Kɔg-mee-ɓoo gə kwa ndòo rɔ dɔ kaiya’g lə koso-dəwje
1 Ndɔ gə́ njekɔm’g rɔ-joo-giree-sɔ gə́ mee naḭ’g neelé Israɛlje mbo̰ dɔ na̰, deḛ d’ula kubu-kwa-ndòo rɔ dee’g ləm, tuga kor naŋg d’ɔm dɔ dee’g ləm tɔ ɓa d’ɔg ne meḛ dee ɓoo tɔ. 2 Deḛ gə́ to gə́ ginkoji Israɛlje lé d’ɔr rɔ dee gə́ raga rɔ deḛ lai gə́ to dəw-dɔ-ɓeeje’g ndá deḛ teggin kaiya lə dee ləm, gə néra kori-korije lə bɔ deeje-je ləm tɔ. 3 Loo gə́ deḛ d’aar loo-kaar dee’g mba̰ ndá deḛ tura maktub godndu Njesigənea̰, Ala lə dee as kàr munda mee ndəa’g lé ləm, deḛ teggin kaiyaje lə dee as kàr munda gə́ raŋg ləm tɔ ndá deḛ d’unda ne barmba no̰ Njesigənea̰, Ala’g lə dee ya.
4 Juje gə Bani gə Kadmiel gə Sebania gə Buni gə Serebia gə Bani gə Kenani d’uba dɔ loo-kaar pata lə Ləbije ndá d’ɔr ndu dee gə́ tar wəl gə́ rɔ Njesigənea̰, Ala’g lé lə dee. 5 Juje gə Kadmiel gə Bani gə Hasabnia gə Serebia gə Hodija gə Sebania gə Petaja, gə́ to Ləbije neelé pana: Ḭje tar ɔsje gaji Njesigənea̰, Ala lə sí gə́ njesi gə ləbee-ləbee gə no̰ lé!
Maji kar dee d’ɔs gaji rɔnduba lə ri
Gə́ ur dɔ ndutɔrje lai ləm,
Gə dɔ ta pidije lai ləm tɔ lé.
6 I nja ɓa to Njesigənea̰, i nja kára ba kiao,
I to njekunda dara gə dara gə́ to dɔ na̰’d dɔ na̰’d ləm,
Gə boo-nékundaje gə́ to keneŋ ləm,
Gə naŋg gə néje lai gə́ to keneŋ ləma,
Gə baa-boo-kad gə néje lai gə́ to keneŋ ləm tɔ.
I nja ɓa ar néje lai neelé d’aw kəmba ləm,
Ar boo-nékundaje gə́ dara d’unda barmba nɔḭ’g ləm tɔ.
7 I Njesigənea̰, Ala nja ɓa mbər Abram
Aree unda loo mee ɓee gə́ Ur, gə́ to ɓee lə Kaldeje teḛ
Tɔɓəi i unda ria lə Abrakam tɔ .
8 I oo to gə́ mee to danasur nɔḭ’g,
Yee ɓa i man ne rɔi aree ləm,
I un ne ndui mba kar ŋgakeaje taa ɓee lə Kana̰je
Gə Hetje gə Amɔrje gə Peresje
Gə Yebusje gə Girgasije gə́ né ka̰ dee-deḛ.
Ndá ta gə́ i pa lé i ra née ya
Mbata i to njera né gə́ danasur tɔ .
9 I oo némeeko̰ lə bɔ síje-je gə́ d’isi Ejiptə ləm,
I oo ndu no̰ lə dee ta baa-boo-kad gə́ ɓaree Baa-Kas ləm tɔ .
10 I ra nékɔbje gə néje gə́ dum koo
Koma̰ ne Parao̰ gə kuraje ləa
Gə koso-dəwje lai gə́ mee ɓee’g ləa.
Mbata i oo némeeyèrje gə́ deḛ ra gə bɔ síje-je lé,
Yee ɓa i riba ne dɔ rɔnduba ləi to gə́ i ra bèe lé tɔ .
