Ndu no̰ gə́ dan nékəmndoo’g
1 Pakɔs lə Dabid gə́ ar bao-pa mba karee ɔs sə dee. D’ɔs gə ndu gwɔs pa gə́ pana: Pudu ndujaje.
2 Ǝi Ala, ajim ya kari
Mbata manje lé d’a gə tula dɔm.
3 Ma lé m’ur dan bɔrɔ dubu’g
Ar loo kam m’uba gə mba kaar ne tar lé godo.
Ma lé m’oso dan ɓul mán gə́ ɓiri’g
Ar paŋgəm manee dəs dɔm’g.
4 Ma lé m’no̰ m’sané siŋgam ləm,
Rəw gwɔsm gə́ kəi tudu kurum-kurum ləma,
Kəm kara tel ndul kɔl-kɔl ləm tɔ
Loo gə́ m’aa ne loo gə́ par gə́ rɔ Ala’g lé ləm lé.
5 Deḛ gə́ d’ḛjim bəḭ-bəḭ lal né gə́ bèe lé
Deḛ bula d’unda yiŋga dɔm ya,
Deḛ gə́ ndigi tujim lé to njésiŋgamoŋje,
Deḛ to njéba̰je ləm lal né gə́ bèe ya tɔ,
Né gə́ m’ɓogo el lé
Deḛ ndigi kam m’uga ɓaŋgee .
6 Ǝi Ala, i lé gər néra mbə ləm gao ya ləm,
Néramje gə́ to gə goo rəbee el lé kara
D’iya rɔ dee kəmi’g el ləm tɔ.
7 Deḛ gə́ d’unda meḛ dee yel gə́ dɔi’g lé
Maji kar kəm sɔḭ wa kəm dee mbata ləm-ma el,
I Mbaidɔmbaije gə́ to Njesigənea̰ gə́ njeboo-néje lé!
Deḛ gə́ sa̰gi lé ar dee d’isi dan rɔkul’g mbata ləm el tɔ,
I gə́ to Ala lə Israɛlje ya.
8 Mbata rii-i nja ɓa dəwje tajim ne
D’ar rɔkulee lé nai ne dɔm’g.
9 Ma lé m’tel m’to gə́ mbá kəm ŋgakɔmje’g ləm,
M’tel m’to dəw-dɔ-ɓee kəm ŋgalə kɔmeje-je’g ləm tɔ.
10 Mbata ŋgur kəi ləi gə́ ram ŋgwɔd-ŋgwɔd lé
Sɔ siŋgam yɔm-yɔm ləm,
Deḛ gə́ d’ula sul dɔi’g lé
Ta ndɔlje lə dee lé oso dɔm’g ya ləm tɔ .
11 M’no̰ gə mán-no̰ kəm’g ləm,
M’ɔg ne məəm ɓó ləm tɔ,
Yee ɓa ar dee tajim ne.
12 Ma m’ula kubu-kwa-ndòo rɔm’g
Ndá m’tel m’to ne nékɔrsu lə dee tɔ.
13 Deḛ gə́ d’isi tarəwkɔg’d lé
Pata d’wɔji ne dɔm ləm,
Njékai kidoje gə́ mḭ lé kara
D’ilam pa ya ləm tɔ.
14 Nɛ ma lé m’ra tamaji tai-i Njesigənea̰’g,
Ǝi Ala, maji kar ndɔ neelé to ndɔ noji gə goo bao-meemaji ləi ləm,
Maji kari ilam keneŋ
Mba kam m’gər gao to gə́ i a gə la səm ləm tɔ.
15 Ɔrm dan bɔrɔ dubu’g
Gə mba karm m’dubu keneŋ gogo el ŋga,
Ɔrm ji njéba̰je’g ləm,
Gə dan ɓul mán’g ya ləm tɔ.
16 Maji kar paŋgəm maneje lé dəs dɔm’g el ləm,
Maji kar ɓul mán lé urum kəi magə el ləma,
Maji kar bwa-yoo kara o̰ rḛdə dɔm’g mbiao̰ el ya ləm tɔ.
17 Njesigənea̰, maji kari ilam keneŋ am ne né gə́ m’dəjii
Mbata meemaji ləi dum dɔ loo ya,
Maji kari tel kəmi par gə́ rɔm’g oom
Mbata kookəmtondoo ləi lé boo dum dɔ loo ya tɔ.
