1 Koso-dəwje lai mbo̰ dɔ na̰ to gə́ dəw gə́ kára ba bèe ndaa-loo gə́ to tarəwɓee gə́ ria lə Rəw-Manje. Deḛ d’ula Esdras, njendaji-maktub lé mba karee ree gə maktub godndu Moyis gə́ Njesigənea̰ aree mbata lə Israɛlje lé. 2 Bèe ɓa Esdras, njekinjanéməs ree gə maktub godndu lé no̰ koso-dəwje gə́ to diŋgamje gə denéje gə ŋganje gə́ d’askəm koo ta gər ginee. To ndɔ gə́ dɔtar mee naḭ gə́ njekɔm’g siri. 3 Esdras tura maktub lé ndaa-loo’d gə́ to tarəwɓee gə́ ria lə Rəw-Manje, un kudee gə ndɔ ya saar ar kàr aar daŋdɔ no̰ diŋgamje gə denéje gə ŋganje lai gə́ d’askəm koo ta gər ginee lé. Koso-dəwje lai d’ur mbi dee gèŋ dɔ maktub godndu’d gə́ yeḛ tura lé.
4 Esdras gə́ njendaji-maktub lé aar dɔ loo-kaar gə́ ra gə kag mba karee aar keneŋ ɓa tura ta neelé. Loo gə́ mbɔree’g dɔ jikɔlee’g lé Matitia, gə Sema, gə Anaja, gə Uri, gə Hilkija, gə Maaséja d’aar keneŋ, tɔɓəi dɔ jigelee’g lé Pedaja, gə Mikaɛl, gə Malkija, gə Hasum, gə Hasbadana, gə Jakari, gə Mesulam d’aar keneŋ tɔ. 5 Esdras teḛ ta maktub neelé kəm koso-dəwje’g lai mbata yeḛ aar dɔ dəwje’g lai gə́ tar. Bèe ɓa loo gə́ yeḛ teḛ ta maktub ndá dəwje lai d’aar tar loo-kaar dee’g tɔ.Esdras aar tura maktub godndu (8.4-5) 6 Esdras ɔs gaji Njesigənea̰, Ala gə́ boo lé ndá koso-dəwje lai d’ilá keneŋ d’odo ne ji deḛ gə́ tar pana: Bèe ya. Bèe ya. Tɔɓəi deḛ d’ula dɔ dee d’unda barmba dəb kəm dee naŋg no̰ Njesigənea̰’g. 7 Juje, gə Bani, gə Serebia, gə Jamḭ, gə Akub, gə Sabetai, gə Hodija, gə Maaséja, gə Kelita, gə Ajaria, gə Jojabad, gə Hanan, gə Pelaja, gə Ləbije ɓa d’ɔr gin godndu lé d’ar koso-dəwje ndá nana kara aar loo-kaaree’g-kaaree’g. 8 Deḛ tura maktub godndu Ala gə ndu dee gə́ àr ŋgad-ŋgad ləm, d’ɔr ginee d’ar dəwje d’oo ta gə́ tura keneŋ lé njai-njai ya ləm tɔ.
9 Nehemi gə́ njeguburuɓee ləm, gə Esdras gə́ njekinjanéməs gə njendaji-maktub ləma, gə Ləbije gə́ to njendoo koso-dəwje né ləm tɔ lé d’ula dəwje lai pana: Ɓogənè to ndɔ gə́ to gə kəmee mbata lə Njesigənea̰, Ala lə sí lé. Maji kar sí síje dan kəmndoo’g gə mán-no̰ kəm sí’g el. Mbata koso-dəwje lai no̰ loo gə́ deḛ d’oo taje gə́ godndu pa lé tɔ.
10 Deḛ d’ula dee tɔɓəi pana: Aw sɔje da gə́ to ubu ləm, aw aije nékai gə́ lel ləma, ulaje gə gesee arje deḛ gə́ d’wa dɔ gɔl ka̰ dee el ləm tɔ mbata ɓogənè to ndɔ gə́ to gə kəmee mbata lə Mbaidɔmbaije lə sí. Arje kəm sí to ndòo el mbata rɔlel lə Njesigənea̰ ɓa a to siŋga sí ya.
11 Ləbije gɔl meḛ koso-dəwje lai d’ar dee d’isi lɔm, d’ula dee pana: síje mundu mbata ndɔ neelé to ndɔ gə́ to gə kəmee, arje kəm sí to ndòo el.
12 Bèe ɓa koso-dəwje lai d’aw mba sɔ gə kai ləm, gə mba kya̰ gesee kar dee gə́ ka̰ dee godo ləma, gə mba kya̰ rɔ dee dan boo-rɔkal’g ləm tɔ mbata deḛ gər gintaje gə́ d’ɔr ginee d’ar dee lé njai-njai ya.
Deḛ ra naḭ gə́ wɔji dɔ kəi-surumje
13 Ndɔ gə́ njekɔm’g joo lé mbai dɔ gel-bɔje lə koso-dəwje lai ləm, gə njékinjanéməsje ləma, gə Ləbije ləm tɔ mbo̰ dɔ na̰ rɔ Esdras gə́ njendaji-maktub’g gə mba koo gintaje lə godndu lé. 14 Bèe ɓa deḛ d’iŋga ta gə́ ndaŋg mee maktub godndu’d gə́ Njesigənea̰ un ar dee gə ndu Moyis to gə́ to kəm kar Israɛlje d’isi mee kəi-surumje’g loo ra naḭ’g mee naḭ gə́ njekɔm’g siri lé ləm , 15 mba kar dee d’ila mber ta neelé mee ɓee-booje’g lə dee gə Jerusalem ləm tɔ pana: Awje dɔ mbal’g aw saŋgje kam koiyoje ləm, gə kam koiyoje gə́ mee wala’g ləm, gə kam mbəje ləm, gə kam kia̰garje ləma, gə kam kagje gə́ ndər siŋ-siŋ ləm tɔ gə mba lab dee gə́ kəi-surumje to gə́ ndaŋg ne taree lé tɔ.
16 Yen ŋga koso-dəwje lé d’aw saŋg kam kagje neelé ndá deḛ la ne kəi-surumje dɔ kəije’g lə dee ləm, mee gadlooje’g lə dee ləm, mee gadloo gə́ wɔji dɔ kəi-Ala ləm, gə ndaa-loo gə́ to no̰ tarəwɓee gə́ ria lə Rəw-Manje ləma, gə ndaa-loo gə́ to no̰ tarəwɓee gə́ ria lə Eprayim ləm tɔ. 17 Koso-dəwje lai gə́ d’ḭ ɓee-ɓər’g tel ree ɓee lé la kəi-surumje ndá d’isi keneŋ. Un kudee mee ndəa’g lə Juje, ŋgolə Nun lé saar teḛ ne ndəa gən lé Israɛlje ra gar né gə́ togə́bè lé el. Yee ɓa deḛ d’isi ne dan boo-rɔlel’g ya. 18 Deḛ tura maktub godndu Ala gə ndɔje kára-kára lai, un kudee ndɔ gə́ dɔtar ya saar teḛ ne rudu ndɔ’g. Deḛ ra naḭ as ndɔ dee siri ndá deḛ ra loo-mbo̰-dɔ-na̰ gə́ to gə kəmee mee ndɔ gə́ njekɔm’g jinaijoo’g to gə́ ndukun wɔji lé tɔ.
© Ngambai Bible © Alliance Biblique du Tchad 1989, 2015.
