Pər lə Njesigənea̰
1 Koso-dəwje d’im rɔ dee dɔ Njesigənea̰’g kəmee’g ya ndá né neelé lel Njesigənea̰ el. Loo Njesigənea̰ oo ndá oŋg ḭ səa pu, bèe ɓa pər lə Njesigənea̰ mbudu o̰ mbuna dee’g roo loo gə́ ŋgaŋ loo-si dee’g raga rugu-rugu. 2 Koso-dəwje no̰ gə́ rɔ Moyis’g. Bèe ɓa Moyis ra tamaji ta Njesigənea̰’g ndá pər lé wəi bèm. 3 Loo neelé d’unda ria lə Tabeera mbata pər lə Njesigənea̰ gə́ mbudu o̰ mbuna dee’g keneŋ lé.
4 Koso-dəwje gə́ gel dee ɓəd-ɓəd gə́ d’isi mbuna Israɛlje’g lé mal nésɔje ula pər meḛ dee’g, Israɛlje kara tel d’un kudu no̰ pana: See na̰ ɓa a kar sí da j’usɔ wa. 5 Meḛ sí olé dɔ ka̰jije gə́ j’usɔ Ejiptə gə́ lal ndogo ləm, kosoje ləm, wasje ləm, kam basarje ləm, ŋgureeje ləma, gə lay ləm tɔ. 6 Ɓasinè meḛ sí tudu kurum-kurum: né gə́ raŋg godo! Muru gə́ dara ya kára ba ɓa kəm sí oo.
7 Muru gə́ dara lé to asəna gə kandə kamnaḭ gə́ ɓaree kɔria̰drə ləm, ndajee to asəna gə jər gə́ ɓaree bdelium ləm tɔ . 8 Koso-dəwje d’aw daa muru neelé ndá deḛ ree d’usu dɔ mbal kusu né’g ləm, əsé d’ur mee biri’g ləm tɔ, deḛ ndiri mee jo’g ləm, d’ila gə́ bina ləm tɔ. Lel ta dee’g asəna gə bina gə́ d’ila gə ubu bèe. 9 Loo gə́ tàl wa dɔ loo-si dee’g ndá muru gə́ dara kara ree səa na̰’d tɔ .
10 Moyis oo ndu no̰ lə dəwje gə́ no̰ lé nana kara gə gel-bɔje ləa-ləa ləm, gə tarəw kəi-kubu ləa-ləa ləm tɔ. Ndá oŋg lə Njesigənea̰ ḭ səa pu asəna gə pər bèe, ar Moyis kara mée lelee ne el tɔ, 11 ndá Moyis ula Njesigənea̰ pana: See gelee ban ɓa i ula ne kəm kura ləi ndòo bèe wa, see ma m’taa kəmi el ɓa i ɔm ne koso-dəwje nee lai dɔm’g asəna gə nékodo gə́ wɔi bèe wa. 12 See to ma nja ɓa m’əskèm dəwje neelé wa, see ma nja m’oji dee ɓa i ulam pana: M’odo dee kaarm’g asəna gə njekodo ŋgon ta mbà’g saar m’teḛ ne sə dee mee ɓee gə́ i man ne rɔi mba kar bɔ deeje-je lé wa. 13 See loo gə́ ra ɓa m’a kiŋga da keneŋ mba kar koso-dəwje neelé lai wa. Mbata deḛ no̰ dɔm’g pana: M’ar neḛje da n’usɔje! 14 Ma gə karm ba m’askəm kodo dəwje neelé lai el mbata d’wɔim d’aree al dɔm sula. 15 Ɓó lé pia ɓa kən ndá ma m’ra ndòo rɔi’g, ɓó lé ma m’taa kəmi ndá maji kari tɔlm gə́ tɔl ya ɓó am m’oo némeeko̰ gə́ togə́bè lé el.
16 Njesigənea̰ ula Moyis pana: Mbo̰ dəwje rɔ-siri gə́ to ŋgatɔgje lə Israɛlje ree sə dee rɔm’g, deḛ gə́ i gər dee gə́ ŋgatɔgje lə koso-dəwje ləm, gə njékaa dɔ deeje ləm tɔ, aw sə dee kəi-kubu-kiŋga-na̰’g mba kar dee d’aar səi keneŋ na̰’d. 17 M’a ree kwɔji səi ta lée’g neelé ndá m’a kai ndil gə́ to dɔi’g lé kɔm dɔ dee-deḛ’g to mba kar dee taa ne səi nékodo gə́ wɔi gə́ to koso-dəwje lé to ɓó kari-i ɓa odo dee gə kari ba el ŋga. 18 I a kula koso-dəwje pana: Undaje rɔ sí gə kəmee mbata bèlè ndá seḭ a sɔje da mbata seḭ no̰je mbi Njesigənea̰’g pajena: See na̰ ɓa a kar sí da j’usɔje wa, mbata mee ɓee gə́ Ejiptə lé seḭ síje gə́ majee ya. 19 Seḭ a sɔje ndɔ kára ba əsé ndɔ joo ba əsé ndɔ mi ba əsé ndɔ dɔg ba əsé ndɔ rɔ-joo ba el 20 nɛ seḭ a sɔje as naḭ kára doŋgɔ, saar a teḛ baḭ əm sí’g karee tel lel sí el ŋga mbata seḭ mbadje Njesigənea̰ gə́ si mbuna sí’g ləm, mbata seḭ no̰je no̰ yoo dəa’g pajena: See ban ɓa ar síjeḛ j’undaje loo mee ɓee gə́ Ejiptə n’teḛje ləm tɔ wa.
