Rɔlel lə dəw gə́ Njesigənea̰ təa ta yoo’g
1 Pa lə Dabid
Ǝi Ala! Maji kari tɔs kəmi dɔm’g
Mbata i nja ɓa to njo̰loo-kula-dɔ ləm.
2 Ma m’ula Njesigənea̰ m’pana:
I lé to mbai dɔm ləm,
I to némaji ləm gə́ ur dɔ néje’g lai ləm tɔ.
3 Njémeendaje gə́ d’isi mee ɓee’g lé
Deḛ gə́ to njékwa Ala meḛ dee’gje lé
M’unda dee dan kəm’g dana ɗəŋgərə.
4 Dəwje d’ar magə-poleje lə dee ḭ dɔ maree’d gə́ kédé-kédé ləm,
Deḛ d’aḭ gə́ rɔ magəje gə́ raŋg’d ləm tɔ,
Məs nékinjanéməsje lə dee gə́ deḛ saga naŋg lé
M’a saga sə dee pai godo ləm,
Ri dee kara m’a karee teḛ tam’g el ləm tɔ.
5 Njesigənea̰ ɓa to nénduba ləm, gə ŋgo-kai-mán ləm ləm tɔ,
I nja ar né gə́ wɔji dɔm to njaŋg,
6 Né gə́ wɔji dɔm lé to né gə́ lelm yaa̰ ləm,
Né kama lé to né gə́ maji dum ləm tɔ.
7 Ma m’pidi Njesigənea̰ gə́ njekwɔjim kəmkàr lé,
Dan loondul’g ya kara takə̰ji ləm tɔjim kəmkàr ya.
8 Njesigənea̰ lé m’undá nɔm’g ta-ta,
Mbata yeḛ aar dɔ jikɔlm’g
Mba kam m’unda ne ndolè nda̰ el .
9 Gelee gə́ nee ɓa m’isi ne dan rɔlel’g ləm,
Ndiləm al ne rəa gə boo-rɔkal ləma,
Darɔm kara si ne maji lɔm
Am m’unda ne məəm yel gə́ dɔi’g ləm tɔ.
10 Mbata i a kya̰’m ɓee lə njé gə́ d’wəi’g lé el ləm,
Yeḛ gə́ i undá dan kəmi’g lé
I a kyá̰ k aree unda naŋg ndəs el ləm tɔ .
11 I a kam m’gər kila rəwje gə́ ka̰ kisi ne kəmba lé gao,
Nérɔlelje gə́ d’al dɔ loo sula to nɔḭ’g ləm,
Néje gə́ maji dum gə́ to gə no̰ lé
To dɔ jikɔli’g ləm tɔ.
© Ngambai Bible © Alliance Biblique du Tchad 1989, 2015.