11 I kai baa-boo-kad dana no̰ dee’g
Ar dee dəs danee’g loo gə́ tudu kurum-kurum’g,
Nɛ deḛ gə́ tuba goo dee lé
I ɔs dee ɓugu dee ɓul mán’g
To gə́ kɔr mbal gə́ oso ŋguru baa’g bèe .
12 I ɔr no̰ dee dan kàrá gə mum gə́ mbo̰ na̰ sururu ləm,
Loondul’g ndá i ɔr no̰ dee gə pər gə́ mbo̰ na̰ sururu
Gə́ ndogó rəw-kaw dee’g ar dee d’aw gée’g ləm tɔ .
13 I risi ur dɔ mbal’d gə́ Sinai
Ndá i ula dee ta gə ndui gə́ ḭ mee dara gə́ tar,
Tɔɓəi i ar dee ndukunje gə́ danasur ləm,
Gə godnduje gə́ to kankəmta ləm,
Gə tornduje ləma, gə godnduje gə́ maji dum ləm tɔ .
14 I ar dee gər ndɔ-kwa-rɔ ləi gə́ to gə kəmee ləm,
I un ndui ar dee godnduije gə tornduije
Gə ndu kura ləi Moyis ləm tɔ.
15 I ar dee muru gə́ ḭ mee dara’g
Mbata lə ɓó gə́ tɔl dee ləm,
I ar mán uba kaar mbal’g ar dee d’ai
Mbata kṵdaman gə́ tɔl dee ləm tɔ.
Tɔɓəi i ula dee mba kar dee d’aw
Mee ɓee gə́ i un ndui gə ndu manrɔ gə mba kar dee gə́ ka̰ dee lé .
16 Nɛ dee bɔ síje-je lé tel to njébeeleje ləm,
D’uba gwɔbkelkwɔije ləm tɔ.
Deḛ d’un mbi dee rəw dɔ godnduije’g ləm ,
17 Deḛ mbad kula dɔ dee ləma,
Deḛ d’ar meḛ dee wəi dɔ néraije gə́ dumkoo’g
Gə́ i ra mbata maji lə dee ləm tɔ.
Deḛ d’uba gwɔbkelkwɔi,
Gə goo kɔs ta rəw lə dee lé
Ndá deḛ ra dɔ-kədərə
Mba tel dɔ kula ɓər’g gogo.
Nɛ i to Ala gə́ si pèrèrè
Gə mba kar məəi oso lemsé ləm,
I to njemeekaw taḭ-taḭ
Gə njemeekɔrjol ləm tɔ,
Oŋg ḭ səi kalaŋ el ləm,
I to bao-meemaji ləm tɔ
Ndá i uba dee ya̰ dee el .
18 Loo gə́ deḛ léḛ lar ndaji ne ŋgon maŋg
Pa ne pana: To Ala lə neḛje
Gə́ ar neḛje n’undaje loo mee ɓee gə́ Ejiptə teḛje lé
Deḛ ra néje gə́ yèr d’ila ne boo-rɔkul dɔi’g ya .
19 Nɛ I lé, gə goo boo-meekɔrjol ləi lé
I uba dee ya̰ dee dɔdilaloo’g el
Ndá mum gə́ mbo̰ na̰ sururu
Gə́ ɔr no̰ dee rəw-kaw dee’g dan kàrá lé sané el ləm,
Pər gə́ mbo̰ na̰ sururu
Gə́ ndogó no̰ dee’g loondul’g rəw-kaw dee’g
Gə́ d’aw gée’g lé kara sané el ləm tɔ .
20 I ar dee ndili gə́ maji
Mba kar kəm dee àr ne ləm,
I ɔg dee muru ləi gə́ ḭ dara el ləma,
I ar dee mán d’ai mbata kṵdaman gə́ tɔl dee ləm tɔ.