21 Moyis pana: Koso-dəwje gə́ m’isi mbuna dee’g lé to diŋgamje gə́ to go̰-rɔje, d’as tɔl-dɔg-loo-tɔl-misa̰ nee ya ɓa, i pana: M’a kar dee da d’usɔ as naḭ kára doŋgɔ wa! 22 See d’a tḭja gwɔb badje gə maŋgje mbata lə dee mba karee as dee ya wa, əsé see d’a mbo̰ ka̰jije lai gə́ to baa-boo-kad’g mbata lə dee mba karee as dee ya wa.
23 Njesigənea̰ tel ila Moyis’g pana: See ji Njesigənea̰ na tas wa. Ɓasinè i a koo see né gə́ m’ulai lé a teḛ əsé a teḛ el wa.
Ŋgatɔgje tegginta
24 Moyis unda loo teḛ raga aw ndaji ta gə́ Njesigənea̰ ulá lé ar koso-dəwje. Yeḛ mbo̰ dəwje rɔ-siri gə́ to ŋgatɔgje lə koso-dəwje lé unda dee gugu ne dɔ kəi-kubu lé sub. 25 Njesigənea̰ teḛ dan mum’g wɔji ta gə Moyis. Yeḛ kai ndil gə́ to dəa’g lé ɔm dɔ ŋgatɔgje gə́ rɔ-siri’g lé. Loo gə́ ndil ree aar dɔ dee’g ndá léegəneeya d’ḭ tegginta, nɛ teg ɓa deḛ tegginta gə́ kédé-kédé el.
26 Dəwje joo nai loo-si dee’g, yeḛ gə́ kára ria lə Eldad ləm, yeḛ gə́ kára ria lə Médad ləm tɔ, deḛ kara ndil lé ree aar dɔ dee’g tɔ mbata ri dee to mbuna deḛ gə́ ndaŋg ri dee’g lé ya nɛ kaw ɓa d’aw kəi-kubu’g lé el, deḛ kara tegginta loo-si dee’g lé tɔ. 27 Basa kára aiŋgwɔd aw ula Moyis taree pana: Eldad deḛ gə Médad d’aw tegginta loo-si dee’g tɔ.
28 Juje, ŋgolə Nun, yeḛ gə́ to kura lə Moyis gə kasee ba lé un ta pa pana: Mbai ləm, Moyis, maji kari ɔg dee dɔ’g ya! 29 Moyis ilá keneŋ pana: See i ra kəmkəḭ dɔ dee’g mbata ləm-ma wa. Né gə́ m’ndiŋga lé to mba kar koso-dəwje lə Njesigənea̰ lai ya to gə́ njéteggintaje ɓa, maji kar Njesigənea̰ ɔm Ndilee dɔ dee’g ya! 30 Moyis deḛ gə ŋgatɔgje lé tel d’aw loo-si dee’g.
31 Njesigənea̰ ar lel-boo ḭ par gə́ baa-boo-kad’g ree gə biriwije ɔm dee gir loo-si dee’g gugu ne dɔ loo-si dee sub, ar tadee lé, k’ḭ kelee gə́ kára kaw kelee gə́ kára’g lé as njaa ndɔ kára. D’aw dɔ na̰’d rib-rib ar ndər dee gə́ ḭ naŋg gə́ tar lé as kəmkil dəw joo. 32 Mee ndəa’g neelé dan kàrá gə loondul’g ləm, gə bèlè lookaree ləm tɔ lé, dəwje d’ḭ d’aw d’wa biriwije, yeḛ gə́ wa dee sur el ɓa wa dee as nékwɔji kwɔi-lə-né tɔl-dɔg-loo bula. Deḛ naji dee mbələŋ-mbələŋ gir loo-si dee’g. 33 Loo gə́ dakasee to ŋgaŋ dee’g lal kar dee d’usɔ ya ɓəi ndá oŋg lə Njesigənea̰ ḭ səa pu dɔ koso-dəwje’g lé tɔɓəi Njesigənea̰ unda koso-dəwje neelé gə yoo-koso. 34 Loo neelé d’unda ria lə Kibrot-Hataaba mbata lé neelé ɓa deḛ dubu yoo-dəwje gə́ mal nésɔ ula pər meḛ dee’g lé keneŋ.
35 Koso-dəwje d’ḭ Kibrot-Hataaba mba kaw Haserot ndá d’wa naŋg Haserot d’isi keneŋ tɔ.
© Ngambai Bible © Alliance Biblique du Tchad 1989, 2015.
