Pa kula rɔnduba dɔ Ala gə́ Njesikəmba’g
1 Maji kar sí pidije Njesigənea̰.
Pidije ri Njesigənea̰ lé
Seḭ kuraje lə Njesigənea̰ lé pideeje,
2 Seḭ gə́ aarje mee kəi’g lə Njesigənea̰
Gə́ aarje gadlooje’g takəi’g lə Ala lə sí lé!
3 Maji kar sí pidije Njesigənea̰
Mbata Njesigənea̰ lé to njemeemaji,
Ɔsje pa arje ria ɓar ne
Mbata yeḛ to njekwa sí gə́ rəa’g.
4 Mbata Njesigənea̰ lé nja ɓa mbər Jakob ləm,
Ar Israɛl to gə́ kea̰ nja doŋgɔ doi ləm tɔ.
5 Ma m’gər gao Njesigənea̰ lé to gə́ boo,
Mbaidɔmbaije lə sí lé ur dɔ magəje’g lai ya.
6 Néje lai gə́ Njesigənea̰ ndigi lé ndá yeḛ ra ya,
Néje gə́ mee dara’g gə dɔ naŋg nee ləm,
Dan baa-boo-kadje’g gə dan ɓul manje’g lé ləm tɔ.
7 Yeḛ ar kil-lə ndi ḭ gwɔi naŋg’g aw tar ləm,
Yeḛ ar ndi tel gə ndi ər ləma,
Yeḛ ɔr lel dan nébaoje’g ləa aree ula ləm tɔ.
8 Yeḛ kunda ŋgandər njé gə́ Ejiptə vaga-vaga tɔl dee
Un kudee dɔ dəwje’g teḛ ne dɔ nékulje’g ya tɔ.
9 Yeḛ ula gə nétɔjije
Gə nékɔbje mbuna njé gə́ Ejiptə’g
Koma̰ ne Parao̰ gə kuraje ləa lai.
10 Yeḛ kunda ginkoji dəwje gə raŋg bula ləm,
Yeḛ tɔl mbaije gə́ to njésiŋgamoŋje ləm tɔ:
11 Siho̰, mbai gə́ ɓee lə Amɔrje ləm,
Gə Ɔg, mbai gə́ ɓee lə Basanje ləma,
Gə mbaije lai gə́ Kana̰ lé ləm tɔ.
12 Yeḛ ar ɓeeje lə dee to gə́ nénduba
To nénduba lə Israɛlje gə́ to koso-dəwje ləa lé.
13 Njesigənea̰, rii lé to saar-saar gə no̰,
Njesigənea̰, meḛ ginka dəwje-dəwje lé olé dɔi’d gə́ kédé-kédé ya.
14 Mbata Njesigənea̰ a gaŋgta dɔ koso-dəwje’g ləa lé ləm,
Yeḛ a koo kəmtondoo lə kuraje ləa ya ləm tɔ.
15 Magəpoleje lə ginkoji dəwje gə raŋg lé
To néje gə́ ra gə larnda gə larlɔr ləm,
To néje gə́ dəwje ɓa ra gə ji dee-deḛ ya ləm tɔ.
16 Ta dee to keneŋ ya
Nɛ dee pa ne ta el ləm,
Kəm dee to keneŋ ya
Nɛ d’oo ne loo el ləm,
17 Mbi dee to keneŋ ya
Nɛ d’oo ne ta el ləma,
Kəmə gə́ bèe ya kara
Teḛ ta dee’g el ləm tɔ.
18 Deḛ gə́ njéra deeje ləm,
Gə deḛ lai gə́ d’ɔm meḛ dee dɔ dee’g ləm tɔ lé
To tana sə dee pai-pai ya.
19 Seḭ ginkoji Israɛlje lé
Undaje no̰ dɔkaisəgərə lə Njesigənea̰,
Seḭ ŋgaka Aaro̰ lé
Undaje no̰ dɔkaisəgərə lə Njesigənea̰ ya.
20 Seḭ gel-bɔje lə Ləbi lé
Undaje no̰ dɔkaisəgərə lə Njesigənea̰ lé.
Seḭ gə́ ɓəlje Njesigənea̰ lé
Undaje no̰ dɔkaisəgərə lə Njesigənea̰ ya tɔ.
21 Maji kar njé gə́ Sio̰
Gə deḛ gə́ d’isi Jerusalem lé
D’unda no̰ dɔkaisəgərə lə Njesigənea̰.
Pidije Njesigənea̰ ya.
© Ngambai Bible © Alliance Biblique du Tchad 1989, 2015.
