Jeju ar koso-dəwje tɔl-dɔg-loo-sɔ muru d’o̰
Mat 15.32-391 Mee ndəaje’g neelé boo-dəwje mbo̰ dɔ na̰ kəmlə-kəmlə rəa’g tɔɓəi, nɛ d’oo nésɔ dee el, ndá Jeju ɓar njékwakiláje ula dee pana: 2 Meem tɔsəm mbigi-mbigi gə no̰ mbata boo-dəwje nee gə́ d’wa dɔ na̰ rɔm’g as ndɔ dee munda, nɛ d’iŋga nésɔ gə́ gə mba sɔ el. 3 Ɓó lé m’a kya̰ dee bèe mba kar dee d’aw lal kar dee d’iŋga nésɔ ndá siŋga dee a godo rəbə mbata njé gə́ na̰je d’ḭ əw yaa̰ tɔ.
4 Njékwakiláje tel d’ilá keneŋ pana: Loo gə́ nee to dɔdilaloo’g ŋga see n’a kiŋgaje nésɔ loo gə́ ra’g ɓa mba k’ar dee d’usɔ d’ar meḛ dee ndan wa.
5 Jeju tel dəji dee pana: See pil muru ka̰da ɓa to ji sí gən ɓəi wa.
Deḛ ndigi təa’g pana: Yḛ̀ siri ba.
6 Yen ŋga yeḛ ar boo-dəwje lé rəm d’isi naŋg tɔɓəi yeḛ odo pil muru gə́ siri lé ra ne oiyo mba̰ ɓa wa gaji daná ar njékwakiláje mba kar dee kai koso-dəwje neelé ndá deḛ kai dee ya tɔ. 7 Ŋgan ka̰jije gə́ na̰je to keneŋ bəl tɔ, loo gə́ Jeju ra oiyo dɔ’g ndá yeḛ odo ar dee kai dee tɔ. 8 Deḛ lai neelé d’o̰ d’ar meḛ dee ndan tub-tub ndá goŋ muru gə́ nai gə mbida ka̰jije lé d’odo rusu buduje siri. 9 Deḛ gə́ d’o̰ lé d’as dəwje tɔl-dɔg-loo-sɔ. Yen ɓa Jeju ya̰ dee ar dee tel d’aw ɓée ɓəi. 10 Léegəneeya yeḛ gə njékwakiláje d’uru mee to’g d’aw ɓee gə́ Dalmanuta.
Parisiḛje dəji Jeju némɔri
Mat 16.1-411 Parisiḛje ree rɔ Jeju’g ndá d’un ta d’isi maḭ səa d’aḭ ne mée pana: Ar sí j’ooje némɔri gə́ a kḭ dara lé ŋga . 12 Jeju ila mée pugudu ɓa ḭ ila dee keneŋ pana: See ban ɓa ginka dəwje gə́ nee lé dəji loo koo némɔri wa. Ma m’ula sí təsərə, d’a kar ginka dəwje gə́ nee lé d’oo némɔri el .
13 Tɔɓəi yeḛ ḭ uba dee ya̰ dee mba gaŋg mán kaw gə́ kel turá.
Né gə́ ar nduji ti ka̰ Parisiḛje gə ka̰ Herɔdə lé
Mat 16.5-1214 Njékwakiláje d’ar meḛ dee wəi dɔ kodo muru’g, nɛ pil muru kára ba ɓa d’isi ne ji dee’g mee to’g tɔ. 15 Jeju ndəji dee bər-bər pana: Aaje rɔ sí kər-kər mba kar né gə́ ar nduji ti gə́ ka̰ Parisiḛje gə ka̰ Herɔdə lé tibi mbɔr sí el .
16 Njékwakiláje d’ula na̰ ta gə ŋgan gwɔs dee njigi-njigi pana: Yeḛ pa togə́bè mbata muru gə́ godo ji sí’g ya.
17 Jeju oo ndá yeḛ ila dee keneŋ pana: See ban ɓa ulaje na̰ ta gə ŋgan gwɔs sí njigi-njigi pajena: M’pata m’wɔji ne dɔ muru gə́ godo ji sí’g wa. See kəm sí inja el nja dɔrɔ ɓəi wa. See seḭ gərje ginee njai el nja ɓəi wa. 18 See meḛ sí to gə ndəree siŋ-siŋ ya dɔrɔ ɓəi wa. Kəm sí to gən nɛ see ooje ne loo el wa. Mbi sí to gən nɛ see seḭ ooje ne ta el wa. See meḛ sí tɔ kujita dɔ néje’g el wa . 19 Loo gə́ m’odo pil muru gə́ mi m’təd dana m’ar sí kaije koso-dəwje gə́ tɔl-dɔg-loo-mi lé see seḭ odoje gɔŋgee rusu buduje ka̰da wa.
Deḛ tel ndigi təa’g pana: Yḛ̀ dɔg-giree-joo.
20 Loo gə́ m’odo pil muru gə́ siri m’təd dana m’ar sí kaije koso-dəwje gə́ tɔl-dɔg-loo-sɔ lé see seḭ odoje gɔŋgee gə́ nai rusu buduje ka̰da wa.
