Misee 3 - Ngambai Bible révision (SBA2015)

Ta gə́ wa dɔ njékɔrno̰ Israɛlje

1 Ma m’pana: Ooje ta nee, seḭ mbai dɔ ŋgaka Jakobje lé

Seḭ njéko̰ɓeeje gə́ Israɛl!

See to ta lə sí-seḭ ya

Gə mba kar sí gərje né gə́ gə dɔ najee lé el wa.

2 Seḭ ə̰jije néra gə́ maji lé bəḭ-bəḭ

Ndá né gə́ majel ɓa seḭ ndigije,

Seḭ tusuje ndar dəwje ləm,

Seḭ tɔrje dakasrɔ dee dɔ siŋga dee’g ləm tɔ.

3 Deḛ d’usɔ dakasrɔ koso-dəwje ləm ləm,

Deḛ tusu ndar dee ləm,

Deḛ təd siŋga dee ləma,

Deḛ gaŋg dee dana ɗuguru-ɗuguru

To gə́ naḭ gə́ ndiri mee ŋgoro’g bèe ləm

To gə́ da gə́ d’ɔb gə əb bèe ləm tɔ.

4 Yen ŋga d’a no̰ wəl gə́ rɔ Njesigənea̰’g,

Nɛ yeḛ a kila dee keneŋ el.

Mee ndəa’g neelé yeḛ a kiya rəa kəm dee’g

Mbata néraje lə dee gə́ to kḛji lé.

Kaiya ra njéteggintaje

5 Ta gə́ Njesigənea̰ pa

Dɔ njéteggintaje gə́ d’ar koso-dəwje lə neḛ ndəm lé ɓa nee:

Loo gə́ nésɔ to ŋgaŋ dee’g mba kar deḛ to̰ ndá

D’ila mber meekulɔm

Nɛ loo gə́ nésɔ godo ta dee’g ndá

Mber rɔ ɓa d’ila tɔ.

6 Gelee gə́ nee ɓa seḭ a síje ne dan loondul’g

Ɓó a kooje némḭdije el!

Seḭ a síje dan loondul gə́ ndul njudu-njudu’g

Ɓó a kooje ndərtaje gə́ wɔji dɔ Njesigənea̰ el!

Lookàr a tel to loondul dɔ njéteggintaje’g neelé

Asəna gə kàr gə́ ur naŋg bèe.

7 Rɔkul a dəb dɔ njénékooje’g gə dɔ njésaŋ ndilje’g ləm,

Deḛ lai d’a si gogəro gə rɔkul ləm tɔ

Mbata Ala a gə kila dee ta’g el.

8 Nɛ ma lé gə goo ndil Njesigənea̰ ndá

Siŋgam to kɔgərɔ-kɔgərɔ,

Néra gə́ gə dɔ najee gə siŋgamoŋ taa rɔm pəl-pəl

Gə mba karm m’riba ne dɔ néramajel lə Jakobje ləm,

Gə kaiya ra Israɛlje ləm tɔ.

Mise pata tuji gə́ a gə teḛ dɔ Jerusalem’g lé

9 Ooje ta nee ɓa,

Seḭ mbai dɔ ŋgaka Jakobje ləm,

Seḭ njéko̰ɓeeje gə́ Israɛl ləm tɔ lé

Seḭ gə́ ə̰jije néra gə́ gə dɔ najee bəḭ-bəḭ ləm,

Gə arje né gə́ danasur tel to né gə́ ndɔji pɔdɔdɔ ləm tɔ.

10 Seḭ gə́ tumje gin ɓee gə́ Sio̰ gə məs ləm,

Gə Jerusalem gə néra gə́ kori-kori ləm tɔ!

11 Njégaŋ-rəwtaje lə dee gaŋg rəwta

Mbata lə néndogo-gel ləm,

Njékinjanéməsje lə dee ndoo dəwje né

Mbata ne k’uga dɔ ji dee ləma,

Njéteggintaje lə dee pata néje gə́ d’a gə ree

Taa ne lar ləm tɔ.

Deḛ nduna rɔ dee rɔ Njesigənea̰’g pa ne pana:

See Njesigənea̰ si mbuna neḛje’g el wa.

Némeeko̰ kára kara a tibi mbɔr neḛje el.

12 Gelee gə́ nee ɓa gə mbata lə sí-seḭ lé ɓa

Sio̰ a tel to gə́ loo-ndɔ

Gə́ ndɔ bur-bur ləm,

Jerusalem a tel to kɔr mbalje

Gə́ tɔs dɔ na̰’d ləma,

Dɔ mbal gə́ wɔji dɔ kəi gə́ to gə kəmee lé

Semee a tel to ne mee kag-kɔr ləm tɔ .