18 Maji kari iya səm kəmi, ma kura ləi lé el!
Mbata ma lé m’isi dan néurti’g s
Ndá ɔs rɔi ɓad mba kam né gə́ m’dəjii lé.
19 Ŋgəs pər gə́ rɔm ɓó gə́ taam ləm,
Ajim ɓó gə ɔrm ne ji njéba̰je’g ləm ləm tɔ.
20 I lé gər taji gə́ deḛ tajim ləm,
Gə rɔkul gə kəm sɔḭ gə́ m’isi danee’g gao ya ləm tɔ,
Njéba̰je ləm lai lé kara d’aar nɔḭ’g.
21 Taji gə́ deḛ tajim lé ya
Iri ɓəŋgərəm budu-budu
Ar rɔm wəi ne sululu.
M’isi m’ŋgina koo kəmtondoo lé
Nɛ m’ŋgina pi,
M’ŋgina njégɔlməmje
Nɛ bura el ya tɔ.
22 Deḛ lé d’ɔm bodé táa dan nésɔm’g ləm,
Man gə́ ka̰ tɔl kṵdaman gə́ tɔlm lé
Nduú gə́ mas ɓa d’un d’am m’ai ləm tɔ .
23 Maji kar ɓar gə́ ɓar dee gə nésɔ lé
Tel to gum kwa dee ləm,
Gə ba̰də kwa dee loo-si lɔm’g lə dee ləm tɔ .
24 Maji kar kəm dee tel ndul ndiŋ-ndiŋ
Ar dee d’oo ne loo el ŋga,
Maji kar ɓər dee kara unda ne ndolè gə́ kédé-kédé ya.
25 Ɓugu oŋg ləi dɔ dee’g ləm,
Ar boo-oŋg ləi gə́ to ɓəl kədm-kədm lé kara
O̰ dee ya ləm tɔ.
26 Maji kar loo-si dee tel to dɔ nduba piu-piu
Ɓó ar dəwje d’isi mee kəi-kubuje’g lə dee el ya saar !
27 Mbata yeḛ gə́ i ɔr jii undá ne lé
D’ula kəmee ndòo ləm,
D’ɔr sor némeeko̰ lə dee gə́ i nja ar dee doo lé ləm tɔ.
28 Maji kari ila néra gə́ kori-kori dɔ maree’g lə dee ar dee
Ɓó gə mba kar dee d’iŋga dəb loo meekɔrjol ləi el.
29 Maji kar ri dee kara tuji pugudu mee maktub kəmə’g lé
Ɓó gə́ ndaŋg ri dee na̰’d gə njémeekarabasurje el .
30 Ma lé m’to njendoo gə́ m’isi dan némeeko̰’g,
Ǝi Ala, maji kar né la ləi lé
Ree unm urm tar ya.
31 Pakɔsje ləm lé m’a kar ri Ala ɓar ne,
M’a kɔs gajee gə pa pideeje lé tɔ.
32 Yee neelé taa kəm Njesigənea̰ rəgm
Unda bɔ maŋg gə gajee gə ŋgo gɔleeje lé tɔ.
33 Njénékəmndooje lé d’oo ndá d’al ne rɔ dee ya.
Seḭ gə́ saŋgje Ala
Maji kar meḛ sí to kəmba ya!
34 Mbata Njesigənea̰ lé oo ndu njéndooje ləm,
Ɓərje ləa lé yeḛ ə̰ji dee bəḭ-bəḭ el ləm tɔ.
35 Maji kar naŋg gə dara gə baa-boo-kadje
Gə néje lai gə́ to keneŋ lé d’ɔs gajee!
36 Mbata Ala a kaji Sio̰ lé ləm,
Yeḛ a tel kunda ɓee-booje gə́ ka̰ Juda lé gogo ləma,
D’a si keneŋ karee to né ka̰ dee-deḛ ləm tɔ.
37 Ŋgaka kuraje ləa lé
D’a kwa ɓee lé gə́ nénduba lə dee ya.
Deḛ gə́ d’unda ria dan kəm dee’g lé kara
D’a kiŋga loo-si dee keneŋ tɔ.
© Ngambai Bible © Alliance Biblique du Tchad 1989, 2015.
