Pa no̰ ndòo Jerusalem gə́ tuji lé
1 Pakɔs lə Asap .
Ǝi Ala,
Ginkoji dəwje gə raŋg lé aa loo pəl-pəl dɔ nédɔji’g ləi ləm,
Kəi ləi gə́ to gə kəmee doi lé d’ila ndɔl dɔ’g ləma,
Jerusalem kara d’aree tel to gə́ kɔr mbalje
Gə́ d’wa kugu dɔ na̰’d bèe ləm tɔ.
2 Deḛ lé d’ya̰ nin kuraje ləi
Gə́ néko̰ lə yelje ləm,
Dakasrɔ majikojije ləi lé kara d’ya̰ d’ar daje gə́ wala ləm tɔ.
3 Deḛ d’ɔm məs dee naŋg asəna gə mán bèe ya
Gugu ne dɔ ɓee gə́ Jerusalem lé sub
Ar dəw kára bèe gə́ njedubu dee godo.
4 Jeḛ n’tel n’toje nérɔkul kəm njéboataɓeeje lə sí ləm,
N’toje nékunda-kogo gə nédəjindu lə dee-deḛ
Gə́ gugu dɔ sí sub neelé ləm tɔ.
5 Njesigənea̰, see ndɔ gə́ ra ɓa a kunda ŋgaŋ meekḭ jugugu ləi ɓəi wa.
See ndɔ gə́ ra ɓa oŋg ləi gə́ taa pər bilim-bilim lé a kwəi bèm wa.
6 Maji kari ɓugu boo-oŋg ləi
Dɔ Ginkoji dəwje gə raŋg’d gə́ gəri el ləm,
Gə dɔ ɓeeko̰je’d gə́ ɓar rii keneŋ el lé ləm tɔ.
7 Mbata deḛ gaŋg ŋgaka Jakob lé mbidi-mbidi
D’ar loo-siée kara wa ŋgɔ njag-njag.
8 Ar məəi olé teḛ dɔ néra kori-korije’g lə sí gə́ ləw lé el ŋga.
Maji kar némeekaw taḭ-taḭ ləi lé ree gə tɔgee tila kəm sí
Mbata jeḛ lé kəm sí to ndòo yaa̰.
9 Ala, i gə́ to njekaji sí lé
Maji kari ree la sə sí gə mba kar rii ɓar ne ləm,
Gə́ taa dɔ sí ar məəi oso lemsé dɔ kaiya ra síje’g
Mbata lə rii-i nja ləm tɔ.
10 See gelee ban ɓa ginkoji dəwje gə raŋg lé d’a pana:
See Ala lə dee lé əd ra ɓəi wa.
Maji kar dee gər gao kəm síjeḛ’g ləm,
Gə mbuna ginkoji dəwje gə raŋg’g ləm tɔ lé
To gə́ i nja dal ba̰ məs kuraje ləi gə́ ɔm dɔ naŋg lé.
11 Maji kar ndu tuma̰je lə ɓərje lé aw saar teḛ rɔi’g!
Maji kari aji deḛ gə́ d’a gə kudu gə goo jii gə́ ɓar mèr-mèr lé!
12 Mbaidɔmbaije, ndɔl gə́ njéboataɓeeje lə sí d’ila dɔi’g lé
Maji kari tel ɔm dɔ dee’g godə maree’g gɔl siri.
13 Nɛ jeḛ gə́ n’toje koso-dəwje ləi
Gə́ n’toje koso-nékulje ləi gə́ j’aar loo-ko̰-mu’g ləi lé
J’a pidii saar-saar gə no̰ ya ləm,
J’a kɔs pa kila ne riɓar dɔi’g kar ŋgaka síje d’ɔs gə́ kédé-kédé ya ləm tɔ.
© Ngambai Bible © Alliance Biblique du Tchad 1989, 2015.
