Dabid no̰ ɓar Njesigənea̰ gə́ Njekurdɔloo’g
Pak 108.2-61 Pakɔs lə Dabid gə́ bao-pa ɔs sə dee lé. D’ɔs gə ndu gwɔs gə́ pana: Ya̰ aree tuji el. Ndəa gə́ Dabid iya ne rəa mee bolè mbal’g loo gə́ Sawul tuba ne gée lé .
2 Ǝi Ala, maji kari oo kəm lootondoo’g,
Oo kəm lootondoo’g ya kari,
Mbata m’saŋg njo̰loo-kula-dɔ ləm rɔi’g.
3 Ma m’ra né gə ndum gə́ boi wəl
M’ɓar ne Ala gə́ to Njekurdɔloo’g,
M’ɓar ne Ala gə́ to njera né la ne səm.
4 Yeḛ a kar né gə́ a gə la səm ḭ dara ree am m’aji ne,
Loo gə́ njekula kəm ndòo ɔsm ɓɔḭ-ɓɔḭ lé,
Ala a kula gə meemaji ləa gə ŋgonkoji ləa kam m’oo.
5 Ma m’to mbuna dəwje gə́ to d’asəna gə toboḭje bèe,
Mbuna deḛ gə́ gaŋg dəwje mbidi-mbidi’g,
Ŋgaŋ dee adə njel-njel to gə́ ndo̰ niŋga-ndəi əsé ndo̰ ɓandaŋg bèe ləm,
Ndo̰ dee to asəna gə kiambas gə́ adə làm-làm bèe ləm tɔ.
6 Ǝi Ala, maji kari riba dɔ boo ləi gə́ ur dɔ dara’g ləm,
Ar rɔnduba ləi taa dɔ naŋg nee pəl-pəl ləm tɔ.
7 Deḛ d’iya gum dɔ gɔlm’g
Ar məəm ila ne kas bilim,
Deḛ d’inja bwa nɔm’g
Nɛ deḛ nja d’oso keneŋ.
8 Ǝi Ala, m’wa məəm kɔgərɔ,
Ma m’wa məəm kɔgərɔ ya,
M’a kɔs pa ləm,
M’a kim nékimje ləm ləm tɔ.
9 Ka̰kəmrɔm, maji kari ḭ dɔ ɓi’g,
Kṵdu-kag ləm, gə kṵdu-ko̰dè ləm lé ḭje dɔ ɓi’g tɔ.
Ma lé m’a tuga lookàr gə tina ya.
10 Mbaidɔmbaije, m’a pidii mbuna koso-dəwje’g ləm,
M’a kɔs pa kila ne riɓar dɔi’g no̰ ginkoji dəwje gə raŋg’g ləm tɔ,
11 Mbata meemaji ləi aw njal teḛ mee dara’g ləm,
Meenda londoŋ ləi dəs loo-kil-lə-ndi ləm tɔ.
12 Ǝi Ala, maji kari riba dɔ boo ləi gə́ ur dɔ dara’g ləm,
Maji kar rɔnduba ləi taa naŋg nee pəl-pəl ləm tɔ.
© Ngambai Bible © Alliance Biblique du Tchad 1989, 2015.
