Pa ɓar dəwje kar dee pidi ne Njesigənea̰
1 Pa pidi lé.
Seḭ dəwje lai gə́ síje dɔ naŋg neelé
Ɔrje ndu sí wəl gə rɔlel par gə́ rɔ Njesigənea̰’g.
2 Raje né arje Njesigənea̰ gə rɔlel ləm,
Reeje nea̰’g gə boo-rɔkal ləm tɔ.
3 Maji kar sí gərje gao
To gə́ Njesigənea̰ lé to Ala ya.
Yeḛ nja ɓa to njekunda sí ləm,
Jeḛ n’toje kea̰-yeḛ nja ləm tɔ.
Jeḛ n’toje koso-dəwje ləa ləm,
Jeḛ n’toje koso-nékulje
Gə́ d’aar loo-ko̰-mu’g ləa ləm tɔ.
4 Maji kar sí a̰dje tarəwkəije’g ləa gə pa pidije ləm,
A̰dje gadlooje’g ləa gə pakɔsje ləm tɔ.
Ilaje riɓar dəa’g arje dɔ ria ai səgərə.
5 Mbata Njesigənea̰ lé to gə́ njemaji dum,
Meemaji ləa to saar-saar gə no̰,
Meenda londoŋ ləa lé ḭ dɔ maree’d gə́ kédé-kédé
Mbata lə ŋgaka dəwje-dəwje.
© Ngambai Bible © Alliance Biblique du Tchad 1989, 2015.
