Seḭ nékundaje lə Ala maji kar sí pideeje
1 Maji kar sí pidije Njesigənea̰!
Seḭ gə́ síje sém dara’g, pidije Njesigənea̰,
Seḭ gə́ síje dɔ looje gə́ ndəw’g lé pideeje.
2 Seḭ kuraje ləa gə́ dara lai lé pideeje,
Seḭ boo-néje ləa lai gə́ dara kara pideeje.
3 Kàr gə naḭ, pideeje,
Seḭ kéréméje lai gə́ ndoḭje wər-wər lé pideeje.
4 Seḭ dara gə́ dɔ na̰’d na̰’d lé pideeje,
Seḭ manje gə́ toje dɔ dara gə́ tar lé pideeje.
5 Maji kar dee pidi ri Njesigənea̰ ya
Mbata yeḛ pata gə ndia ya ndá deḛ to keneŋ.
6 Yeḛ ar dee to njaŋg saar gə no̰,
Yeḛ ar godndiaje to keneŋ ndá yeḛ pəl ta dɔ’g el.
7 Seḭ gə́ gel naŋg’d bər lé pidije Njesigənea̰,
Seḭ da-kɔbje gə́ dan baa-boo’g ləm,
Seḭ ɓul manje lai ləm,
8 Pər gə ndi kwɔji ləm, kwɔji gə mumje ləm,
Lelje gə́ d’ula mbḭ-mbḭ gə́ ra torndia ləm,
9 Mbalje gə dɔ diŋgri looje lai ləm,
Kag-sɔje gə kag-sɛdrəje ləm,
10 Daje gə́ wala gə nékulje lai ləm,
Néje gə́ d’ag naŋg gə yelje ləm,
11 Seḭ mbaije gə́ dɔ naŋg nee ləm,
Gə koso-dəwje lai ləm,
Seḭ mbaije gə́ njégaŋ-rəwtaje gə́ dɔ naŋg neelé ləm,
12 Seḭ basaje gə ŋgama̰dje ləma,
Seḭ ɓugaje gə ŋganje ləm tɔ lé
13 Maji kar sí-seḭ lai pidije ri Njesigənea̰ ya
Mbata ria-yeḛ ya kára ba to ri gə́ maji dum ləm,
Boo-ronduba ləa ur dɔ naŋg nee gə dara ləm tɔ.
14 Yeḛ ar siŋga koso-dəwje ləa tel ḭ dɔ maree’g,
Yee ɓa gə́ népidi mbata lə majikojije ləa lai ləm,
Mbata lə Israɛlje gə́ d’isi mbɔree’g dəb ləm tɔ.
Maji kar sí pidije Njesigənea̰ ya.
© Ngambai Bible © Alliance Biblique du Tchad 1989, 2015.