21 As ləb rɔ-sɔ lé i ar dee né gə́ d’aw ndée mee dɔdilaloo’g
Ar né kára kara lal dee el ləm,
Kubuje lə dee ŋgisi el ləma,
Gɔl dee kara ti el ləm tɔ.
22 I ya̰ ɓeeko̰je gə ginkoji dəwje gə raŋg ji dee’g ləm,
I kai dee dɔ naŋg ləma,
Deḛ taa ɓee lə Siho̰, mbai gə́ Esbon
Gə ɓee lə Ɔg, mbai gə́ Basan ləm tɔ .
23 I ar bula lə ŋgan deeje ḭ dɔ maree’d gə́ kédé-kédé
To gə́ kéréméje gə́ dara bèe ləm,
I ar dee d’andə mee ɓee
Gə́ i un ndui ar bɔ deeje-je mba kar dee taa
Gə́ né ka̰ dee-deḛ lé ləm tɔ .
24 Bèe ɓa ŋgan deeje d’aw taa ne ɓee lé gə́ ka̰ dee ya.
I ar njéɓeeje neelé gə́ to Kana̰je lé
D’aw ŋguna-ŋguna no̰ dee’g
Ndá i ya̰ dee ji dee’g gə mbaije lə dee ləm,
Gə koso-dəwje gə́ mee ɓee’g ləm tɔ
Mba kar dee ra sə dee né to gə́ meḛ dee ndigi .
25 Deḛ taa ɓee-booje gə́ siŋga dee to ləm,
Gə dɔ naŋg koje ləm tɔ,
Deḛ taa kəije gə́ némajije ɓəd-ɓəd
Rusu meḛ dee tub-tub ləm,
Gə bwa-manje gə́ d’uru ləm,
Gə ndɔ-nduúje gə kag-koiyoje ləma,
Gə kagje gə́ d’andə gə kandə dee njim-njim
Gə́ taa loo pəl-pəl ləm tɔ.
Deḛ d’usɔ d’ar meḛ dee ndan tub-tub ləm,
D’ər ne ndɔl-ndɔl ləm tɔ,
Tɔɓəi deḛ d’isi dan néje gə́ lel dee’g
Gə goo boo-meemaji ləi ya .
26 Lé bèe kara d’ḭ d’ɔsi rəw
Deḛ d’ila godndui goo dee’g gogo ləm,
Deḛ tɔl njéteggintaje ləi
Gə́ ndəji dee kɔr mba kar dee tel ree rɔi’g lé ləm tɔ.
Tɔɓəi deḛ ra néje gə́ yèr d’ila ne boo-rɔkulje dɔi’g .
27 Yee ɓa i uba dee ya̰ dee ne ji njéba̰je’g lə dee
Ar dee d’ula kəm dee ndòo.
Nɛ mee ndɔ néurti’g lə dee lé deḛ no̰ gə́ rɔi’g
Ndá i oo ndu dee mee dara gə́ tar
Tɔɓəi gə goo boo-meekɔrjol ləi lé
I ar dee njétaa dɔ deeje
Gə́ d’aji dee ji njéba̰je’g lə dee tɔ.
28 Nɛ loo gə́ deḛ d’iŋga loo-kwa-rɔ dee ndá
Deḛ tel d’un néra gə́ majel ra nɔḭ’g ya tɔɓəi.
Togə́bè ɓa i uba dee ya̰ dee ne ji njéba̰je’g lə dee
Ar dee d’o̰ ɓee dɔ dee’g.
Yen ŋga deḛ tel no̰ gə́ rɔi’g
Ndá i oo ndu dee mee dara gə́ tar
Tɔɓəi gə goo boo-meekɔrjol ləi lé
I ɔr dee ɔm dee ne tar gɔl bula tɔ.
