Pa no̰ mbata tuji gə́ oso dɔ kəi-Ala’g
1 Pakɔs lə Asap.
Ǝi Ala, see gelee ban ɓa i uba dee ya̰ dee gə no̰ ɓəi wa.
See gelee ban ɓa oŋg ləi ḭ səi gə́ kédé-kédé
Ari ḭ ne gə koso-nékulje ləi
Gə́ d’aar loo-ko̰-mu’g ləi lé tɔɓəi wa.
2 Koso-dəwje ləi gə́ i taa dee kédé ləw ba lé
Maji kari ar məəi olé teḛ dɔ dee’g ya,
Deḛ gə́ i nja uga dɔ dee asəna gə ginkoji gə́ to gə́ nédɔji ləi bèe,
Mbal gə́ Sio̰ gə́ i ra loo-sii keneŋ lé kara
Ar məəi olé teḛ dɔ’g ya ləm tɔ.
3 Maji kari aw saar teḛ par gə́ mbuna looje neelé gə́ tuji gə́ kédé-kédé
Mbata njeba̰ lé tuji néje lai mee kəi gə́ to gə kəmee’g.
4 Njékoma̰ seije lé d’ɔr ndu dee gə́ tar wəl mee kəi’g ləi gə́ to gə kəmee’g,
Nétɔjije lə dee-deḛ nja d’unda keneŋ gə́ nétɔjije gə́ gəd.
5 D’oo dee asəna kára ba gə deḛ gə́ d’odo tinaje lə dee
D’aw ne mee kag-kɔr gə́ ndər siŋ-siŋ’d bèe.
6 Waga ndá tinaje gə mo̰je lə dee lé
Deḛ tuga ne néndajije gə́ tɔl dee gə́ to keneŋ.
7 Deḛ d’ula pər kəi ləi gə́ to gə kəmee doi ləm,
Kəi gə́ rii ɓar dɔ’g lé
Deḛ kunda təd d’ula ne sul dɔ’g ya ləm tɔ.
8 Deḛ pa meḛ dee’g kəi pana:
Ar sí n’raje sə deḛ lai né gə́ kərm-kərm!
Looje lai gə́ to gə kəmee mee ɓee’g neelé deḛ roo dula-dula ya.
9 Nétɔjije lə síjeḛ lé j’oo kára kara bèe el ləm,
Njetegginta kára kara godo ləma,
Dəw kára kara mbuna sí’g gər to gə́ né neelé a to saar kunda ŋgaŋgee ra wa bèe el ləm tɔ.
10 Ǝi Ala, saar ndɔ gə́ ra ɓa njekula kəmloondoo lé a kila ndɔl dɔ loo’g
Esé njeba̰ lé a kḛji ne rii bəḭ-bəḭ lal kəw ne rəa ɓəi wa.
11 See gelee ban ɓa i ɔm jii kaari’g bèe wa.
Maji kari wa jii gə́ tar tuji dee ne.
12 Ala to mbai ləm un kudee kédé gə́ ləw saar ɓasinè,
Yeḛ nja ɓa gə́ njegelkaji lə dəwje gə́ dɔ naŋg nee.
13 I gaŋg baa-boo-kad dana gə goo siŋgamoŋ ləi ləm,
Da-kɔb gə́ dan mán’g lé i tɔ ka dəaje réb-réb ya ləm ,
14 I iri ka dɔ mar njigi-njigi ləma,
I un ar koso-dəwje gə́ dɔdilaloo’g lé gə́ nésɔ dee ya ləm tɔ .
15 I ar kəm-rəw-manje gə ŋgira-manje tuba tir-tir ləm,
Man baaje gə́ d’yi kédé gə́ ləw el lé
I ar dee tudu kurum-kurum ləm tɔ.
16 Lookàr gə loondul lé to kaḭ ya ləm,
I ra naḭ gə kàr ləm tɔ.
17 I wɔji rəw-nim-naŋgje lai ar dee to njaŋg ləm,
I unda naḭ kàr gə naḭ ɓar lé ləm tɔ.
18 Maji kari gər gao, to gə́ njeba̰ lé
Ila ndɔl dɔi-i Njesigənea̰’g ləm,
Koso-dəwje gə́ to mbəje lé
D’ə̰ji rii bəḭ-bəḭ ləm tɔ.
19 Maji kari ya̰ koso-dəwje ləi ta daje’g el ləm,
Njénékəmndooje ləi lé ar məəi wəi dɔ dee’g gə no̰ el ya ləm tɔ.
20 Maji kari ə̰ji goo ta manrɔ lé
Mbata looje gə́ to bigim mee ɓee’g neelé
Ar gayim-dəwje taa ne loo keneŋ pəl-pəl.
21 Maji kar yeḛ gə́ d’ula kəmee ndòo lé
Tel gə́ ɓée gə rɔkul el ləm,
Maji kar njenékəmndoo gə njendoo lé
D’unda no̰ rii ya ləm tɔ.
22 Ǝi Ala, maji kari uba naŋg ḭta aḭ bada dɔ ta’g ləi.
Ar məəi olé teḛ dɔ ta ndɔlje’g lə mbə-dəwje
Gə́ d’ila dɔi’g gə ndɔ dee ndɔ dee.
23 Ar məəi wəi dɔ kunda bula yi-i-i lə njéba̰je ləi lé el ləm,
Kaw dɔ na̰’d pum-pum lə deḛ gə́ ḭ dɔ maree’d gə́ kédé-kédé əw el lé
Ar məəi wəi dɔ’g el ləm tɔ.
© Ngambai Bible © Alliance Biblique du Tchad 1989, 2015.
