Ndukun lə Mbai lé
1 Pakɔs lə Dabid.
M’a kɔs pa meemaji gə néra gə́ gə dɔ najee lé.
M’a kɔs pa neelé kari-i Njesigənea̰ ya.
2 M’a kunda kəmkàr dɔ rɔm’g dɔ rəw gə́ danasur’g.
See ndɔ gə́ ra ɓa i a ree pər gə́ rɔm’g ɓəi wa.
Ma lé m’a njaa mbuna njémeekəije’g ləm lé gə meendakaḭ.
3 M’a kar némajel kára kara to nɔm’g el,
Néra njékaiyaje lé to kḛji kəm’g,
Néra deeje lé m’a tibi mbɔree el.
4 Meekɔs ŋgwɔḭ lé m’a kunda ɓad gə́ raŋg ləm,
Njemeeyèr lé kara ma m’ndigi kwá gə́ rɔm’g el ya ləm tɔ.
5 Yeḛ gə́ təd ta unda ta maree’g gə goo ŋgəḭ lé
M’a karee udu bo̰ ya,
Yeḛ gə́ aa loo gə beelé əsé ti-rɔ kara
M’a kila məəm po̰ dəa’g el.
6 Majikojije gə́ mee ɓee’g neelé m’a korè kəm ndəŋ dɔ dee’g
Gə mba kar dee d’isi ne mbɔrm’g dəb,
Yeḛ gə́ njaa rəw gə́ danasur lé ndá
Yeḛ a to kura ləm ya tɔ.
7 Yeḛ gə́ ya̰ rəa yag dan kərgoso’g lé ndá
Yeḛ a si mee kəi’g ləm lé nda̰ el ləm,
Yeḛ gə́ pa taŋgɔm lé kara
A kaar nɔm’g nda̰ el ya ləm tɔ.
8 Teḛ gə ndɔ rad gə ndɔje kára-kára lai lé
M’a kar njémeeyèrje lai gə́ mee ɓee’g neelé
D’udu guduru ya
Ɓó gə mba tuji ne deḛ lai gə́ to njéra né kori-korije
Mee ɓee-boo’g lə Njesigənea̰ lé pugudu-pugudu ya.
© Ngambai Bible © Alliance Biblique du Tchad 1989, 2015.
