené əsé bɔbeeje əsé kea̰je əsé dené ləa əsé ŋganeeje əsé loo-ndɔ ləa əsé kəije ləa gə mba rim-ma ndá a kiŋga dee gogo dɔ maree’g loo tɔl-tɔl ya ɓəi ləm, kəmə gə́ gə no̰ lé a kwa gə́ nékwanduba ləa ya ləm tɔ. 30 Njé gə́ na̰je gə́ goo loo gə́ gogo d’a kaw gə́ ŋgaw ta dee kédé, nɛ njé gə́ na̰je gə́ d’aw gə́ ŋgaw ta dee kédé lé d’a tel to njé gə́ goo loo gə́ gogo tɔ.
© Ngambai Bible © Alliance Biblique du Tchad 1989, 2015.
