Tamaji lə Israɛlje mba kar Ala dal ne ba̰ lə dee
1 Pakɔs lə Asap.
2 Ǝi Ala, maji kari si dɔ mundu el!
Ǝi Ala, ar tai to gə loo ndèmee el ləm,
Wa rɔi el ləm tɔ,
3 Mbata aa oo, njéba̰je ləi lé
D’aw dɔ na̰’d pum-pum ləm,
Deḛ gə́ d’ḛjii bəḭ-bəḭ lé kara
D’unda ne dɔ dee tar ləm tɔ.
4 Deḛ d’wɔji-kwɔji mba ra gosɔyèr gə koso-dəwje ləi ya ləm,
D’ula ta meḛ na̰’d
Gə mba tuji deḛ gə́ i aḭ bada dɔ dee’g lé ya ləm tɔ.
5 Deḛ lai pana:
Gə́ reeje ar neḛ n’tɔje kó dee mbuna ginkoji dəwje gə raŋg’g
Mba kar meḛ dəwje olé ne dɔ ri Israɛl’g lé el ŋga.
6 Deḛ lai neelé d’ar meḛ dee asəna téréré ləm,
Deḛ manrɔ dee d’ar na̰ d’oma̰ ne səi ləm tɔ.
7 Deḛ gə́ d’isi mee kəi-kubuje’g lə Edɔmje, gə Ismaelje ləm,
Gə Moabje, gə Hagareje ləm,
8 Gə Gebalje, gə Amo̰je, gə Amalekje ləm,
Gə Pilistije gə dəwje gə́ mee ɓeeje gə́ Tir lé ləm tɔ.
9 Asirije kara d’ɔm sə dee na̰’d yəg ya
Deḛ la ne gə ŋgaka Lɔtje.
10 Maji kari ra sə dee to gə́ i ra gə Madian gə Sisera
Gə Jabḭ mbɔr mán gə́ Kiso̰’g bèe ya .
11 Deḛ lé tuji pugudu mee ɓee gə́ En-Dɔr’g
Ar nin dee tel to asəna gə siḭ néje gə́ d’ɔm naŋg bèe.
12 Mbaije lə dee lé maji kari ra sə dee
To gə́ i ra gə Oreb, gə Jeeb bèe ləm,
To gə́ i ra gə Jebak, gə Salmuna bèe ya ləm tɔ ,
13 Mbata deḛ lé pana:
Ar neḛ n’taaje kəije lə Ala neelé gə́ ka̰ neḛje
14 Ala ləm, maji kari ra sə dee ar dee tel to d’asəna gə lel-mal gə́ ɓir bèe ləm,
Asəna gə ləm-mu gə́ lel ula ne bèe ləm,
15 Asəna gə pər gə́ o̰ mee kag-kɔr’g bèe ləma,
Asəna gə ndo̰ pər gə́ ɔn dɔ mbalje’g bilim-bilim bèe ləm tɔ.
16 Maji kari tuba dee
Gə lel-boo ləi gə́ ula mbḭ-mbḭ ləm,
Gə lel-ndi ləi gə́ a kar dee d’unda bala tigi-tigi ləm tɔ.
17 Ǝi Njesigənea̰, ar kəm sɔḭ wa kəm dee
Gə mba kar dee tel ree ne rɔi’g ya.
18 Maji kar kaar dee to kərm, kar dee ndəb pəd-pəd saar gə no̰ ya ləm,
Maji kar dee nai gə rɔkul ɓó gə d’udu ne guduru ya ləm tɔ.
19 Maji kar dee gər gao to gə́ i nja kára ba gə́ rii lə Njesigənea̰ lé
I to Njekurdɔloo gə́ o̰ ɓee dɔ naŋg nee lai ya.
© Ngambai Bible © Alliance Biblique du Tchad 1989, 2015.
