Kaiya-dené ər kəm basa
1 Ŋgonəm, aa dɔ taje ləm ləm,
Gə dɔ torndumje kər-kər ləm tɔ.
2 Aa dɔ torndumje ndá i a si ne kəmba,
Ŋgəm tandooje ləm tɔ gə́ ŋgonkəmi bèe.
3 Ndəm jii dɔ dee’g ləm,
Ndaŋ dee dɔ ɓəŋgəri’g ləm tɔ.
4 Ula kəmkàr lé pana: I to kɔnanəm!
Tɔɓəi ɓar gosonégər njenoji ləi to
5 Mba kar dee d’aa dɔi
D’ɔgi ne dɔ kaiya-dené’g,
Dɔ dené gə́ raŋg’d gə́ to njetaje gə́ rii.
6 Ma m’aar mbɔr kəmbolè kəi’g ləm
M’aa loo kəm ba̰də-lar’g ləm.
7 M’aa loo m’oo mbuna deḛ gə́ to njégərnéelje’g, mbuna basaje’g lé
Ndá m’oo ŋgon gə́ kəmkàr na mée tas.
8 Yeḛ dəs tar mba̰-rəw gə́ mbɔr duu-loo’g,
Loo gə́ dené kára mbuna denéje’g neelé aar keneŋ.
Ndá yeḛ njaa jan-jan par gə́ kəi-siée’g,
9 To loo gə́ kàr andə ar loo to piro-piro,
Ar loondul lé ndul njudu-njudu ya.
10 Ndá dené lé ree iŋgá,
Dené lé ula kubu-kərkəmloo rəa’g ləm,
Gosɔ kərkəmloo rusu mée ləm tɔ.
11 Yeḛ to njetaɓar gə́ dəa kədərə,
Gɔlee wa naŋg kəi ləa el,
12 Loo gə́ na̰je aar mba̰-rəw’g,
Loo gə́ na̰je aar ndaa-loo’g
Mbɔr goŋ-rəwje’g lai lé
Yeḛ um loo keneŋ.
13 Yeḛ ubá wá kaaree’g sud,
Il ɓɔlee ləm,
Yeḛ oo kəmee ŋgemsè-ŋgemsè
Ulá ne pana:
14 Nékinjaməs gə́ ka̰ meekulɔm to rɔm’g nee,
Ɓogənè m’tɔl ta ndukun ləm bém ŋga.
15 Gelee gə́ nee ɓa m’teḛ ne raga gə mba kiŋgai
Mba saŋg k’oo kəmi ndá m’iŋgai ya tɔ.
16 Ma m’lab pal-kubu gə́ ndər dɔ tira’g ləm ləm,
Gə ragaa gə́ d’ṵji gə kúla gə́ Ejiptə ləm tɔ.
17 Ma m’ɔm néje gə́ ə̰də sululu loo-toom’g:
Ubu timbá ləm, mán ko̰-ndujaje ləma,
Gə mán gobo ləm tɔ.
18 Gə́ ree ar sí n’toje gə na̰
Saar kar loo àr dɔ sí’g ləm,
Ar sí j’ya̰je rɔ sí gə rɔlel j’arje malee
Ɔr ta sí’g loo-to gə na̰’g lé ɓa.
19 Mbata ŋgabmje godo kəi,
Yeḛ aw mbá gə́ əw,
20 Yeḛ un ɓɔl-lar ləa jia’g
Ndá saar loo gə́ naḭ a ndá ɓa
Yeḛ a tel ree ɓəi.
21 Yeḛ su kəmee gə boo-taje gə́ teḛ təa’g ləm,
Yeḛ ndɔree gə taje gə́ rii gə́ teḛ təa’g ləm tɔ.
22 Yeḛ ḭ gə́ lé gən ya oso gée’g aw səa
Asəna gə bɔ maŋg gə́ d’aw səa gə́ loo-tɔlee’g ləm,
Asəna gə́ mbə-dəw gə́ təa gə mba kaw kwɔjee kəmkàr ləm tɔ.
23 Saar ar kandə ɓandaŋg mbudu wurndulee,
Asəna gə yel gə́ ḭ kalaŋ aw uru jám’g
Lal gər to gə́ to né yée bèe.
24 Bèe ndá ɓasinè ŋganəmje, ooje ta ləm,
Urje mbi sí ooje ne taje gə́ teḛ tam’g ləm tɔ.
25 Rəw-kaw dené gə́ togə́bè lé
Maji kar məəi taa el ləm,
Maji kari ndəm oso kila-rəwje’g ləa el ləm tɔ.
26 Mbata yeḛ ar dəwje bula d’oso d’iŋga doo ləm,
Deḛ lai gə́ yeḛ tɔl dee lé
Deḛ dum tura ləm tɔ.
27 Kəi ləa to rəw gə́ aw gə́ ɓee lə njé gə́ d’wəi’g ləm,
Yee aw gə́ ɓee lə yoo ləm tɔ.
© Ngambai Bible © Alliance Biblique du Tchad 1989, 2015.
