Ndukwɔi lə njesigirɓee’g
1 Pakɔs lə Dabid gə́ ar bao-pa mba karee ɔs sə dee lé. D’ɔs gə nékim gə́ gə kuláje.
2 Ǝi Ala, oo ndu no̰je ləm,
Gə́ ur mbii gèŋ dɔ ndukwɔi’g ləm ya!
3 M’isi gwɔi naŋg’d bər ya m’ila ndum naŋg m’no̰ m’ɓari ne
Mbata məəm ila kas bilim ya,
Maji kari ɔr nɔm aw səm dɔ biri mbal’d
Gə́ m’askəm teḛ keneŋ gə dɔrɔm el lé,
4 Mbata i lé to njo̰loo-kula-dɔ ləm ya ləm,
Gə kəi-kaar-kɔgərɔ gə́ duu dɔ loo no̰ njéba̰je’g ləm ya ləm tɔ.
5 Ma m’ndigi si mee kəi-kubu’g ləi saar gə nɔm
Gə mba kula ne dɔm pḛ́ ndil bagije’g
6 Ǝi Ala, né gə́ ma m’ndiŋga lé i am ya,
I am nénduba gə́ wɔji dɔ deḛ gə́ ɓəl rii lé tɔ.
7 Maji kari ila ndɔje lə mbai dɔ maree’g-maree’g,
Maji kar ləbje ləa kara ḭ dɔ maree’d gə́ kédé-kédé saar gə no̰.
8 Maji karee si dɔ kalimbai’g saar gə no̰ no̰ Ala’g lé,
Maji kar meemaji ləi gə meenda londoŋ ləi lé
D’aa dəa kər-kər saar gə no̰ ya tɔ.
9 Yen ɓa m’a kɔs pa kila ne riɓar dɔ rii’g,
Pakɔs lé a lal tam el.
M’a tɔl ne ta ndukunje ləm lé gə ndɔm-ndɔm ya.
© Ngambai Bible © Alliance Biblique du Tchad 1989, 2015.