29 I ndəji dee kɔr mba kar dee tel ree dɔ godndui’g
Nɛ deḛ d’aar njaŋg dɔ beelé’g lə dee ləm,
D’un mbi dee rəw dɔ godnduije’g ləm,
Ndukunje ləi gə́ a kar dəw gə́ njera née a kisi ne kəmba lé
Deḛ ra kaiya d’ɔs ne rəw ləm,
Deḛ d’ɔs bag dee gə́ tar-tar d’ɔs ne ta ləi rəw ləm,
Deḛ d’uba gwɔbkelkwɔi ləma,
Deḛ mbad kila ŋgonkoji saar ləm tɔ .
30 I ila məəi po̰ dɔ dee’g ləbi bula ləm,
I ndəji dee kɔr gə ndili.
Gə rəw gə́ rɔ njéteggintaje’g ləi ləm tɔ,
Nɛ deḛ tuga mbi dee d’oo ne ta ləi el.
Togə́bè ɓa i uba dee ne ya̰ dee ne
Ji koso-dəwje gə́ to dəw-dɔ-ɓeeje’g .
31 Nɛ gə goo boo-meekɔrjol ləi lé
I tuji dee el ləm,
I uba dee ya̰ dee el ləm tɔ
Mbata i to Ala gə́ njemeekaw taḭ-taḭ ləm,
Gə njemeekɔrjol ləm tɔ.
32 Nɛ ɓasinè, əi Ala lə sí, Ala gə́ boo
Njesiŋgamoŋ gə́ to ɓəl kədm-kədm,
I gə́ aa dɔ manrɔ ləi ləm,
Ar məəi ɔr jol-jol ləm tɔ lé
Nékəmndooje lai gə́ ra síjeḛ ləm, gə mbaije lə sí ləm,
Gə ŋgan-mbaije lə sí ləm,
Gə njékinjanéməsje lə sí ləm,
Gə njéteggintaje lə sí ləm,
Gə bɔ síje-je ləma,
Gə koso-dəwje ləi lai ləm tɔ
Un kudee mee ndəa’g lə mbaije gə́ Asiri
Saar teḛ ne ɓogənè lé
Maji kari oo gə́ né gə́ lam ba kəmi’g el .
33 I to njera né gə dɔ najee dɔ néje lai gə́ teḛ dɔ sí’g ya
I ra néje lai gə goo rəbee
Nɛ jeḛ ɓa jeḛ n’raje majel.
34 Mbaije lə sí ləm,
Gə ŋgan-mbaije lə sí ləm,
Gə njékinjanéməsje lə sí ləma,
Gə bɔ síje-je ləm tɔ lé
Deḛ d’aa dɔ godnduije el ləm,
Deḛ tuga mbi dee d’oo ne ta godnduije
Gə ta ndəji kɔrje gə́ i ula dee lé el ləm tɔ.
35 Loo gə́ deḛ d’isi dan némajije’g bula
Mee ɓeeko̰ gə́ i ar dee lé ləm,
Mee ɓee gə́ tad rəg-rəg gə́ to dɔ naŋg koje ləm tɔ kara
Deḛ d’wai meḛ dee’g el ləm,
Deḛ d’uba goo némajelje lə dee d’ya̰ el ləm tɔ.
36 Nɛ aa oo, ɓogənè jeḛ n’to ɓərje.
Aa oo, jeḛ n’to ɓərje dɔ naŋg’d gə́ i ar bɔ síje-je
Mba kar dee d’usɔ kandə kagje gə́ keneŋ ləm,
Gə némajije gə́ keneŋ ləm tɔ!
37 Dɔ naŋg lé ar némajije ləa ḭ dɔ maree’g gə́ kédé-kédé
Ar mbaije gə́ i ar sí j’ulaje dɔ sí n’raje né j’ar dee lé
Mbata kaiyaje lə sí ya,
Deḛ d’o̰ dɔ darɔ sí ləm,
Gə dɔ nékulje lə sí ləm tɔ
To gə́ meḛ dee ndigi
Ndá jeḛ ɓa j’isi dan boo-nékəmndoo’g ya.
© Ngambai Bible © Alliance Biblique du Tchad 1989, 2015.
