Pakɔs ndɔ ra naḭ Pag’g
1 Loo gə́ Israɛlje d’unda loo mee ɓee gə́ Ejiptə’g teḛ lé
Loo gə́ gel-bɔje lə Jakob
D’unda rɔ dee ɓad rɔ koso-dəwje gə́ takɔji dee to ɓəd’g tɔ ndá
2 Dɔ naŋg ɓee gə́ Juda tel to loo-si Njesigənea̰ gə́ to gə kəmee doi ləm,
Ɓee gə́ Israɛl tel to dɔ naŋg ləa ləm tɔ.
3 Baa-boo-kad lé oo né neelé ndá
Aḭ aw əw ləm,
Man baa gə́ Jurdɛ̰ lé kara
Rəm ula gə́ gogo ləm,
4 Mbalje lé tal jagəra-jagəra to gə́ bàl bya̰je bèe ləma,
Dɔ diŋgri mbalje lé kara tal jagəra-jagəra asəna gə ŋgan badje bèe ləm tɔ.
5 I Baa-boo-kad lé
See ɗi ɓa rai ɓa aḭ aw əw bèe wa.
Esé i mán baa gə́ Jurdɛ̰ lé
See ɗi ɓa rai ɓa i rəm ula ne gə́ gogo ɓəi wa.
6 Seḭ mbalje lé
See ɗi ɓa ra sí ɓa talje jagəra-jagəra to gə́ bàl bya̰je bèe wa.
Esé seḭ dɔ diŋgri mbalje lé
See ɗi ɓa ra sí ɓa tel talje jagəra-jagəra asəna gə ŋgan badje ne ɓəi wa.
7 Ǝi naŋg, maji kari unda bala tigi-tigi no̰ Mbaidɔmbaije’g
Gə́ to Ala lə Jakob.
8 Yeḛ lé ar biri mbal tel to duu-mán ləm,
Biri mbal gə́ kədərə kaw-kaw lé kara
Aree tel to kəm-rəw-mán gə́ aḭ kuji-kuji ləm tɔ.
© Ngambai Bible © Alliance Biblique du Tchad 1989, 2015.
