Rɔnduba lə majikojije
1 Maji kar sí pidije Njesigənea̰!
Ɔsje pa gə́ sigi arje Njesigənea̰.
Ɔsje pa pideeje ne mbuna ŋgankojije’g!
2 Maji kar Israɛlje nda meḛ dee kaḭ
Dɔ yeḛ gə́ to njekunda dee’g ləm,
Ŋganje gə́ Sio̰ kara maji kar dee d’isi dan boo-rɔlel’g
Mbata yeḛ to mbai lə dee ləm tɔ.
3 Maji kar dee pidee gə ndam lə dee ləm,
D’ila riɓar dəa’g gə dalè bajiŋ gə kṵdu-kag ləm tɔ.
4 Mbata Njesigənea̰ ar rəa lelee dɔ dəwje’g ləa,
Njénékəmndooje lé yeḛ aji dee ula ne rɔnduba dɔ dee’g tɔ.
5 Maji kar majikojije d’un baŋga
D’ula ne rɔnduba dəa’g ləm,
Maji kar dee d’ɔs gajee loo-to dee’g ləm tɔ.
6 Maji kar ta pidi Ala to ta dee’g ləm,
Maji kar kiambas gə́ adə gə́ ŋgaŋgee joo lé
To ji dee’g kel-kel ləm tɔ
7 Gə mba dal ne ba̰ ginkoji dəwje gə raŋg ləm,
Mba kar bo̰ néra koso-dəwje ɔs ne ta dee’g bɔsɔrɔ ləm,
8 Gə mba tɔ mbaije lə dee gə kúla lar ləm,
Gə mba kila ɗa lar gɔl dəwje gə́ boo’g lə dee ləma,
9 Gə mba gaŋg ne rəwta dɔ dee’g
Gə goo taree gə́ ndaŋg mee maktub’g ya ləm tɔ.
Yee ɓa to rɔnduba lə majikojije lai.
Maji kar sí pidije Njesigənea̰ ya.
© Ngambai Bible © Alliance Biblique du Tchad 1989, 2015.