Deḛ tel d’ilá keneŋ pana: Yḛ̀ siri.
21 Yeḛ tel dəji dee pana: Gə́ kən lé see seḭ gərje el nja dɔrɔ ɓəi wa.
Jeju ar njekəmtɔ gə́ Besayida oo loo
22 Deḛ d’ḭ keneŋ d’aw Besayida ndá dəwje ree gə njekəmtɔ rɔ Jeju’g, ra ne ndòo rəa’g mba karee ar kəmee teḛ. 23 Yen ŋga yeḛ wa ji njekəmtɔ lé ɔree njɔl aw səa ŋgaŋloo gə́ raga, tɔɓəi yeḛ ra mán təa ɔrɔ ne kəmee, ɓa yá̰ ila jia dəa’g, dəjee pana: See i aa loo oo né wa.
24 Njekəmtɔ lé aa loo gərərə ndá pana: Ma m’oo dəwje ya nɛ m’oo dee asəna gə kagje gə́ dəs pid-pid bèe.
25 Jeju tel ila jia kəmee’g gɔl kára tɔɓəi, loo gə́ njekəmtɔ lé aa loo gərərə ndá kəmee inja njai-njai aree oo ne néje lai-lai tɔ. 26 Yen ŋga Jeju yá̰ aree tel aw mee kəi’g ləa gogo ndá ulá pana: Maji kari tel aw mee ɓee’g el.
Piɛrə pa njaŋg pana: Jeju to Kristi nja
Mat 16.13-20, Lug 9.18-2127 Jeju gə́ njékwakiláje d’isi d’aw gə́ ŋgan-ɓeeje gə́ wɔji dɔ Sejare ka̰ Pilibə. Loo gə́ d’isi d’aw rəbə lé Jeju dəji njékwakiláje pana: See dəwje pa ban dɔm’g wa. See pana ma lé m’to gə́ nawa. 28 Deḛ tel ndigi təa’g pana: Njé gə́ na̰je pana: i to gə́ Ja̰ Njera-batɛm ləm, njé gə́ raŋg pana: I to Eli ləma, gə njé gə́ na̰je pana: I to njetegginta gə́ kára bèe ləm tɔ .
29 Jeju tel dəji dee-deḛ nja pana: Ŋga see seḭ yḛ̀ seḭ paje ka̰ sí-seḭ ban dɔm’g to wa. See ma m’to gə́ na̰ ɓəi wa.
Piɛrə ilá keneŋ pana: I lé to Kristi ya .
30 Jeju ndəji dee bər-bər gə mba kar dee pa taree d’ar dəw kára kara oo el.
Jeju teggin né gə́ a gə rəa lé
Mat 16.21-28, Lug 9.22-2731 Yen ŋga yeḛ un kudu ndoo dee ta né gə́ a gə teḛ dəa’g neelé pana: Ŋgon-dəw lé lé riri kara néurti a rəa yaa̰ ləm, njé gə́ tɔgje gə mbai dɔ njékinjanéməsje-je gə njéndaji-maktubje d’a kɔsee rəw ndá d’a tɔlee tɔ, nɛ ndɔ munda gogo ndá yeḛ a kunda loo teḛ dan njé gə́ d’wəi’g ya.
32 Yeḛ ula dee ta neelé raga təsərə ya. Piɛrə ɔree njɔl sa səa rəa rɔ dee’g aw aar pa səa dɔ’g. 33 Nɛ Jeju tel kəmee bir-bir gə́ rɔ njékwakiláje’g ndaŋg Piɛrə ulá pana: Njekurai, ɔd tam’g gə́ gogo! Takə̰ji ləi wa bua ka̰ dəwje ɓa ɓó wa bua ka̰ néje lə Ala ɓa el.
34 Tɔɓəi yeḛ ɓar boo-dəwje gə njékwakiláje na̰’d ula dee pana: Ɓó lé nana ɓa ndigi kun rəw goom’g ndá maji karee mbad rəa-yeḛ nja piriŋ ila kɔ ndá un ne kag-dəs ləa mba kun ne rəw goom’g ya . 35 Nana ɓa gə́ ndigi kaji rəa ndá a kila rəa kɔ ɓəi, nɛ yeḛ gə́ ila rəa kɔ gə mbam ləm, gə mba tagə́maji lé ləm tɔ ndá a kaji rəa ya ɓəi tɔ . 36 Dəw gə́ iŋga néje gə́ dɔ naŋg nee lai nɛ yeḛ ila rəa kɔ yɔdɔdɔ ndá see to gə́ nékiŋga ɓa nee wa. 37 See ɗi ɓa dəw a kun, taa ne tor rəa wa. 38 Mbata nana ɓa gə́ ra kəmkul dɔm’g gə dɔ ta’g ləm mbuna ginka dəwje gə́ nee gə́ to njémɔdkaiyaje ləm, gə njékaiyaje ləm tɔ lé ndá Ŋgon-dəw a ra rɔkul dəa’g loo gə́ yeḛ a ree dan rɔnduba’g lə bɔbeeje lé gə kuraje ləa gə́ dara gə́ to njémeendaje lé na̰’d.
© Ngambai Bible © Alliance Biblique du Tchad 1989, 2015.
