Gosota-kəmkàrje lə Salomo̰
1 Ŋgon gə́ njekəmkàr lé
To nérɔlel lə bɔbeeje,
Nɛ ŋgon gə́ to mbə lé
To nékəmndoo lə kea̰je.
2 Nébaoje gə́ gə goo rəbee el lé
Majee godo,
Nɛ néra gə́ gə dɔ najee lé
Ɔr dəw ta yoo’g.
3 Njesigənea̰ ya̰ njemeekarabasur
Ar ɓó ula kəmee ndòo el,
Nɛ yeḛ ɔs mal né gə́ ra njemeeyèr ŋgwɔd-ŋgwɔd lé rəw.
4 Dəw gə́ ra né gə jiŋgaombadə ndá
A si gə́ njendoo,
Nɛ ji dəwje gə́ rɔ dee wɔilɔ pélé-pélé loo kula’g lé
Ar dee tel to ne baoje tɔ.
5 Yeḛ gə́ wa dɔ gɔl néje naḭ kinja kó’g lé
To ŋgon gə́ unda kəmkàr dɔ rəa’g,
Nɛ yeḛ gə́ toɓi naḭ kinja kó’g lé
To ŋgon gə́ ila rɔkul dɔ loo’g.
6 Ndutɔrje to dɔ njemeekarabasur’g,
Nɛ néra gə́ kərm-kərm lé
Taa ta njémeeyèrje pəl-pəl.
7 Njemeekarabasur lé meḛ dəwje olé dəa’g gə ndutɔr,
Nɛ njémeeyèrje lé ndum d’oso ludu gə ri dee dɔ dee’g bura.
8 Yeḛ gə́ kəmkàr to mée’g lé
Taa godnduje,
Nɛ ta mbə gə́ to ta dəw’g lé
Aw səa gə́ loo tuji’g.
9 Yeḛ gə́ njaa danasur lé
A nda mée kaḭ dɔ loo kabee’g,
Nɛ yeḛ gə́ un rəwje gə́ nduni koŋ-koŋ lé
Gelee a teḛ gə́ raga ɓəi.
10 Yeḛ gə́ iya dɔ kankəmta gə mareeje lé
Ar dee d’isi ne dan kəmndoo’g,
Nɛ yeḛ gə́ ula dee ta təsərə lé
Ar dee d’isi ne dan meelɔm’g.
11 Ta njemeekarabasur lé
To ŋgira-mán kəmə,
Nɛ néra gə́ kərm-kərm
Taa ta njémeeyèrje pəl-pəl.
12 Kḛji loo bəḭ-bəḭ ɔs gel takɔlje,
Nɛ meenoji ɔn dɔ kaiyaje lai .
13 Dəw gə́ njegosonégər lé
Ta kəmkàr to təa’g,
Nɛ ndəi to mbata dəw
Gə́ kəmkàr na mée tas.
14 Njékəmkàrje lé mbo̰ négər d’undá kul,
Nɛ ta mbə-dəw lé to tuji gə́ to mbɔree’g dəb.
15 Nébao lə bao lé
To ɓee-boo gə́ siŋga to kɔgərɔ,
Nɛ ndòo lə njéndooje lé
To gə́ tuji lə dee.
16 Kula ra njemeekarabasur lé
To gə mba si ne kəmba,
Nɛ nékiŋga lə njemeeyèr lé
To gə mba ra ne kaiya.
17 Yeḛ gə́ ar mée olé dɔ takwɔji-kəmkàr’g lé
Taa rəw gə́ ka̰ si kəmba,
Nɛ yeḛ gə́ mée wəi dɔ ta’d gə́ pa səa lé
Ndəm rəw.
18 Yeḛ gə́ iya dɔ kḛji loo bəḭ-bəḭ mée’g lé
Tea pa taŋgɔm,
Tɔɓəi yeḛ gə́ təd ta unda ta maree’g lé
To mbə-dəw.
19 Dəw gə́ pata yaa̰-yaa̰ lé
A lal ra kaiya el,
Nɛ yeḛ gə́ ɔg təa dɔ’g lé
To dəw gə́ kəmee àr.
20 Ndo̰ njemeekarabasur lé
To larnda gə́ maji dum,
Nɛ mee njemeeyèr lé
To né gə́ əḭ el.
21 Ta njemeekarabasur lé
Ul dəwje bula,
Nɛ mbəje d’wəi
Mbata kəmkàr lal meḛ dee.
22 Ndutɔr lə Njesigənea̰ ɓa
Ar dəw tel to ne bao,
Tɔɓəi yeḛ ila nékəmndoo kára kara dɔ’g el.
23 Ra majel lé mbə oo gə́ néndam,
Nɛ kəmkàr to ka̰ njegosonégər.
24 Né gə́ njemeeyèr ɓəl lé
To né gə́ teḛ dəa’g,
Nɛ né gə́ njémeekarabasurje ndiŋga lé
Ala ar dee ya.
25 To gə́ lel-mal dəs aw lé
Njemeeyèr kara sané pá bèe ya tɔ,
Nɛ njemeekarabasur lé
Ŋgirá kiriŋ naŋg kiriŋ-kiriŋ gə no̰.
26 To gə́ mán-nduú gə́ mas tɔl ŋgaŋ dəw ləm,
Sa pər ra kəmee ləm tɔ lé
Njedab kara to togə́bè
Mbata deḛ gə́ d’ulá tɔ.
27 Ɓəl Njesigənea̰ lé
Ila ndɔje dɔ maree’g,
Nɛ ləb njémeeyèrje to ɗegəse ba.
28 Ŋgina né lə njémeekarabasurje to rɔlel,
Nɛ meekundayel lə njémeeyèrje a sané pá.
29 Rəw lə Njesigənea̰ to gə́ njo̰loo-kula-dɔ
Le dəw gə́ njera nédanasur,
Nɛ yeḛ to rəw gə́ tuji
Le deḛ gə́ njéra némajelje.
30 Njemeekarabasur a kunda ndolé nda̰ el,
Nɛ njémeeyèrje d’a si mee ɓee’g el.
31 Ta njemeekarabasur teḛ gə ta kəmkàr,
Nɛ ndo̰ njera nékori-kori lé
D’a kwa rɔd kɔr.
32 Ta njemeekarabasur
Gər ta gə́ maji kəm pa,
Nɛ ta njémeeyèrje lé
Gər pata gə́ kori-kori.
© Ngambai Bible © Alliance Biblique du Tchad 1989, 2015.
