Loo gɔl pərndɔje
1 Njesigənea̰ ula Moyis pana : 2 Ula Aaro̰ ta togə́bè pana: Loo gə́ i a kunda pərndɔje dɔ kagee’g lé ndá pərndɔje gə́ siri lé d’a ndogó loo gə́ no̰ kag pərndɔje’g lé.
3 Aaro̰ ra togə́bè ya: yeḛ unda pərndɔje lé dɔ kagee’g to gə́ Njesigənea̰ un ne ndia ar Moyis lé. 4 Kag pərndɔ lé deḛ ra gə larlɔr gə́ ra kəi-kɔrɔ un kudee gɔlee gə́ naŋg saar teḛ loo gə́ ra né keneŋ asəna gə pudee bèe lé. To yee gə́ ra gə larlɔr gə́ ra kəi-kɔrɔ ya, kag pərndɔ neelé Moyis ra gə goo tɔji gə́ Njesigənea̰ tɔjee lé ya.
Kunda Ləbije gə kəmee kwɔji ne dɔ kula lə Ala
5 Njesigənea̰ ula Moyis pana: 6 Ɔr Ləbije mbuna Israɛlje’g ndá ɔr won dee unda dee ne gə kəmee. 7 Aa oo, né gə́ i a gə ra mba kɔr ne won dee ɓa nee: I a saga mán gə́ ka̰ kuga dɔ kaiya dɔ dee’g ndá a kar dee ndisa bḭ rɔ deḛ lai ləm, a kar dee togo kubuje lə dee ləm tɔ, mba kɔr ne won dee ya. 8 Gée gə́ gogo d’a kwa bɔ maŋg kára kunda dɔ nékard gə́ wɔji dəa gə́ to nduji gə́ ndá léréré gə́ mbɔḭ gə ubu, tɔɓəi i a kwa bɔ maŋg gə́ raŋg mbata nékinjaməs gə́ ka̰ kuga dɔ kaiya tɔ. 9 I a kar Ləbije lé ree pər gə́ no̰ kəi-kubu-kiŋga-na̰’g ləm, i a ɓar koso-dəwje lə Israɛlje lai keneŋ ləm tɔ. 10 I a kar Ləbije lé ree pər gə́ no̰ Njesigənea̰’g ndá, Israɛlje d’a kila ji dee dɔ dee’g. 11 Aaro̰ a kar Ləbije lé tel rɔ dee yo gə́ nee no̰ Njesigənea̰’g to gə́ Israɛlje ra ne gə nékar lə dee bèe, ndá d’a to gə kəmee mba ra kula lə Njesigənea̰ ya. 12 Ləbije lé d’a kɔm ji dee dɔ bɔ maŋgje’g ndá, i a kinja yee gə́ kára gə́ nékinjaməs gə́ ka̰ kuga dɔ kaiya ləm, gə yee gə́ raŋg gə́ nékinjaməs gə́ ka̰ roo ləm tɔ mba kuga ne dɔ kaiya lə Ləbije lé tɔ. 13 I a kar Ləbije d’aar tar no̰ Aaro̰’g ləm, gə no̰ ŋganeeje gə́ diŋgam’g ləm tɔ ndá i a kar dee tel rɔ dee yo gə́ nee asəna gə nékar gə́ d’ar Njesigənea̰ bèe. 14 I a kunda kəm Ləbije ɓəd mbuna Israɛlje’g mba kar Ləbije lé d’a to kamaje ya doŋgɔ doi.
15 Gée gə́ gogo ndá Ləbije lé d’a ree gə mba ra kula mee kəi-kubu-kiŋga-na̰’g. Yee gə́ bèe ɓa i a kɔr ne won dee ləm, i a kar dee tel ne rɔ dee yo gə́ nee asəna gə nékar ləm tɔ. 16 Mbata deḛ to kamaje ya doŋgɔ doi mbuna Israɛlje’g, ma m’ɔr dee gə́ kamaje ya tor ŋgandərje’d gə́ to ŋgandər Israɛlje lai. 17 Mbata ŋgondər gə́ rara kara mbuna Israɛlje’g lé to gə́ kama ya doŋgɔ doi, ŋgandər dəwje ləm, gə ka̰ daje ləm tɔ, mee ndəa gə́ m’unda ne ŋgandərje mee ɓee gə́ Ejiptə lé m’ɔr dee m’unda dee gə kəmee gə́ kamaje ya . 18 Yee ɓa ma m’ɔr ne Ləbije tor ŋgandər Israɛlje’g lai. 19 Tɔɓəi ma m’ɔr Ləbije ya doŋgɔ mbuna Israɛlje’g m’ar Aaro̰ gə ŋganeeje gə́ diŋgam mba kar dee ra kula lə Israɛlje mee kəi-kubu-kiŋga-na̰’g ləm, mba kar dee ra nékoga dɔ kaiya mbata lə Israɛlje ləma, gə mba kar rɔko̰ yoo-koso kára kara oso dɔ Israɛlje’g loo gə́ deḛ ree loo gə́ to gə kəmee’g lé el ləm tɔ.
20 Moyis gə Aaro̰ gə koso-dəwje lə Israɛlje lai lé ra gə Ləbije néje lai gə́ Njesigənea̰ un ne ndia ar Moyis wɔji ne dɔ Ləbije lé, yee ɓa Israɛlje ra sə dee bèe ya. 21 Ləbije lé d’ɔr won rɔ dee ləm, deḛ togo kubuje lə dee ləm tɔ, Aaro̰ ar dee tel rɔ dee gə́ yo gə́ nee asəna gə nékar gə́ d’ar Njesigənea̰, tɔɓəi yeḛ ra nékoga dɔ kaiya mbata lə dee gə mba kɔr ne won dee. 22 Gée gə́ gogo ndá Ləbije lé ree gə mba ra kula lə dee mee kəi-kubu-kiŋga-na̰’g kəm Aaro̰’g gə kəm ŋganeeje gə́ diŋgam’g, gə goo né gə́ Njesigənea̰ un ne ndia ar Moyis wɔji ne dɔ Ləbije lé: yee ɓa deḛ ra sə dee bèe ya.
23 Njesigənea̰ ula Moyis pana: 24 Aa oo, ta gə́ wɔji dɔ Ləbije lé ɓa nee: Ləbi gə́ rara kara gə́ ləbee aḭ rɔ-joo-giree-mi gə́ tar ndá, yeḛ a kandə loo kula’g mee kəi-kubu-kiŋga-na̰’g mba ra kula gə́ wɔji dəa keneŋ gə́ kédé-kédé ya. 25 Un kudee loo gə́ ləbee aḭ rɔ-mi ndá yeḛ a kya̰ kula gə́ wɔji dəa lé ŋga ɓó a tel ra el ŋga. 26 Nɛ yeḛ a la gə ŋgakea̰je mee kəi-kubu-kiŋga-na̰’g mba ŋgəm né gə́ d’ɔm ji dee’g ɓó yeḛ a ra kula gə́ wɔji dəa keneŋ el ŋga. I a ra togə́bè kwɔji ne dɔ Ləbije mbata lə kula ra dee gə́ wɔji dɔ dee dɔ dee.
© Ngambai Bible © Alliance Biblique du Tchad 1989, 2015.
